Euro-2016 سايتىندا جاريالانعان اقپارعا قاراعاندا, فرانتسيا قۇراماسىنىڭ باس جاتتىقتىرۋشىسى ديدە دەشام پورتۋگاليا تاكتيكالىق جاعىنان يكەمدى, يىلگىش كوماندا بولعاندىقتان, ونىڭ قارسى شابۋىلى قاۋىپتى دەپ ەسەپتەيدى. ال پورتۋگالدار ۇستازى فەرناندۋ سانتۋش فرانتسۋزدار قۇرامىنداعى كەز كەلگەن ويىنشىنى قاۋىپتى دەپ وتىر.
كوماندالاردىڭ بولجامدى ستارتتىق قۇرامدارى مىناداي:
پورتۋگاليا: رۋي پاتريسيۋ; سەدريك, پەپە, فونتە, گەررەيرۋ; ۆيلليام كارۆاليۋ, ادريەن, جواۋ ماريۋ, سانشەش; ناني, رونالدۋ.
ال پەپەنىڭ شىعۋ-شىقپاۋى بەلگىسىز. پەپە بەلىنەن جاراقات الىپ قالۋىنا بايلانىستى ۋەلسپەن ويىنعا شىعا المادى. بىراق, سانتۋشتىڭ ايتۋىنشا, ول جەكسەنبى كۇنى اۋىرۋ سەزىنبەگەن. سول سياقتى ۆيلليام كارۆاليۋ جارتىلاي قورعانىستىڭ ورتالىق شەبىندە دانيلۋدىڭ ورنىنا وينايدى دەگەن بولجام بار.
فرانتسيا: لوريس; سانيا, كوستسەلنى, يۋمتيتي, ەۆرا; پوگبا, ماتيۋيدي; سيسسوكو, گريزمانن, پايە; جيرۋ.
فرانتسۋزدار جارتىلاي فينالدا گەرمانيامەن ويناعان قۇرامىمەن شىعادى دەلىنىپ وتىر. جەرگىلىكتى ءباسپاسوز تەك الاڭنىڭ ورتا شەبىندە ن'گولو كانتە پايدا بولۋى مۇمكىن دەگەن ويدى العا تارتادى. باق-تار سونداي-اق وتكەن ويىنداعى سەنىمسىز ارەكەتىنەن كەيىن ديميتري پايە زاپاستا قالۋى مۇمكىن ەكەنىن جازىپ جاتىر.
پورتۋگاليا قۇراماسىنىڭ باس جاتتىقتىرۋشىسى فەرناندۋ سانتۋش:
-مەن ءبىزدىڭ ماقساتىمىز فينالعا شىعىپ, وندا جەڭىسكە جەتۋ ەكەنىن بۇدان بۇرىن دا ايتقانمىن. ءبىز قازىر ءوز كۇشىمىزگە تولىق سەنىمدىمىز. سوندىقتان پورتۋگال حالقىن قۋانىشقا بولەگىمىز كەلەدى.
مەن سونداي-اق فرانتسيا قۇراماسى تۋرالى كوپ تولعاپ, ايتىپ جاتۋدىڭ قاجەتى جوق دەپ ويلايمىن. سەبەبى, جۇرت ونى ونسىز دا جاقسى بىلەدى. مەن ەڭ باسىندا فرانتسيا, يسپانيا جانە گەرمانيا ءتارىزدى ءۇش ءفاۆوريتتىڭ بار ەكەنىن مادىمدەگەن بولاتىنمىن. كەيىن باسقا دا ۇمىتكەرلەر شىعا باستادى. سولاردىڭ قاتارىنا پورتۋگاليا دا كىردى.
ەگەر مەن ورىنداۋشىلار جايىنا كەلسەم, ءبىزدىڭ ولاردىڭ ءاربىرى مازاسىزداندىرادى. ويتەتىن بولسام, مەن فرانتسيا قۇراماسى ويىنشىلارىن تۇگەل اتاپ شىققان بولار ەدىم. ولاردىڭ ءاربىرى ويىننىڭ تاعدىرىن شەشىپ كەتۋگە لايىقتى. بىراق پورتۋگاليا دا كۇشتى كوماندا. وندا ماتچتا قالاي جەڭىسكە جەتۋگە بولاتىنىن جاقسى بىلەتىن جارقىراعان تۇلعالار دا بار.
فرانتسيا قۇراماسىنىڭ باس جاتتىقتىرۋشىسى ديدە دەشام:
-بىزدە ەۋروپا چەمپيونى اتاناتىن مۇمكىندىك بار. مەنىڭ 2000 جىلى ويىنشى رەتىندە چەمپيوناتتى ۇتىپ العانىم – وتكەننىڭ ءىسى. قازىر باسقا تاريح كەلدى. ەندى جاتتىقتىرۋشى رەتىندە سونداي قۇرمەتكە بولەنگىم كەلەدى. راس, سول كەزدەن قالعان جاقسى, پايدالى تاجىريبە بار. سونى پايدالانىپ قالۋعا ۇمتىلامىن. بىراق مەن وتكەندى ايتا بەرگەندى قالامايمىن. ەندىگى كەزدە تەك وسى شاق پەن كەلەر شاقتىڭ عانا ماعىناسى بار.
