...قولداۋ كورسەتەدى
رۋحاني ازىققا قامقورلىق
بۇگىنگى تاڭدا تۇرمىسى تومەن وتباسىلارعا, مۇمكىندىگى شەكتەۋلى جاندارعا ەلىمىزدە سان ءتۇرلى شارا جۇزەگە اسىرىلىپ جاتقانى بەلگىلى. وسىنداي جارقىن ىستەر اقجايىق اۋدانىنىڭ العاباس اۋىلىندا دا از ەمەس. قولدان كەلگەن كومەككە ايانباۋدان, ساۋابى مول ىسكە اتسالىسۋدان مىسال جەتكىلىكتى.
– اۋداندىق ءماسليحات دەپۋتاتى, «قادەش» شارۋا قوجالىعىنىڭ مۇشەسى دارىن بورانباەۆ تابىسى از اعايىنعا رۋحاني ازىقپەن قامقورلىق جاساۋدى ۇيعاردى, –دەيدى العاباس اۋىلدىق وكرۋگى اكىمى اپپاراتىنىڭ جەتەكشى مامانى ۇلبولسىن مۇقاناليەۆا. – ياعني, 7 وتباسىنى مەملەكەتتىك ساياساتتى ناسيحاتتايتىن باستى باسىلىم – «ەگەمەن قازاقستانعا» جازىلىمدى حاتتاۋعا 25 مىڭ تەڭگە اقشاسىن شىعاردى. اۋىلداستارىن گازەت-جۋرنالعا جازدىرتۋ ءجونىندە جاناشىرلىق بارلىق جەردەگىدەي العاباستا دا از ەمەس.
بولات قوسجان ۇلى
باتىس قازاقستان وبلىسى,
اقجايىق اۋدانى
...سەنىم ارتادى
جول جوندەلسە دەيمىز
1991 جىلى سەمەي پوليگونى جابىلعان سوڭ, ابىرالى اۋدانى قايتا قۇرىلدى. ال 1992 جىلى ەلباسى بەكىتكەن «سەمەي يادرولىق سىناق پوليگونىنداعى يادرولىق سىناقتار سالدارىنان زارداپ شەككەن ازاماتتاردى الەۋمەتتىك قورعاۋ تۋرالى» زاڭ قابىلداندى.
بۇگىنگى تاڭدا ابىرالى جۇرتى ۇكىمەتتىڭ ءتۇرلى باعدارلامالارىنا بايلانىستى قابىلداعان جوبالاردىڭ كومەگىن كورىپ وتىر. دەسەك تە قازىرگى تاڭداعى ەڭ باستى دا وزەكتى ماسەلە جول دەر ەدىك. قاينار – سەمەي تاسجولى 280 شاقىرىمدى قۇرايدى. ول رەسپۋبليكالىق دەڭگەيدەگى ەڭ ماڭىزدى كۇرە جولداردىڭ ءبىرى. سەمەي – قاينار تاسجولى ارقىلى 3 وبلىستىڭ – شىعىس قازاقستان, قاراعاندى, پاۆلودار حالقى قارىم-قاتىناس جاسايدى. استانا مەن سەمەيگە وسى جەرمەن ءجۇرۋ كەزىندە ءتيىمدى بولعان. ونىڭ بويىندا اباي اۋدانىنا قاراستى سارجال, قىزىلتۋ اۋىلدارى, بۇرىنعى شۇبارتاۋ اۋدانىنىڭ اۋىلدارى مەن ابىرالى اۋدانىنا قاراستى التى اۋىل ورنالاسىپ, ءبىر-بىرىمەن وسى جول ارقىلى قاتىناس جاسايدى. وڭىردە تەمىرجول, اۋە قاتىناسى مەن سۋ قاتىناسى اۋەلدەن بولعان ەمەس. بارلىق تىرشىلىك, قارىم-قاتىناس تىكەلەي وسى تاسجول ارقىلى جاسالادى. بۇگىندە سەمەي-قاينار تاسجولى مۇلدەم جۇرۋگە جارامسىز, سىن كوتەرمەيدى. وسى اتالعان ءىس-شارا قولعا الىنسا, اۋىل تۇرعىندارى اتىنان الدىن-الا ريزاشىلىعىمىزدى بىلدىرەر ەدىك.
