ايگىلى فۋتبولشى, بەس دۇركىن «التىن دوپ» جۇلدەسىنىڭ يەگەرى ليونەل مەسسي كەزەكتى داۋدىڭ ورتاسىندا قالدى. جاقىندا عانا ارگەنتينا قۇراماسىنىڭ ساپىندا امەريكا كۋبوگى ءتۋرنيرىنىڭ فينالدىق ويىنىندا جەڭىلىس تاپقان وعان سالىق ماسەلەسى قوسىمشا سوققى بولىپ ءتيدى. بىرەر كۇن بۇرىن يسپانيا سوتى اكەسى حورحە مەن وزىنە 4,1 ميلليون ەۋرو كولەمىندە سالىق تولەۋدەن جالتاردى دەگەن ايىپ تاقتى.
«جىعىلعان ۇستىنە جۇدىرىق» دەمەكشى, العاشىندا 1,5 ميلليون ەۋرو ايىپپۇل تولەپ قۇتىلۋىنا بولادى دەگەن اقپار تاراعان. الايدا, كوپ ۇزاماي سوت اكەسى ەكەۋىن 21 ايعا باس بوستاندىعىنان ايىرۋ تۋرالى ۇكىم شىعاردى. بىراق, مەملەكەت زاڭى بويىنشا, ۇزاقتىعى 2 جىلدان كەم كەز كەلگەن جازانى سىناق مەرزىمىمەن وتەۋگە بولادى ەكەن. وسىعان بايلانىستى ساراپشىلار فۋتبولشى مەن اكەسىنىڭ تەمىر تورعا توعىتىلۋى ەكىتالاي دەگەن پىكىردە.
وتىرىس بارىسىندا سوت Danone, Adidas, Pepsi-Cola جانە باسقا دا كومپانيالارمەن جاساسقان جارنامالىق كەلىسىمشارتتارىن قاراپ شىقتى. «بارسەلونا» فۋتبول كلۋبىنىڭ شابۋىلشىسىنا 2 ميلليون ەۋرو, ال اكەسى حورحە مەسسيگە 1,5 ميلليون ەۋرو ايىپپۇل تولەۋدى مىندەتتەدى. ولار جوعارعى سوتقا ارىز بەرۋگە قۇقىلى.
ادۆوكاتتارى سالىقتان جالتاردى دەگەن ايىپتىڭ ەش نەگىزسىز ەكەنىن ءارى الداعى ۋاقىتتا سوت ۇكىمىنە شاعىم تۇسىرەتىندەرىن مالىمدەدى.
ايتا كەتەيىك, ليونەل مەسسي «التىن دوپتى» ەڭ كوپ يەلەنگەن فۋتبولشى. ال ۇزدىك سۇرمەرگەندەرگە بەرىلەتىن «التىن بۋتسى» سىيلىعىن ءۇش مارتە جەڭىپ العان. بۇگىندە «بارسەلونانىڭ» جانە ارگەنتينا قۇراما كومانداسىنىڭ تاريحىندا ەڭ كوپ گول سوققان فۋتبولشى.
ايان ءابدۋالي,
«ەگەمەن قازاقستان»