بۇگىن تۇندە ءپاريجدىڭ تۇبىندەگى سەن-دەني قالاسىنىڭ 80 مىڭ ورىندىق «ستاد-دە-فرانس» دەپ اتالاتىن ستاديونىندا فرانتسيا مەن پورتۋگاليا قۇرامالارى ەۋروپا چەمپيوندىعى اتاعىن ساراپقا سالادى.
وسىعان وراي euro-2016 باسىلىمى دجو ۋوكەر جانە دەۆيد كروسسان دەگەن ساراپشىلاردىڭ اتالمىش ماتچ جونىندەگى وي-پىكىرلەرىن سۇراعان ەكەن.
دجو ۋوكەر, پورتۋگاليا (@UEFAcomJoeW)
رونالدۋ ءوزىن تولىق اشىپ كورسەتە الا ما؟
كريشتيانۋ رونالدۋ ۋەلسپەن وتكەن جارتىلاي فينالدىق ويىندا كەرەمەت ويىن ورنەگىن كورسەتتى. بىراق ول ءالى دە ءوز دەڭگەيىنەن تومەن ويىن كورسەتىپ ءجۇر. ماسەلەن, يسلانديامەن جانە اۆستريامەن توپتىق كەزەڭدە وتكەن كەزدەسۋلەردە سولاي بولدى. دەگەنمەن, رونالدۋ ءوزىنىڭ وسى كەزگە دەيىنگى ويىنشىلىق مانسابىندا ىلعي دەرلىك ماڭىزدى جەكپە-جەكتەردە كەرەمەت ويناپ كەلىپ ەدى. ال جەكسەنبى كۇنى وينالاتىن فينالدىق ماتچتىڭ سولاردىڭ بارىنەن دە اسىپ تۇسەدى. ەگەر ءبىز فينالدا مۇنىڭ الدىندا تاپ «ۆالليلىك ايداھارلاردى» اۋىزدىقتاعان رونالدۋدى كورە الاتىن بولساق, پورتۋگاليانىڭ ءوز تاريحىنداعى ەڭ جوعارى تروفەيدى جەڭىپ الۋىنا ناقتى مۇمكىندىك تۋار ەدى.
پەپەنىڭ ورالۋى
پەپە, بالكىم, جاراقات قۇرامنان شىعارىپ تاستاماعاندا, پورتۋگاليا قۇراماسىنىڭ ەۋرو-2016-داعى ەڭ ۇزدىك ويىنشىسى بولار ما ەدى؟! «رەالدىڭ» قورعاۋشىسىنىڭ تاجىريبەسى مەن شەبەرلىگى پورتۋگاليا قۇراماسىنا قازىر ءتۋرنيردىڭ باس مەرگەنى انتۋان گريزمانندى توقتاتۋ ءۇشىن بۇرىنعى قاي كەزدەگىدەن دە ارتىق كەرەك بولىپ تۇر. برۋنۋ الۆەش بۇعان دەيىن گارەت بەيل باستاعان ۆالليلىكتەرگە لايىقتى قارسىلاس بولا بىلگەن, بىراق پەپە ەندى گويزمانن پەن وليۆە جيرۋعا ودان كۇشتى قارسىلاس بولار ەدى.
