كەشە ماسكەۋدە «بايقوڭىر» كەشەنى بويىنشا قازاقستان-رەسەي ۇكىمەتارالىق كوميسسياسىنىڭ ءتورتىنشى وتىرىسى ءوتتى, دەپ حابارلادى پرەمەر-ءمينيستردىڭ ءباسپاسوز قىزمەتى.
وعان قازاقستان تاراپىنان پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ, رەسەي جاعىنان رف ۇكىمەتى توراعاسىنىڭ ورىنباسارى دميتري روگوزين قاتىستى.
كوميسسيا مۇشەلەرى قازاقستان جانە رەسەي پرەزيدەنتتەرى نۇرسۇلتان نازارباەۆ پەن ۆلاديمير ءپۋتيننىڭ تاپسىرمالارى بويىنشا قازاقستان مەن رەسەيدىڭ كەشەندى ەكى مەملەكەت مۇددەلەرىنە ساي ساقتاۋ, دامىتۋ جانە پايدالانۋ جونىندەگى ودان ارعى ءىس-قيمىلدار جولىن قالىپتاستىرۋدى قاراستىراتىن «بايقوڭىر» كەشەنىندەگى ودان ارعى ىنتىماقتاستىق تۇجىرىمداماسىنىڭ جوباسىن ازىرلەۋ بارىسىن تالقىلادى.
وتىرىسقا قاتىسۋشىلار سونداي-اق, «بايقوڭىر» كەشەنىنىڭ قىزمەت ىستەۋىنىڭ كوكەيكەستى ماسەلەلەرىن جانە ءبىرلەسكەن جوبالاردى, اتاپ ايتقاندا, «بايتەرەك» عارىشتىق زىمىران كەشەنىن قۇرۋ ماسەلەلەرىن قاراستىردى.
ونىڭ سىرتىندا بايقوڭىر قالاسىن دامىتۋعا بايلانىستى, ونىڭ ىشىندە, ونىڭ ينفراقۇرىلىمدارىن, سۋمەن جابدىقتاۋ جۇيەسىن, گازداندىرۋ ءىسىن, مەديتسينالىق قىزمەت كورسەتۋ سالاسىن دامىتۋعا قاتىستى ماسەلەلەر تالقىلاندى.
كەزدەسۋ قورىتىندىسى بويىنشا تاراپتار قازاقستان مەن رەسەيدىڭ «بايقوڭىر» كەشەنىن جانە عارىش سالاسىن بىرلەسىپ پايدالانۋ جونىندەگى ىنتىماقتاستىقتى ودان ءارى تەرەڭدەتۋگە نيەتتى ەكەندىكتەرىن اتاپ كورسەتتى.