15 جىلدان بەرى حالىققا قالتقىسىز قىزمەت كورسەتۋدە
قازاقستان ۇلتتىق تەلەراديو حابار تاراتۋشىلار قاۋىمداستىعى قوعامدىق ۇيىمنىڭ جاڭا پرەزيدەنتىن سايلادى.
قازاقستان ۇلتتىق تەلەراديو حابار تاراتۋشىلار قاۋىمداستىعى ەلىمىزدىڭ تاۋەلسىز بۇقارالىق اقپارات قۇرالدارىنىڭ, ونىڭ ىشىندە رەسپۋبليكا كولەمىندەگى جەكەمەنشىك تەلەراديو ۇيىمدارىنىڭ قىزمەتىنە قولداۋ كورسەتەتىن ءارى ول ۇيىمعا وزدەرى مۇشە بولىپ كىرەتىن بىردەن-ءبىر قوعامدىق ۇيىم. قاۋىمداستىق 2001 جىلى ەلىمىزدىڭ ماسس-مەديا سالاسىندا العاش تانىمال بولا باستاعان «31 ارنا» ترك (الماتى), «وتىرار» تك (شىمكەنت), «قوعام» تك (قىزىلوردا) جانە باسقا دا تەلەراديو كومپانيالاردىڭ باستاماسىمەن ۇجىمداسىپ, كەڭەسىپ قۇرىلعان ەدى.
وتكەن 15 جىلدىڭ ىشىندە بۇل قوعامدىق ۇيىم قازاقستاننىڭ تەلەراديو حابار تاراتۋ كەڭىستىگىندە تاۋەلسىز تەلەارنالاردىڭ زاڭ ءجۇزىندەگى كەپىلدى قىزمەتىن ۇيلەستىرۋدە, مەملەكەتتىك باسقارۋ ورگاندارىمەن قارىم-قاتىناستا قاۋىمداستىق مۇشەلەرىنىڭ مۇددەسىن قورعاۋدا, جاڭادان وتاۋ تىككەن تاۋەلسىز تەلەراديو ستانسالارعا اقپاراتتىق-قۇقىقتىق قولداۋ كورسەتۋدە, ماركەتينگتىك قىزمەتتە, تەلەراديو جارنامالارىنىڭ اۋقىمىن زەرتتەۋ سالاسىندا ەداۋىر تياناقتى جۇمىستار اتقاردى. بارلىق شىعارماشىلىق ۇيىمداردىڭ كاسىبي تۇرعىدان بىلىكتىلىگىن ارتتىرۋعا زور ۇلەس قوستى. وسى جىلدار ىشىندە قاۋىمداستىقتىڭ قاتارى تولىعىپ, قازاقستانداعى جەكەمەنشىك تەلەراديو كومپانيالار سانى 22-گە جەتكەنىن ايتا كەتكەن دە ابزال. قازىرگى ۋاقىتتا جوعارىداعى اتالعان تاۋەلسىز تەلەارنالارمەن ءبىر ساپتا تۇرعان تۇركىستاندىق «تۇران-تۇركىستان» تك (مۇرات بەكباەۆ), قوستانايلىق «الاۋ-تV» (كاتەرينا تۋتوۆا), سەمەيلىك «بايۋاقوۆ-تV» (وماربەك بايۋاقوۆ), قاراعاندىلىق «جاڭا تV» (ولەگ نيكونوۆيچ), ارىستىق «ارىس ارنالارى» تك (ماحامبەت تولەبەكوۆ) جانە باسقالارى بەلسەندى قىزمەت اتقارىپ كەلەدى. بۇل كومپانيالاردىڭ بۋىنى قاتايىپ, كاسىبي شەبەرلىگىنىڭ شىڭدالعانىنا ولاردىڭ بۇگىنگى تاڭداعى كۇندەلىكتى اۋە تولقىندارى ارقىلى تاراتىپ وتىرعان جاڭالىقتارى مەن كورسەتىلىمدەرى ايعاق. ەلىمىزدىڭ باس تەلەارناسى «قازاقستان» مەن «حاباردان» باستاپ بىرقاتار بەدەلدى تەلەكومپانيالاردا قىزمەت ىستەپ ءجۇرگەن كوپتەگەن بەلگىلى جۋرناليستەر مەن بەينەوپەراتورلاردىڭ, بەينەينجەنەرلەردىڭ ءبىر كەزدە وسىناۋ جەرگىلىكتى تاۋەلسىز تەلەارنالاردا العاشقى قادامىن باستاعانى دا كوپ جايتتان حابار بەرسە كەرەك. بۇل جەكەمەنشىك تەلەستانسالاردىڭ دەنى قازىرگى زامانعى تەحنيكالىق قۇرال سايماندار مەن اۋديو-بەينە جابدىقتاردى پايدالانادى. ساندىق تەلەۆيزيانىڭ ومىرگە دەندەپ ەنۋى جاڭا تالپىنىستارعا جەتەلەۋدە. ورال مەن بالقاشتاعى, وسكەمەن مەن اقتوبەدەگى, اقتاۋ مەن پەتروپاۆلداعى, سايرام مەن تارازداعى, ەسىك پەن تالعارداعى تاۋەلسىز تەلەراديو ستانسالار تۋرالى دا وسىنداي جاعىمدى پىكىر ايتۋ ورىندى.