نۇرقاسىم اجىتاەۆ
شىعىس قازاقستان وبلىسى,
قاينار اۋىلى
...ۇلگى تۇتادى
ءىستىڭ تەتىگى ەندى تابىلدى
قاراسۋ اۋدانىنىڭ جەكە كاسىپكەرى اتانىپ ۇلگەرگەن جولدىباي وسۋپوۆ 15 جىلدىق ەڭبەك ءوتىلى بار اياق كيىم تىگۋ شەبەرى. ول بيزنەسمەن دەگەن مارتەبەگە ەندى عانا بوي ۇيرەتۋدە. ويتكەنى, اياق كيىم جوندەۋگە ارنالعان جەكە شەبەرحاناسىن جاقىندا عانا اشقان. بۇعان دەيىن جولدىبايعا اۋىلداستارى تەلەفون شالۋ ارقىلى تاپسىرىس بەرەتىن, سودان كەيىن ول قوڭىراۋ كەلىپ تۇسكەن ۇيلەردى ارالاي ءجۇرىپ, ب ۇلىنگەن اياق كيىمدەردى ۇيىنە جيناپ الىپ كەلەدى. ونىڭ بۇل تالانتى اۋداندىق اكىمدىككە دە, كاسىپكەرلەر پالاتاسىنا دا جەتتى. ءسويتىپ, قاراسۋدا اياق كيىم جوندەيتىن ءبىر دە ءبىر شەبەرحانا بولماعاندىقتان, جولدىبايعا وسى ولقىلىقتىڭ ورنىن تولتىرۋعا ۇسىنىس جاسالدى. ول «بيزنەستىڭ جول كارتاسى-2020» باعدارلاماسى بويىنشا گرانتقا ءوتىنىش ءبىلدىرىپ, 660 مىڭ تەڭگە قاراجاتقا يە بولدى. ونى ول تىگىن ماشيناسى جانە باسقا دا قاجەتتى قۇرال-جابدىقتار ساتىپ الۋعا جۇمسادى.
«قازىر دۇكەن عيماراتىنان ءبىر ءبولمەنى جالعا الىپ وتىرمىن. ەندى كليەنتتەرگە ءوزىم بارمايمىن, ولار ماعان كەلەدى. بۇدان ەل اياعى ازايعان جوق, جۇرت جاڭا شەبەرحانا بارىن ءبىلىپ العان, كۇنىنە 5-6 ادامنان كەلەدى. بۇل تابىسى جىل ون ەكى اي بويى ءتۇسىپ تۇراتىن ماماندىق», – دەيدى جولدىباي وسۋپوۆ.
اباي بولسىنوۆ
قوستاناي وبلىسى
...ريزاشىلىعىن جەتكىزەدى
شيپاگەر شاپاعاتى
جاقىندا وڭتۇستىك قازاقستان وبلىسى, سارىاعاش اۋدانى, دەربىسەك اۋىلىنداعى ءبىر ەمشى تۋرالى ەستىپ, بارىپ قايتتىم. العاشقى كۇندەرى ەمشى نۇرداۋلەت جۇمادىلداەۆقا كۇمانمەن قاراپ, «مەن ءسىزدىڭ قولىڭىزدىڭ بيوتوگى بار ەكەنىنە سەنبەيمىن», دەپ اشىق ايتتىم. ەمشىنىڭ بۇل جونىندە ارنايى ديپلومى بار ەكەن. ايتسە دە مەنىڭ كوزىمدى جەتكىزبەك بولىپ ول ۇستەل ۇستىندەگى گرادۋسنيكتى قولىنا الىپ ەدى, بەس مينوتتەن كەيىن الگى گرادۋسنيكتىڭ جىلۋى 39-عا جەتتى. سوسىن قولىن باۋىرىمنىڭ تۇسىنا قويدى. قولى تيگەن جەرى كادىمگىدەي ىسىپ, قىزا جونەلدى. ءومىر بويى پارتيا قىزمەتىندە بولىپ, اتەيستىك ءتاربيە العاندىقتان مۇنداي قۇبىلىسقا ەش سەنبەيتىنمىن. ەمشى نۇرداۋلەتتىڭ بۇل قاسيەتى كۇمانىمنىڭ ءبارىن جوق قىلدى.
