«قازتسينكماش» جشس يمپورتتى الماستىراتىن ءونىم وندىرۋدە
بيىل ريددەرلىك ماشينا قۇرىلىسى ماماندارى ءوندىرىس كولەمىن ارتتىرۋدى جانە يمپورتتى الماستىرۋ باعدارلاماسى بويىنشا جاڭا ءونىم ءتۇرىن يگەرۋدى قولعا الدى. قالاداعى «قازتسينكماش» جشس كاسىپورىنى تەحنيكالىق تۇرعىدان قايتا جاراقتاندىرۋدىڭ اۋقىمدى جوباسىن جوسپارلانعان مەرزىمدە ءجۇزەگە اسىرىپ, ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ العاشقى بەسجىلدىعىنىڭ ەڭ بەلسەندى قاتىسۋشىلارىنىڭ ءبىرى بولدى. اتالعان جايت كاسىپورىننىڭ بۇگىندە شەتەلدىك ارىپتەستەرمەن بىرگە ىسكە اسىرىپ جاتقان ىرگەلى جوبالارىنا يەك ارتۋىنا مۇمكىندىك سىيلادى.
– بيىل ءبىز الدىمىزعا ءۇلكەن ماقسات قويدىق, – دەيدى «قازتسينكماش» جشس ديرەكتورى الەكساندر انچۋگين. – ياعني, ىشكى ءجانە سىرتقى نارىقتا سۇرانىسقا يە جاڭا ءونىم ءتۇرىن شىعارۋ ەسەبىنەن ءوندىرىس كولەمىن 10 پايىزعا ارتتىرۋعا قول جەتكىزۋدى كوزدەپ وتىرمىز.
جۋىردا «قازتسينكماشتىق» ماشينا جاساۋشىلار ەرەكشە تاپسىرىستى ورىندادى. اتاپ ايتقاندا, شىعىس ءوڭىرىنىڭ بورودۋليحا اۋدانىنا قاراستى جەزكەنت كەنتىندەگى ورلوۆسكي بايىتۋ فابريكاسىنىڭ كەنشىلەرىنە ارنالعان دومالاق ديىرمەن تاسى ىسپەتتى تارتقىشتىڭ ءىرى اۋقىمداعى بولشەگىن جونەلتتى.
– مىس كەنىن بايىتۋ ۇدەرىسىنە قولدانىلاتىن بۇل ءونىمنىڭ دايىن كۇيىندەگى سالماعى 25 توننانى قۇرادى. ال ءبىزدىڭ قوس پەشىمىزدىڭ ارقايسىسىنىڭ مۇمكىندىگى 10 توننادان عانا بولاتىن. سوندىقتان, ونى الدىن-الا جاڭا سىزبالار جاساۋ ارقىلى قايتا جوندەۋدەن وتكىزۋگە تۋرا كەلدى. تور ارقىلى بوساتىلاتىن دومالاق ديىرمەننىڭ (4,5ح6م) كەسپەلتەك قابىرعاسىن دايىنداۋعا ەكى اي ۋاقىت جۇمسالدى, – دەدى كاسىپورىن جەتەكشىسى.
دۋمان اناش,
«ەگەمەن قازاقستان»