تارازدان كەلگەن تۇرعىندار نەگە اقتوبەنىڭ بيۋدجەتىنەن ميلليونداعان تەڭگە الىپ, وسىندا گۇل الاڭدارىن جاساپ ءجۇر؟ اقتوبەدەگى «دياپازون» گازەتىنىڭ ءتىلشىسى وبلىس اكىمى بەردىبەك ساپارباەۆتان وسىنىڭ جايىن بىلگىسى كەلىپ, تۋراسىنان سۇراق قويعان. اتاپ ايتقاندا, جۋرناليست اقتوبەدە الدەقانداي جۇمىستاردى جۇرگىزۋدەگى مەملەكەتتىك تاپسىرىستاردىڭ تەندەرلەرىن باسقا جاقتان كاسىپورىندار ۇتىپ الىپ جاتاتىنىنا ايماق باسشىسىنىڭ قالاي قارايتىنىن بىلگىسى كەلگەن. ماسەلەن, قالادا گۇل الاڭدارى مەن گازوندار جاساۋ ءۇشىن جەرگىلىكتى بيۋدجەتتەن بولىنگەن 400 ملن. تەڭگەنىڭ 200 ميلليونىن تاراز كومپانياسىنىڭ جەڭىپ العانىن قالاي تۇسىندىرۋگە بولادى؟ جەرگىلىكتى كاسىپكەرلەرگە قولداۋ كورسەتۋ قايدا قالعان سوندا؟
وبلىس اكىمى دە جاۋاپتان جالتارماي, بۇعان ءوزىنىڭ كوزقاراسىن اشىق بىلدىرگەن. ونىڭ ايتۋىنشا, جەرگىلىكتى كاسىپكەرلەرگە قولداۋ كورسەتۋ جايى كۇن تارتىبىنەن تۇسپەگەن.
«جەرگىلىكتى تاۋار وندىرۋشىلەرگە قولداۋ كورسەتىلۋى كەرەك, - دەدى ب. ساپارباەۆ. – بۇل ءۇشىن ءبىز وزىمىزدە نەنىڭ بار, نەنىڭ جوق ەكەنىن انىقتاپ الاتىن تۇتىنىم بالانسىن جاساپ كوردىك. ەگەر شىنىمەن وزىمىزدە جوق نارسە بولسا, سىرتتان اكەلۋىمىز كەرەك. سوندىقتان ءبىز وسىنىڭ ءبارىن قاداعالاپ وتىرامىز. زاڭعا سايكەس, كەز كەلگەن ازاماتتىڭ, قازاقستاننىڭ زاڭدى تۇلعاسىنىڭ, قايدا تۇراتىنىنا قاراماستان, تەندەرلەرگە قاتىسۋعا قۇقى بار. بىراق بىزدە سىرتتان كەلگەن كومپانيالاردىڭ تەندەرلەردى ۇتىپ العان مۇنداي فاكتىلەرى كوپ ەمەس. ەندى گۇل ءوسىرۋ جايىنا كەلسەك. مەن قالا كوشەلەرىن ارالاپ, مۇندا بىزدەردىكى مەن تارازدىقتاردىڭ قانداي گۇلدەر ەكككەندەرىن كورىپ شىقتىم. سولارداعى تارازدىقتار مەن ءبىزدىڭ كاسىپكەرلەر ەككەن گۇلدەردىڭ ءار شارشى مەترى قانشاعا تۇسكەنىن ەسەپتەپ كوردىك. سوندا تاراز كاسىپورنى جۇمىسشىلارىنىڭ وتە جاقسى جۇمىس جاسايتىندارى بايقالىپ قالدى. ولاردىڭ وسىرگەن گۇلدەرىنە وزدەرىڭىز دە قاراڭىزدار. مەن جانە ولارعا گۇلدەرى سولىپ قالاتىن بولسا, ونىڭ ورنىنا ءوز ەسەپتەرىنەن جاڭاسىن قايتا وتىرعىزاتىندارىن ايتتىم. تارازدىقتار جۇمىسقا دا جەرگىلىكتى كادرلاردى الىپ, ولارعا گۇل ەگۋدى ۇيرەتىپ جاتىر. كەلەشەكتە وسىلار گۇل ءوسىرۋدىڭ ماماندارى بولىپ شىعا كەلەدى. مەن ءوزىمىزدىڭ كومپانيا ادامدارىنىڭ بىرىنەن گۇل الاڭىنىڭ قانشا شارشى مەتر ەكەنىن سۇرادىم. ول 50 شارشى مەتر دەپ جاۋاپ بەردى. ال قاراپ تۇرسام, ايتىپ تۇرعان اۋماعى 20 شارشى مەتر دە بولمايدى».
ايماق باسشىسى وسىنداي كەمشىلىكتەرى بولعاندارىنا قاراماستان, جەرگىلىكتى كومپانيالاردى ىسكە كوبىرەك تارتۋدىڭ كەرەك ەكەنىن اشىپ ايتتى.
«دەگەنمەن, ءبىزدىڭ باستى پوزيتسيامىز – جەرگىلىكتى تاۋار وندىرۋشىلەرگە قولداۋ كورسەتۋ. بىراق ولار وسىعان لايىقتى ساپالى جۇمىس جاساۋلارى كەرەك. اسفالتتى الايىق. ونى وتكەن جىلى ءبىزدىڭ كومپانيالار جاسادى. بيىل سونى قايتا جاساپ جاتىر. مەن سوسىن ەندى تاعى وسىنداي ولقىلىقتار جىبەرەتىن بولسا, جۇمىسقا جىبەرمەيتىنىمىزدى ايتتىم. بيىلعى جىلى ءبىز 40 شاقىرىمعا جۋىق اۋماقتى, 30-عا تارتا كوشەنى جوندەۋدەن وتكىزۋىمىز كەرەك. الايدا, ءبىزدىڭ كومپانيالارىمىز بۇلاردى جاساپ ۇلگەرە الاتىن ەمەس. سوندىقتان قازىر استانادان ادامدار شاقىردىق, ولار ىسكە كىرىسىپ كەتتى. بىزگە مۇنىڭ ءبارىن قىسقا دەيىن اياقتاپ شىعۋ كەرەك», - دەدى ب. ساپارباەۆ ءسوزىنىڭ تۇيىنىندە.
مۇرات ايتقوجا