اقتاۋدان جاڭاوزەن قالاسىنا قاراي 44 شاقىرىم قاشىقتىقتا, كۇرە جولدىڭ بويىندا مۇنايشىلار اۆتوبۋسى ورتەنىپ كەتتى.
ولكەدەگى ەڭ ءىرى مۇناي كاسىپورنى – «ماڭعىستاۋمۇنايگاز» اق-قا قاراستى اۆتوبۋس جەتىبايدان ۆاحتالىق ادىسپەن جۇمىس جاسايتىن مۇنايشىلاردى الىپ كەلۋگە بارا جاتقان بەتى ەكەن. قۋانىشقا وراي, اۆتوبۋس ءىشى بوس بولعان جانە جۇرگىزۋشى كابينادان شىعىپ, قاۋىپسىز جەرگە جەتىپ ۇلگەرگەن.
وقيعا ورنىنا بارعان ءورت ءسوندىرۋشىلەر ءتىلسىز جاۋدىڭ اۋىزدىقتالعاندىعىن, بىراق اۆتوبۋستىڭ تولىق جانىپ كەتكەنىن ايتقان. قازىرگى تاڭدا ءورتتىڭ شىعۋ سەبەپتەرى انىقتالۋدا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى