بۇرناعى كۇنى تۇندە فرانتسيادا ءوتىپ جاتقان فۋتبولدان ەۋروپا چەمپيوناتىنىڭ فينالدىق ماتچىنا قاتىساتىن ەكىنشى قۇرامانىڭ اتى بەلگىلى بولدى. مۇنداي قۇرمەتكە گەرمانيانى 2:0 ەسەبىمەن جەڭىپ كەتكەن فرانتسيا كومانداسى يە بولدى. ءسويتىپ, جارتىلاي فينالدىق ەكى كەزدەسۋ بىردەي ەسەپپەن اياقتالدى. فرانتسۋزدار ساپىنداعى انتۋان گريزمانن بۇل ويىندا ءوز جاماعاتىنىڭ ەكى دوبىنىڭ دا اۆتورى اتانىپ, بىرىنشىلىكتە سوققان گولدارى سانىن 6-عا جەتكىزدى.
ەكىنشى جارتىلاي فينالدىق ويىن وينالار الدىندا ونىڭ قورىتىندى ناتيجەسى جايىندا الۋان ءتۇرلى پىكىرلەر ايتىلدى. سونىڭ ىشىندە بۇل جولى الاڭ يەلەرىنىڭ بارىن سالاتىنىن ايتىپ, ماتچتىڭ ناتيجەسىنە الاڭداۋشىلىق بىلدىرگەن گەرمانيا قۇراماسىنىڭ باس جاتتىقتىرۋشىسى يواحيم ءليوۆتىڭ ويى دا بولدى. دەگەنمەن, ساراپشىلاردىڭ باسىم بولىگى نەمىستەردىڭ مەرەيلەرى ۇستەم شىعاتىنىنا ونشالىقتى كوپ كۇمان كەلتىرە الماپ ەدى.
قازىر ماماندار فينالدىق ماتچ سالماعىن ارقالاعان كەزدەسۋ رەتىندە باعالاعان بۇل ۇشىراسۋعا كوماندالار بىردەي دەرلىك ويىندار ناتيجەلەرىمەن كەلدى. ايتالىق, گەرمانيا توپتا ۋكراينانى (2:0), سولتۇستىك يرلانديانى (1:0) ۇتىپ, پولشامەن تەڭ ءتۇسىپ (0:0), 1/8 فينالدا سلوۆاكيانى جەڭسە (3:0), 1/4 فينالدا يتاليامەن يتجىعىس تۇسكەننەن كەيىن (1:1) پەنالتي سەرياسىندا 6:5 ەسەبىمەن العا شىعىپ ەدى. فرانتسيانىڭ ۇلەسىنە توپتاعى رۋمىنيانى (2:1), البانيانى (2:0) تىزە بۇكتىرىپ, شۆەيتساريامەن تەپە-تەڭ (0:0) ءتۇسۋ, سوسىن 1/8 فينالدا يرلانديانى (2:1), 1/4 فينالدا يسلانديانى (5:2) جەڭۋ ءتيدى.
ەكى كوماندا كۇنى بۇگىنگە دەيىن ءبىر-بىرلەرىمەن 13 رەت ۇشىراسسا, سونىڭ 7-ىندە فرانتسۋز, 4-ىندە نەمىس جاساقتارى ۇتىپ, 2 كەزدەسۋ بەيبىت بىتكەن. بۇل ويىنداردىڭ 2014 جىلعى 4 شىلدەدە الەم چەمپيوناتى شيرەك فينالىنداعى شايقاسىنان باسقاسى تۇگەل جولداستىق كەزدەسۋلەر بولىپ شىقتى. سول ماتچتا نەمىستەر 1:0 ەسەبىمەن ۇتىپ شىقسا, ەڭ سوڭىنان وتكەن 2015 جىلعى 13 قاراشا كۇنگى جولداستىق كەزدەسۋدە فرانتسۋزدار 2:0 ەتىپ جەڭىپ كەتكەن بولاتىن. ەندى ناقتى ەسەپتى كەزدەسۋگە كەلسەك, وندا الماندار جاعىنىڭ پروبلەمالارى كوپتەۋ كورىندى. فرانتسۋزدار باپكەرى ديدە دەشام سونىڭ الدىندا يسلانديا جاماعاتىن تالقانداپ شىققان قۇرامعا وزگەرتۋ ەنگىزە قويعان جوق. ال ءۇش بىردەي نەگىزگى ويىنشىسى الاڭعا شىعا المايتىن بولعاندىقتان, يواحيم ليوۆكە ءبىراز باس قاتىرۋعا تۋرا كەلدى. ونىڭ ويلانا كەلىپ تاپقانى مۇنىڭ الدىنداعى ءۇش قورعاۋشىمەن ويناۋ جۇيەسىنەن باس تارتىپ, قورعانىس شەبىن ءتورت ويىنشىمەن جاساقتاۋ بولدى. وسىنىڭ سىڭايىندا شابۋىلدىڭ وتكىر شەبىندەگى جاراقات الىپ قالعان ماريو گومەستىڭ ورنىنا توماس ميۋللەردى جىلجىتتى. الاڭ ورتاسىنداعى بايلانىستىرۋشى جەلىنىڭ تىزگىنىن باستيان شۆاينشتايگەر مەن ەمرە دجان ۇستادى.
