تاۋارلارى تەگىن دۇكەندەر

ورال ءوڭىرى اۋماعىندا الىنعان كەز كەلگەن تاۋار ءۇشىن كوك تيىن تولەنبەيتىن تەگىن دۇكەندەر ءجۇ­يەسى اشىلا باستادى. دۇكەن يەلەرى ادامدارعا قايى­رىمدىلىق پەن قامقورلىق جاساۋدى وزدەرىنىڭ باستى مۇراتى دەپ سانايدى. سوندىقتان دا ولار كوپ بالالى, تۇرمىسى تومەن وتباسىلارعا جانە زەينەتكەرلەر مەن مۇگەدەكتەرگە ارنالعان تەگىن دۇكەندەر اشۋدى ءجون كورىپتى. كاپيتاليستىك قوعام سي­پاتىنداعى بۇگىنگى كەزدە ءار­كىمنىڭ جانە ءار وتباسىنىڭ جاي-كۇيى ءارتۇرلى ەكەنى تالاس تۋعىزبايدى. ويتكەنى, ءومىردىڭ جازىلماعان زاڭى سولاي. بارلىق ادامزات وكىلدەرىنىڭ ماتەريالدىق جاعدايى مەن مورالدىق بەت-بەينەلەرى بىردەي بولۋى ەش ءمۇم­كىن ەمەس. بىرەۋ باي, بىرەۋ ورتاشا, بىرەۋ كەدەي بولۋى و باستان تىرشىلىكتىڭ قاعيداسى ىسپەتتەس. وبلىستاعى تەگىن دۇكەندەر جۇيەسى تۇڭعىش رەت زەلەنوۆ اۋدانىندا قۇرىلعان. زەلەنوۆ اۋىلدىق وكرۋگى ارداگەرلەر كەڭەسىنىڭ ءتورايىمى روزا ايتۋ­عانوۆانىڭ ايتۋىنشا, جاڭا باستامانى جوعارىدا اتالعان الەۋمەتتىك توپتار جاتىرقاي قويماپتى. مۇندا باس سۇققان تۇتىنۋشى وزدەرىنە قاجەتتى كيىمدەردى تەگىن الا الادى. ەسكىرە قويماعان, كيۋگە ابدەن جارامدى بۇل كيىمدەر داۋلەتتى ادامدار اراسىنان قابىلدانعان. كوپشىلىك جاعدايدا ولار وزدەرىنەن ارتىل­عان, ءتىپتى, مۇلدەم كيىلمەگەن كيىم­دەردى ءوز ەرىكتەرىمەن اكەلىپ تاپسىرادى ەكەن. تاعى ءبىر ايتا كەتەرلىك ماسەلە, تەگىن تاۋارلار دۇكەنىندە تەك كيىم عانا ەمەس, سونىمەن بىرگە ىدىس-اياقتار مەن تۇرمىستىق تەحنيكالار جانە كىتاپتار مەن اشەكەيلىك بۇيىمدار دا بار ەكەنىنە كوز جەتكىزدىك. ايتالىق, ءوزىمىز كۋا بولعانداي, زەلەنوۆ اۋىلىنداعى تەگىن تاۋارلار دۇكەنىندە زەينەتكەر مەيىرىمى مول جان مادينە قاجىعاليقىزى تاۋار الۋعا تىلەك بىلدىرۋشىلەرگە قاجەتتى قىزمەت كورسەتۋدى ادەتىنە اينالدىرىپتى. سونداي-اق, اتالعان اۋىلدىق وكرۋگتىڭ اكىمى ىزعالي داۋلەتوۆ تەگىن تاۋارلار دۇكەنىنە ەكى ءبول­مە بولىنگەنىن ايتىپ بەردى. مۇن­دايدا بارەكەلدى دەمەگەندە نە دەمەكپىز؟! تەمىر قۇسايىن, «ەگەمەن قازاقستان» باتىس قازاقستان وبلىسى, زەلەنوۆ اۋدانى