وسىعان وراي جەرگىلىكتى كومپانيالاردا, سونداي-اق, قاۋىمداستىقتىڭ باس كەڭسەسى ورنالاسقان الماتىدا تەلەراديو ماماندارىمەن ترەنينگ-رەزيدەنتسيالار, بايقاۋلار, فەستيۆالدار وتكىزۋ ءداستۇرى بار. وندا الەمنىڭ, قازاقستاننىڭ بەلگىلى جۋرناليست ماماندارى مەن تانىمال قۇقىق قورعاۋشىلارى, مەنەدجەرلەرى ءدارىس وقىدى. مەزگىل-مەزگىل اۋماقتاردا كونتەنتتىك ساراپتامالار جاسالىنىپ تۇرادى. وسى جىلدار ىشىندە قاۋىمداستىقتىڭ بىرقاتار شەت مەملەكەتتەردە (رەسەي, اقش, گرۋزيا, تۇركيا, چەحيا, قىرعىزستان, تاجىكستان, تاعى دا باسقا ەلدەر) كوشپەلى شىعارماشىلىق جيىندار وتكىزىپ, ءوزارا تاجىريبە الماسقانىن دا ايتا كەتكەن ءجون.
ءبىر سوزبەن ايتقاندا – قازاقستاننىڭ تاۋەلسىزدىك جىلدارى وتاۋ قۇرىپ, ەلىمىزدىڭ دامۋى ساتىلارىنىڭ جۇگىن بىرلەسە كوتەرىسىپ, ءوزى دە قاتار ءوسىپ-وركەندەگەن ۇلتتىق قاۋىمداستىق ۇلى كوشكە قال-قادەرىنشە ۇلەس قوسىپ كەلەدى ءارى بولاشاقتا دا مەيلىنشە قوسا بەرەتىنى داۋسىز.
ءسوز سوڭىندا ۇلتتىق قاۋىمداستىقتىڭ جاڭا پرەزيدەنتى تۋرالى ازىن-اۋلاق مالىمەت ۇسىنعاندى ءجون سانادىق. شاكيزادا ابدىكارىموۆ – قازاقستانعا جانە تەلەۆيزيا سالاسىنداعى بىلىكتى مەنەدجەرلىك قىزمەتى ارقىلى جاقسى تانىمال بەلگىلى جۋرناليست, ۇلگىلى باسشى. بىرنەشە جىر جيناقتارىنىڭ اۆتورى, جىگەرلى اقىن. «ەرەن ەڭبەگى ءۇشىن» مەدالى مەن «قۇرمەت» وردەنىنىڭ يەگەرى, قىزىلوردا وبلىستىق ءماسليحاتىنىڭ دەپۋتاتى. اۋماقتاعى 400 مىڭداي كورەرمەنى بار تاۋەلسىز «قوعام-تV» تەلەارناسىنىڭ باس قۇرىلتايشىسى. سوڭعى وتكەن باسقارما جيىنىندا قازاقستانداعى تاۋەلسىز 22 تەلەرنانىڭ باسشىلارى بەلسەندى ازاماتتان قاۋىمداستىقتىڭ الداعى ۋاقىتتا مەملەكەتتىك ۇيىمدارمەن بىرلەسە, ىنتىماقتاسا قىزمەت اتقارۋدا تاۋەلسىز تەلە-راديو حابارلارىن تاراتاتىن ستانسالاردىڭ جۇمىسىن ودان ءارى جانداندىرادى دەگەن زور سەنىم ارتتى. سول سەبەپتى دە شاكيزادا ابدىكارىموۆتى قازاقستان ۇلتتىق تەلەراديو حابار تاراتۋشىلار قاۋىمداستىعىنىڭ پرەزيدەنتىنە ۇزاق مەرزىمگە ءبىراۋىزدان سايلادى. ءسويتىپ, جاڭا باسشىنىڭ ۇلتتىق قوعامدىق قاۋىمداستىق جۇمىسىنا كاسىبي تۇرعىدا شىعارماشىلىق جاڭا لەپ اكەلەتىنىنە ءۇمىت ارتىپ وتىر.
تالعات ءسۇيىنباي,
«ەگەمەن قازاقستان»
الماتى