ماتچ الاڭ يەلەرىنىڭ قارقىندى شابۋىلىمەن باستالدى. سول ساتتەردە الاڭ يەلەرىنىڭ باستى «قارۋى» – انتۋان گريزمانن گول سوعۋدىڭ مۇمكىندىگىن جىبەرىپ الدى. ونىڭ قارسى قاقپا ماڭىندا بلەز ماتيۋيديمەن بىرگە جاساعان شىر كوبەلەك شەڭبەرىن مانۋەل نويبەر عانا زالالسىزداندىرىپ ۇلگەردى. وسىمەن العاشقى 10 مينۋتتىڭ ىشىندەگى ەكپىن باسىلىپ قالدى. سول كەزدە بارىپ وزدەرىنىڭ الەم چەمپيوندارى ەكەندەرى ەستەرىنە تۇسكەن گەرمانيا قۇراما كومانداسىنىڭ ويىنشىلارى العا قاراي شولعىنشىلىق جورىقتارعا دەن قويا باستادى. وسى تۇستا باسەكەلەستەرىمەن بەتپە-بەت كەلگەن دجان ءالسىن-ءالسىن ولاردان ۇستەم شىعىپ تۇردى. سول جارتىلاي قورعاۋشى اقىرىندا ميۋللەردى قولايلى جەرگە شىعارىپ بەردى. بىراق توماس ارقىراتا اتقان دوبىن بار بولعانى قاقپانىڭ جانىنان عانا جىبەرە الدى.
كوپ ۇزاماي وسى «ەۋرونىڭ» باستى الىستان سوققىشى ديميتري پايە مەرگەندىگىمەن تانىلا جازدادى. الايدا, ونىڭ اياعىنان زىمىراي ۇشقان دوپ نويەردى بىردەن تاۋىپ الدى. بۇعان ارتىنشا شۆاينشتايگەر قارسى جاۋاپ قايتاردى. ونىڭ ۇرعان دوبى الدىنان ۋگو لوريس تابىلا كەتتى. ال تايم سوڭىندا جانجالعا اپارىپ سوقتىرعان, ناتيجەسىندە ويىن قورىتىندىسىنا ناقتىلاي ىقپالى بولعان وقيعا ورىن الدى. بۇرىشتامادان پاتريس ەۆرانىڭ تاستاعان دوبىنا تالاستا شۆاينشتايگەر وعان قولىنىڭ ۇشى ءتيىپ كەتكەندەي بولدى. ويىن جالعاسا بەرگەن. بىراق ارادا بىرەر سەكۋند وتكەسىن يتاليان ءاربيترى نيكولا ريتستسولي ونى توقتاتىپ, «نۇكتەنى» كورسەتتى. مۇنى نەمىستەر وتە اۋىر قابىلدادى. مەسۋت وزيل دوپتى الىپ, تريبۋناعا قاراي اتىپ جىبەردى. پەنالتيدى سوعۋدى ءوز مىندەتىنە العان گريزمانن بولسا, نويەردى ءبىر جاققا قۇلاتىپ, دوپتى ەكىنشى بۇرىشقا توپ ەتكىزدى.
ەكىنشى تايمنىڭ باسىن دا فرانتسۋزدار نەمىستەرگە بەرە قويمادى. سول شابۋىل يىنىندە وليۆە جيرۋ ءوزىنىڭ الدىنداعى گريزماننعا دوپ جەتكىزىپ بەردى. ال انتۋاننىڭ ۇرعان دوبىنىڭ جولىنان جەروم بواتەنگ تابىلا قالدى. ويىندى ءوز قولدارىنا الۋعا ۇمتىلعان نەمىستەر قانشاما قاتەلىكتەرگە بوي الدىرا ءجۇرىپ, اقىرىندا دەگەندەرىنە جەتتى. بىراق قاقپاعا تۋرا قاۋىپ توندىرەر سوققى جوققا ءتان. گەرمانيا قۇراماسى مۇنىڭ الدىندا يتالياندارمەن ويىن كەزىندە باستان كەشكەن داعدارىستارىنا تاعى دا ۇرىنا باستادى. ولاردىڭ سورىنا قاقپاشى الاڭىندا تالاي قاۋىپتىڭ بەتىن قايتارىپ كەلگەن بواتەنگ وسى كەزدە ويلاماعان جەردەن جاراقات الىپ قالىپ, الاڭنان كەتۋگە ءماجبۇر بولدى. ونى الماستىرعان شكودران مۋستافي ارىپتەسىنىڭ ورنىن باسپاق تۇرماق, قايتا كومانداعا سور بولىپ كەلدى. ويىننىڭ 72-مينۋتىندا سوعىلعان ەكىنشى گولدا تاپ وسى قورعاۋشىنىڭ ولشەۋسىز ۇلەسى بار. قاقپا الاڭى ىشىندە ءدال الدىندا تۇرعان دوپتان ايىرىلىپ قالعان ونى پول پوگبا ادەمى الداپ ءوتتى دە, ورتاڭعى تۇسقا پاس جونەلتتى. دوپقا بارىنەن بۇرىن جەتكەن گريزمانن ونى اياعىنىڭ ۇشىمەن سىلتەي سالىپ, قاقپانىڭ تورىنان ءبىر-اق شىعاردى.
2:0 دەگەن ەسەپ بۇل ويىندا قورعانىس شەبىن شۇرىق-تەسىك ەتىپ العان «نەمىس ماشيناسىنا» بەرىلگەن ۇكىم ىسپەتتەس. گەرمانيا ويىنشىلارى بۇدان كەيىن دە جاعدايدى تۇزەتپەك بولىپ قانشا ۇمتىلعاندارىمەن, ودان قيسىندى قورىتىندى شىعارا المادى. سەبەبى, ولاردىڭ ويىنىندا قارسىلاسىن توسىن ارەكەتىمەن الداپ تۇسىرەتىن تىڭ تاكتيكالىق شەشىمدەر بولعان جوق.
10 شىلدە كۇنى وينالاتىن فينالدا فرانتسيا – پورتۋگاليا كەزدەسەدى.
سەرىك ءپىرنازار,
«ەگەمەن قازاقستان»