[caption id="attachment_52826" align="aligncenter" width="560"] فوتو: ntv.ru[/caption]
سيريادان تۇركياعا شەكارا ارقىلى وتپەك بولعان بىرنەشە سودىر ۇستالدى. وقيعا مانبيدجا ايماعىندا بولعان. ءبىر قىزىعى, ولار ايەل ادامنىڭ كيىمىن كيىپ, بەتتەرىن تۇمشالاپ وتپەك بولىپتى. ntv.ru اقپارىندا شەكارا قىزمەتكەرلەرى ولاردى كوزى مەن قاسىنا قاراپ, ەر ادام ەكەنىن بىردەن بىلگەنى تۋرالى ايتىلادى.
قازىرگى تاڭدا مانبيدج تولىعىمەن اسكەريلەردىڭ قورشاۋىندا. وسىعان بايلانىستى, ەكسترەميستەر مۇنداي قادامعا ءجيى بارۋدا. ازداعان ۋاقىت بۇرىن بۇل ماڭايدا اۋە سوقىلارىنان جۇزدەگەن بەيبىت تۇرعىن قازا تاپقان بولاتىن.
ايتا كەتەيىك, لاڭكەستەردىڭ ورامال تاعىپ, بەتىن جاۋىپ وتپەك بولعاندارى ءبىرىنشى رەت كەزدەسىپ تۇرعان جايت ەمەس. وسىعان دەيىن الەپپو قالاسىنان ونداعان ەكسترەميست ۇزىن كويلەك كيىپ, شەكارا اسىپ كەتكىسى كەلگەن بولاتىن. بىراق اسكەريلەردىڭ قىراعىلىعى ارام ويلارىن جۇزەگە اسىرۋىنا مۇمكىندىك بەرمەدى.
بىرىككەن ۇلتتار ۇيىمىنىڭ مالىمەتى بويىنشا, بۇگىنگە دەيىن سيريادا قاقتىعىستاردىڭ سالدارىنان 220 مىڭنان استام ادام قازا تاپقان ەكەن.
ايان ءابدۋالي