[caption id="attachment_50688" align="aligncenter" width="560"] فوتو: pressclub.kz[/caption]
Uber حالىقارالىق تەحنولوگيالىق كومپانياسى الماتى قالاسىندا ءوز جۇمىسىن باستادى.
Uber – جەكە جۇرگىزۋشىسىمەن اۆتوكولىكتەردى شاقىرتۋ بويىنشا ءموبيلدى قىزمەتتەردى جاسايتىن حالىقارالىق تەحنولوگيالىق كومپانيا. ەندى قالانىڭ بارلىق تۇرعىندارى مەن قوناقتارى سمارتفون ارقىلى اۆتوكولىك شاقىرتا الادى.
وسىلايشا, اتالعان كومپانيا الماتىدا جۇمىس ىستەي باستاعانىن جاريالاپ, «الماتى دامۋ ورتالىعى» جانە AlmatyTechGarden-مەن ءوزارا تۇسىنىستىك تۋرالى مەموراندۋمعا قول قويدى.
قازاقستان ءباسپاسوز كلۋبىنىڭ حابارلاۋىنشا, الماتى قازاقستاندا جاڭا قوسىمشاسى قولجەتىمدى بولاتىن استانادان كەيىنگى ەكىنشى قالا.
الماتى تۇتىنۋشىلارىنا uberX-كە كەلەسىدەي تاريفتەر ۇسىنىلماق: اۆتوكولىكتى ۇسىنۋ ءۇشىن 170 تەڭگە, ءار شاقىرىمعا 40 تەڭگە جانە ءار مينۋتقا 5 تەڭگە ء(ار شاقىرىم مەن مينۋتقا كەتەتىن جول اقىسى قوسىلادى).وسىلايشا, ارباتتان رەسپۋبليكا الاڭىنا (جاڭا الاڭ) دەيىنگى جولدىڭ جوبالاي قۇنى 400 تەڭگەنى قۇرايدى. م.اۋەزوۆ اتىنداعى دراما تەاترىنان 28 گۆاردياشىلار-پانفيلوۆشىلار اتىنداعى ساياباققا دەيىنگى جولاقى – 416-499 تەڭگە, ال گوركي اتىنداعى مادەنيەت جانە دەمالىس ورتالىق ساياباعىنان تسيرككە دەيىنگى جول 458-555 تەڭگە تۇراتىن بولادى.
[caption id="attachment_50689" align="aligncenter" width="560"] فوتو: pressclub.kz[/caption]
قالانىڭ كەز كەلگەن جەرىنەن اۋەجايعا بارۋ قۇنى 2500 تەڭگەنى قۇرايدى. مەدەۋ تانىمال كۋرورتىنا بارۋ اقىسى دا ءدال سولاي بولادى.
الماتىداعى Uber تۇعىرناماسىندا تەك قانا تاماشا تەحنيكالىق احۋالداعى, شىعۋ مەرزىمى 7 جىلدان اسپاعان شەتەلدىك ماركالى (Toyota Camry, Hyundai Accent, Kia Rio جانە تاعى باسقا) اۆتوكولىكتەر قىزمەت ەتەدى.
جاڭا قوسىمشا ارقىلى اۆتوكولىككە تاپسىرىس بەرۋ قولدانۋشىنىڭ قاۋىپسىزدىگىن قامتاماسىز ەتەدى. وسى ارقىلى اۆتوكولىككە تاپسىرىس راستالعان سوڭ جۇرگىزۋشى تۋرالى بارشا قاجەتتى اقپاراتتى, ياعني ونىڭ ەسىمى, سۋرەتى, اعىمداعى رەيتينگى, ءنومىرى جانە ماشينا ماركاسى تۋرالى مالىمەتتى الادى. سول سياقتى, قولدانۋشى جۇرگىزۋشىمەن تىكەلەي بايلانىسا الادى.
ايناش ەسالي