جارتىلاي قورعانىستىڭ قۇپيا قارۋى
ادريەن سيلۆا جۇرت نازارىن وزىنە ءدال جاس رەناتۋ سانشەش سەكىلدى اۋدارا العان جوق. الايدا, ونىڭ الاڭ ورتاسىندا اتقارىپ جۇرگەن قارا جۇمىسىن باعالاماۋ مۇمكىن ەمەس. ەگەر سەنبەسىڭىزدەر, 1/8 فينالدا پورتۋگاليا «سپورتينگىنىڭ» حاۆبەگىنەن اسىپ وتە الماعان حورۆات لۋكا مودريچتەن سۇراڭىزدار. ودان پولشا مەن ۋەلس قۇرامالارىنداعى قارسىلاستارى دا كوپ توسقاۋىل كوردى. پورتۋگال «تىرەك» ويىنشىسىنىڭ كۇش-قۋاتى مەن ىرعاقتى قوزعالىسى ەندى پول پوگبا مەن ونىڭ ارىپتەستەرىن دە بۇعاۋلاۋ ءۇشىن كەرەك بولادى. بۇعان قوسا, سيلۆا فرانتسۋز ءتىلىن وتە جاقسى بىلەدى, سوندىقتان ديدە دەشام شاكىرتتەرىنىڭ ءوزارا نە ايتىسىپ جۇرگەندەرىن دە ءتۇسىنىپ قويادى. «ءۇش تۇستىلەر» كومبيناتسيالارىن بۇزىپ تاستاپ تۇرۋعا وسى جەتكىلىكتى بولار ما ەكەن؟
دەۆيد كروسسان, فرانتسيا (@UEFAcomDavidC)
گريزمانن فاكتورى
گريزمانن پورتۋگالداردىڭ باياۋ جينالاتىن قورعانىس شەبىن بۇزىپ ءوتۋ ءۇشىن تاپتىرمايتىن تۇلعا. فرانتسۋزداردىڭ جەتىنشى ءنومىرلى ويىنشىسى تۋرنيردە بارىنشا جارقىن, ناتيجەلى ويىن كورسەتىپ ءجۇر. ونىڭ جىلدام ويلاپ, جىلدام قوزعالاتىنىن جاستارى تيىسىنشە 32 مەن 33-تەگى ورتالىق قورعاۋشىلار جوزە فونتە مەن پەپەگە ايتارلىقتاي قيىن پروبلەمالار تۋعىزا الادى. كوماندالاستارى ەركەلەتىپ ايتاتىن گريزۋ فورۆارد ءۇشىن كەرەكتى وراسان زور جۇمىستى اتقارا ءجۇرىپ, بۇكىل الاڭدى شارلاپ شىعادى. سوندىقتان ونىڭ قىسىمىنان پورتۋگالدار قۇتىلا المايدى. وعان جيرۋ كۇش قوسقاندا, جاعدايدى ودان بەتەر اۋىرلاتا تۇسەدى.
قورعانىستى قيراتۋشىلار
ءسوز جوق, فرانتسۋزدار فينالدا دوپقا كوبىرەك ەگەلىك ەتەتىن بولادى. ولار گەرمانيامەن ويىنعا قاراعاندا (35%), ۇلەسىن كوپ ارتتىرىپ جىبەرەدى. وسىنىڭ ناتيجەسىندە پوگبا مەن ديميتري پايەنىڭ پورتۋگالداردىڭ ءبىر تارتىپكە باعىنعان قورعانىس شەبىن بۇزىپ شىعۋدىڭ مۇمكىندىكتەرى كوبەيە تۇسەدى. پوگبا تۋرنير بارىسىندا شىڭدالىپ, قارقىنعا قارقىن قوستى, ال جارتىلاي فينالدا جاقسى جاعىنان كورىنە الماعان پايە قاتارىنان ەكى ويىن بويى كولەڭكەدە قالىپ قويمايتىن شىعار.
رونالدۋ يۋمتيتيگە قارسى
شاماسى, فرانتسيا قۇراماسى ءوزىنىڭ قۇرامى جاعىنان پورتۋگاليادان اسىپ تۇسەتىن دە شىعار, بىراق فەرناندۋ ءسانتۋشتىڭ جەڭىنىڭ ۇشىندا رونالدۋ دەپ اتالاتىن كوزىرى بار. ەگەر ەۋروپالىق برازيلدەر كاپيتانىنىڭ ويىنى جاقسى ءجۇرىپ كەتسە, جاقىندا «بارسەلوناعا» الىنعان ساميۋەل يۋمتيتيگە, ءاي, ەشبىر وڭاي تيمەيدى-اۋ.
ەكى قۇراما ويىندارى مەن ولاردىڭ ساپتارىنداعى ويىنشىلارعا قىسقاشا شولۋ جاساپ وتكەن دجو مەن دەۆيد ماۋسىم ايىنىڭ باسىنان بەرى تيىسىنشە پورتۋگاليا جانە فرانتسيا كوماندالارىنىڭ رەپورتەرلەرى بولىپ جۇمىس جاساپ كەلەدى.
دامير قوجامقۇل