قازاقستاندا مەرزىمى ءوتىپ كەتكەن جالاقى قارىزىنىڭ كولەمى 2,7 ەسەگە تومەندەدى. ءسويتىپ, ول 276 ميلليوننان 10 ميلليون تەڭگەگە دەيىن ازايدى. دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆانىڭ ايتۋىنشا, بۇعان مەملەكەتتىك ەڭبەك ينسپەكتورلارىنىڭ قىزمەتى سەبەپشى بولعان. ماسەلەن, 4 مىڭنان استام تەكسەرۋلەر كەزىندە 6 مىڭنان استام ەڭبەك زاڭناماسىن بۇزۋشىلىق انىقتالعان.
ۇلتتىق ەكونوميكا ءمينيسترى قالالى جەرلەردە شاعىن نەسيە بەرۋدى ارتتىرۋدى ۇسىندى. مۇنى كوتەرگەن قۋاندىق بيشىمباەۆتىڭ ايتۋىنشا, ەلباسى تاپسىرماسىمەن الداعى ۋاقىتتا بىرقاتار ماڭىزدى شارالاردى قامتۋ كوزدەلەدى. «بىرىنشىدەن, ەڭبەك رەسۋرستارى ارتىلاتىن, اۋىلدى جەرلەردەن جاستار كوبىرەك اعىلاتىن قالالاردا شاعىن نەسيە بەرۋدى دامىتۋ كەرەك», – دەدى مينيستر. وسى ارقىلى قالاعا كەلگەن جاستار جۇمىسسىزدار قاتارىن ارتتىرماي, كاسىپكەرلىكتى دامىتۋعا دا مۇمكىندىك الۋلارى ءتيىس.
بيىل 4 وبلىستاعى 183,4 مىڭ گەكتار جەردە سۋلاندىرۋ جۇيەلەرىن قالپىنا كەلتىرۋ جوباسى جۇزەگە اسادى. سۋ ءسىڭىرۋ جانە سۋلاندىراتىن جەرلەردى قالپىنا كەلتىرۋ ماقساتىندا بيىلعى جىلدىڭ ماۋسىم ايىندا يسلام دامۋ بانكى مەن ەۋروپا قايتا قۇرۋ جانە دامۋ بانكىنەن مەملەكەتتىك كەپىلدىك ەسەبىنەن 106 ملرد. تەڭگە (314,1 ملن. اقش دوللارى) قۇرايتىن جوبالاردى جۇزەگە اسىرۋعا قارىزدار تارتۋ بويىنشا جوسپار قابىلداندى.
الماتىدا ارىقتار جەلىسىن جوندەۋگە 600 ميلليونعا جۋىق تەڭگە بولىنەدى. وڭتۇستىك استانادا كوبەيگەن نوسەر جاۋىندار ارىق جەلىسىندەگى كەمشىلىكتەردى ايقىن كورسەتىپ بەردى. قالادا ارىق جەلىسىنىڭ 50 پايىزى قاناعاتتانارلىقسىز كۇيدە. وسىعان بايلانىستى, 495 ملن. تەڭگەگە 18,2 شاقىرىمدىق ارىق جەلىسىنە اعىمداعى جوندەۋ جۇمىستارىن جۇرگىزۋ جوسپارلاندى.
پوليتسيا استانا كۇنىندە جوعالىپ كەتكەن قىز بەن ونىڭ ەكى جاسار ءىنىسىن تاۋىپ الدى. «ەلوردا پوليتسەيلەرى الماتى ءىىد قىزمەتكەرلەرىمەن بىرلەسە وتىرىپ, جوعالىپ كەتكەن بالالاردى الماتى اۆتوۆوكزالىنان تاۋىپ الدى. ولار الماتى قالاسىنىڭ ءىىب-نە جەتكىزىلدى. وقيعانىڭ ءمان-جايى انىقتالىپ جاتىر», – دەدى استانا ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى سوفيا قىلىشبەكوۆا.
«قازاقستان بالالار كوزىمەن» اتتى جاس سۋرەتشىلەر بايقاۋى ءوتتى. وتان-اناعا دەگەن سۇيىسپەنشىلىكتى دارىپتەۋ ماقساتىندا وتكىزىلگەن كونكۋرسقا 3 مىڭنان اسا شىعارما كەلىپ تۇسكەن. كەشە سولاردىڭ ەڭ تاڭداۋلىلارى ۇزدىك ماراپاتقا يە بولدى. گران-پري يەگەرى اتانعان قاراعاندىلىق انەل يميشوۆا باس قالانىڭ كەرەمەتتىلىگىن ءوز قالامىنا ارقاۋ ەتىپتى.
حابارلار ۇكىمەت جانە وبلىستىق اكىمدىكتەر سايتتارى, «قازاقپارات» اگەنتتىگى, «حابار» تەلەارناسى ماتەريالدارى بويىنشا دايىندالدى