پورتۋگاليا – وتە كۇشتى, ول فينالعا بەكەردەن-بەكەر شىققان جوق. ءتۋرنيردىڭ باسىندا ءبىز سەكىلدى, پورتۋگالداردى دا جۇرت قاتتى سىنادى. بىراق ءبىز دە, ولار دا فينالعا شىعا الدىق. بۇل – تاكتيكالىق سىزباسىن قارسىلاسىنا قاراي وزگەرتىپ وتىراتىن وتە تاجىريبەلى كوماندا. ول قورعانىس شەبىندە وتە سەنىمدى وينايدى. پورتۋگالدار جوعارى قىسىمدى پرەسسينگ پايدالانبايدى, بىراق ەكى فورۆاردىنىڭ جۇيرىكتىكتەرىنە ارقا سۇيەپ, وتە شۇعىل قارسى شابۋىلدارعا شىعىپ تۇرۋعا بەيىم.
رەپورتەرلەر كوزقاراستارى
دجو ۋوكەر, پورتۋگاليا (@UEFAcomJoeW)
-چەمپيوناتتىڭ باسىندا يسلانديامەن تەڭ (1:1) ويناعان پورتۋگاليانىڭ فينالعا شىعاتىنى ەشكىمنىڭ قاپەرىنە كەلگەن جوق. بىراق تاپ سولاي بولىپ شىقتى. ەسەسىنە سانتۋش ەڭ باسىنان ءوز كومانداسىنىڭ ءتۋرنيردى ۇتىپ الاتىنىن ايتۋمەن بولدى. مىنە, ول سوعان ءبىر قادام جەردە تۇر. پەپەنىڭ ورالۋى پورتۋگالداردىڭ سەنىمىن ارتتىرادى. ەندى تەك پول پوگباعا قارسى وينايتىن ۆيلليام كارۆاليۋ بولا ما, الدە دانيلۋ بولا ما, - سونى عانا شەشىپ الۋ كەرەك. ەگەر كريشتيانۋ رونالدۋ ۆالليلىكتەرمەن وتكەن جارتىلاي فينالداعى دەڭگەيىندە ويناسا, پورتۋگالدار ءوز ومىرلەرىندەگى تۇڭعىش تروفەيلەرىن وسى جولى ۇتىپ الادى.
دەۆيد كروسسان, فرانتسيا (@UEFAcomDavidC)
-فرانتسۋزدار ءوز ارماندارىن ءىس جۇزىنە اسىرۋ ءۇشىن بۇل فينالدى ۇتۋعا مىندەتتى. دەشامنىڭ كومانداسى بيىلعى جىلى كوپتەگەن پروبلەمالارعا تاپ كەلدى. بىراق سوعان قاراماستان, ۇدايى جاقسى ويىن كورسەتىپ وتىردى. فرانتسۋزدار بەتتەگەن جولدارىنان اۋىتقىماي, ىلگەرى جىلجي بەردى. قازىر ەندى كوماندا انتۋان گريزمانن كەيپىندەگى جاڭا جۇلدىزعا قول جەتكىزدى. «ءۇش تۇستىلەردىڭ» جەڭىسكە جەتۋلەرىنە جانكۇيەرلەر قوساتىن ۇلەس تە از بولمايدى.
ءسىز بىلەسىز بە؟
رونالدۋ مەن گولكيپەر رۋي پاتريسيۋ وسى چەمپيوناتتاعى ويىن ەڭ كوپ – 600 مينۋت ۋاقىتتى الاڭدا وتكىزگەن ويىنشىلار بولىپ تابىلادى.
ماتچ تۋرالى مالىمەتتەر
بۇل فينالدىق ويىنعا دەيىن فرانتسيا قۇراماسى ەۋروپا چەمپيوناتىندا ەكى رەت جەڭىسكە جەتكەن.
پورتۋگاليا ەكىنشى مارتە فينالعا شىعىپ وتىر. ول 2004 جىلى ءوز ەلىندە وتكەن قۇرلىق چەمپيوناتىنىڭ فينالدىق كەزدەسۋىندە گرەكيا كومانداسىنا جول بەرىپ قويعان ەدى.
ماتچ وتەتىن جەر
ول پاريج تۇبىندەگى سەن-دەني قالاسىنداعى «ستاد-دە-فرانس» ستاديونىندا وينالادى. 80 000 ورىندىق بۇل سپورت ارەناسى 1997 جىلعى 1 قاڭتار كۇنى اشىلعان بولاتىن.
ماتچقا قازىلىق ەتۋشىلەر
ماتچ رەفەريى: مارك كلاتتەنبۋرگ (انگليا), رەفەري كومەكشىلەرى: سايمون بەك (انگليا),
دجەيك كوللين (انگليا).
ءتورتىنشى رەفەري: ۆيكتور كوششوي (ماجارستان). قوسىمشا رەفەري كومەكشىلەرى: ەنتوني تەيلور (انگليا), اندرە ماررينەر (انگليا).
كوماندالاردىڭ بۇعان دەيىنگى كەزدەسۋلەرى
فرانتسيا – پورتۋگاليا قۇرامالارى وسى كەزگە دەيىن ءوزارا 24 رەت كەزدەسكەن. سونىڭ 18-ىندە فرانتسيا, 5-ىندە پورتۋگاليا جەڭىپ, 1 ويىن عانا تەڭ اياقتالعان. دوپ ايىرىمى: 49 – 28, فرانتسۋزداردىڭ پايداسىنا.
فرانتسيا پورتۋگالداردى سوڭعى 10 كەزدەسۋىندە دە ۇتقان بولاتىن. وسىمەن ونىڭ بۇل كومانداعا قاتىستى جەڭىستى جولى 40 جىلدان استام ۋاقىتتان بەرى جالعاسىپ كەلەدى.
دامير قوجامقۇل