نۇرداۋلەتتىڭ تاعى ءبىر قاسيەتى وتە سابىرلى, اسىقپايدى. ول ءبىر رۋحتىڭ جەلەپ-جەبەپ, تىلسىم كۇشكە يە بولاتىنىن, ەركىنەن تىس ارەكەتكە بارمايتىنىن, ءبارىن تەك ايان ءبىلدىرۋ ارقىلى ورىندايتىنىن ايتادى. قازىر سوناۋ قوستاناي, اقمولا, الماتى, جامبىل وبلىستارىنان كورشى وزبەكستان, قاراقالپاقستان ەلدەرىنەن كەلىپ ەمدەلۋشىلەر بار. ءوزىم ەمدەلگەن ءبىر ايدىڭ ىشىندە 17 كىسىنىڭ ءارتۇرلى كەسەلىنەن جازىلىپ, ۇيلەرىنە ك ۇلىپ-ويناپ قايتىپ بارا جاتقانىن كورىپ, نۇرداۋلەت ەمشىگە دەگەن سەنىمىم بەكي ءتۇستى. سارىاعاش اۋدانى, قارابۇلاق اۋىلىنىڭ تۇرعىنى سالاۆار ابدىحالىققىزىنىڭ سال بوپ قالعانىنا ءبىراز جىلدىڭ ءجۇزى بولعان ەكەن, 20 كۇن ەم العان ول ۇيىنە ءبىر تاياققا سۇيەنىپ, ءوز اياعىمەن قايتتى. وسى حاتتى نۇرداۋلەت ەمشىنىڭ شاپاعاتىن كورگەن جان رەتىندە باسقالارعا دا شيپاسى تيە بەرسىن دەگەن نيەتپەن جازىپ وتىرمىن. «اۋرۋدى بەرگەن اللا ەمىن دە بەرەدى», دەگەن. لايىم وسى ءسوز ومىردەن ءوز كورىنىسىن تاپسىن.
قامباربەك ىڭكاربەك ۇلى,
سوعىس جانە ەڭبەك ارداگەرى
جامبىل وبلىسى
...ءسۇيسىنىس بىلدىرەدى
بالالار «اقبوبەكتە»
قاۋىشتى
قارعالى وزەنىن اقتوبە قالاسىنىڭ تۇرعىندارى ماقتانىش تۇتادى. قالامەن ىرگەلەس اعىپ جاتقان وزەن ماڭى جانعا جايلى, تابيعاتى كوركەم ەرەكشە جەر. وسى ءبىر تۇمسا تابيعات اياسىندا «اقبوبەك» بالالار دەمالىس لاگەرى ورنالاسقان. جازدىڭ باستالۋىن كۇتكەن بالالار سوندا بارۋعا اسىعادى. ولار ءۇشىن ەڭ قىزىقتى دا دۋماندى شاق ەندى باستالعانداي. ءبىر-بىرىمەن جاقىن تانىسىپ, دوستاسىپ تا ۇلگەرگەن. لاگەر اۋلاسى مۇنتازداي تاپ-تازا, جاسىل جەلەك جايقالىپ تۇر. بۇل جەردە قالانىڭ ادامدى مەزى ەتەر ۋ-شۋىنان الىستاپ, جۇتقان ءبىر جۇتىم اۋانىڭ دا بالداي ءتاتتى ءدامىن سەزىنگەندەي بولاسىڭ. لاگەردىڭ اشىلۋ سالتاناتىنا بالالاردىڭ اتا-انالارى دا كوپ جينالدى. جينالعاندار الدىندا بالالار مەن ولاردىڭ تالىمگەرلەرى ءوز ونەرلەرىن كورسەتىپ, ءتۇرلى ويىندار وتكىزدى. ادەمى اۋەن ىرعاعىندا تالىمگەرلەر دە بي بيلەپ بەردى. كىشكەنتاي بالۋاندار ءوز ونەرلەرىن كورسەتسە, پاركتىڭ نۇسقاۋشىلارى شەبەرلىك سىنىبىن ءوتكىزىپ كوپشىلىكتى ءتانتى ەتتى. ءان مەن جىرعا, بيگە تولى وتكەن لاگەردىڭ العاشقى ماۋسىمىنىڭ اشىلۋ سالتاناتى دەمالۋعا كەلگەن بالالاردىڭ ەسىندە ۇزاق ۋاقىت بويى ساقتالىپ قالاتىنداي اسەرلى ءوتتى.
يرينا قوسپاعانبەتوۆا
اقتوبە وبلىسى