ارىسىن ارداقتاعان ەكسپەديتسيا
بۇعان دەيىن دە تالاي باعالى باستامالارعا مۇرىندىق بولعان قازاق گەوگرافيالىق قوعامى ەل تاۋەلسىزدىگىنىڭ شيرەك عاسىرلىق تويىنا ارنالعان «ەكسپەديتسيا-25» اتتى بىرەگەي جوبانى جۇزەگە اسىرۋعا كىرىستى.
استانا كۇنى مەرەكەلەنىپ جاتقان شات-شادىمان شاقتا اتتانىپ كەتكەن اۆتوساياحاتشىلار بيىل يۋنەسكو اياسىندا 150 جىلدىعى اتالىپ وتپەكشى الاشتىڭ اياۋلى تۇلعاسى ءاليحان بوكەيحانوۆتىڭ ونەگەلى ءومىر جولىمەن بايلانىستى تاريحي-تانىمدىق تاعىلىمى مول مەكەندەردى 108 كۇننىڭ ىشىندە ارالاپ شىقپاق. بۇل مەجە بەكەر بەلگىلەنىپ وتىرعان جوق. ءويتكەنى, اتالمىش قوعامدىق بىرلەستىكتىڭ العان بەتىنەن قايتپايتىن قايسار ازاماتتارى ىلگەرىدە ىلكىمدىلىكپەن 108 ساعاتتا وڭتۇستىك ءپوليۋستى باعىندىرىپ, گيننەستىڭ رەكوردتار كىتابىنا كىرگەن ەدى.
«وسى جولعى ەكسپەديتسيامىز ەڭ الدىمەن ىشكى ءتۋريزمدى دامىتۋعا باعىتتالىپ وتىر. التاي مەن اتىراۋ اراسىنداعى ۇشقان قۇستىڭ قاناتىن تالدىراتىن ۇلان-عايىر دالامىزدا تابيعاتتىڭ ءالى اشىلماعان تىلسىم سىرلارى جەتەرلىك. ءار ءوڭىردىڭ وزىندىك ەرەكشەلىگى بار. ولاردىڭ ءبارى بىردەي كوپشىلىك كوزايىمىنا اينالىپ ۇلگەرمەگەنى انىق. سەبەبى, سۇلۋلىعى كوز سۇرىندىرەر كورىكتى جەرلەر ادام اياعى جەتە بەرمەيتىن ايماقتاردا ورنالاسقان. سولاردى تاماشالاپ, تامسانىپ قانا قويماي, كورگەن-بىلگەندەرىمىز بەن كوڭىلگە تۇيگەندەرىمىزدى قاعازعا, كينوتاسپاعا تۇسىرمەكپىز. سونداي-اق, الاشوردا كوسەمىنىڭ ىزىمەن ءجۇرىپ, تىڭ دەرەكتەر ءىزدەمەكپىز», دەيدى «قازاق گەوگرافيالىق قوعامى» قب جوبالارىنىڭ جەتەكشىسى ماعجان ساعىمباەۆ ماسەلەنىڭ ءمان-جايىن ءتۇسىندىرىپ.
ەكسپەديتسياعا قاتىسۋشىلار الدىمەن ءا.بوكەيحانوۆتىڭ كىندىك قانى تامعان اقتوعايعا, سونان سوڭ قارقارالى مەن سەمەيگە بارادى. ودان كەيىن ەكسپەديتسيا ەكى باعدار بويىنشا ءبولىنىپ كەتەدى. العاشقى توپتاعىلار ءوز ەلىمىزدىڭ تۇكپىر-تۇكپىرىنە ساياحات جاساپ, تابيعي قورلارمەن, ساۋلەتتى ەسكەرتكىشتەرمەن, ابات باقتارمەن تانىسادى.
ال ەكىنشى باعىتتاعىلار بولسا, ومبى, سانكت-پەتەربۋرگ, مينسك, سامارا, ورىنبور, ءماسكەۋ سياقتى الەكەڭنىڭ تاعىلىمدى تاعدىرىنا تىكەلەي قاتىسى بار قالالارعا اتباسىن بۇرماق. ءسويتىپ, قازاق تىلىندەگى تۇڭعىش گەوگرافيا وقۋلىعىنىڭ اۆتورىنا وزدەرىنىڭ قۇرمەتىن بىلدىرمەك.
2010 جىلى اڭسارلارى ساياحاتقا اۋىپ تۇراتىن ەنتۋزياست ادامداردىڭ قالاۋىمەن قۇرىلعان قازاق گەوگرافيالىق قوعامىنىڭ باستى ماقساتى تابيعات پەن قوعام تۋرالى عىلىمداردىڭ جانە گەوگرافيانىڭ دامۋىنا ۇلەس قوسۋ, عىلىمي جەتىستىكتەردى ناسيحاتتاۋ, ءبىلىم سالاسىنداعى شىعارماشىلىققا جول اشۋ, الەمدى تانىپ بىلۋگە مۇمكىندىك تۋدىرۋ بولىپ تابىلادى. ولاي بولسا, ولاردىڭ قولعا العان مىنا جوسپارى دا ويداعىداي ورىندالاتىنىنا سەنىمىمىز مول.
تالعات باتىرحان,
«ەگەمەن قازاقستان»