تۇرىكمەن-قازاق فۋتبولىنىڭ تۇلەگى, قازاننىڭ «رۋبين» كومانداسىنىڭ بۇرىنعى باس جاتتىقتىرۋشىسى, قازىر دونداعى روستوۆتىڭ «روستوۆ» كومانداسىن جاتتىقتىرىپ جۇرگەن بەلگىلى مامان قۇربان بەردىەۆكە رەسەي فۋتبول وداعىنىڭ (رفس) وكىلدەرى شىعىپ, قىزمەتتەستىك بولۋ تۇرعىسىندا اڭگىمە قوزعادى.
تاسس-تىڭ دەرەگى بويىنشا, بىراق ازىرگە مامانمەن كەلىسسوز جۇرگىزىلمەگەن. دەگەنمەن, رفس جاقىن ارادا قۇربان بەكي ۇلىنا رەسەي قۇراماسى تىزگىنىن الۋدى ۇسىناتىن سياقتى.
شىن مانىندە بەردىەۆ وتكەن اپتادا «روستوۆپەن» الداعى ەكى فۋتبول ماۋسىمىنا كونتراكتىنى جالعاستىرىپ قويىپ ەدى. ال كەلىسىمشارتتا قىزىقتى باپتار دا بار ەكەن. اتاپ ايتقاندا, رەسمي ەمەس مالىمەتتەرگە قاراعاندا, جاتتىقتىرۋشى بۇل كەلىسىمشارتتى كەز كەلگەن ۋاقىتتا بىرجاقتى بۇزا الادى. وسىنىسى ءۇشىن جانە ەشقانداي وتەماقى تولەمەيدى.
رەسەي قۇراماسىن 2015 جىلعى تامىز ايىنان بەرى ماسكەۋدىڭ تسسكا كومانداسىنىڭ باس جاتتىقتىرۋشىسى لەونيد سلۋتسكي جاتتىقتىرىپ كەلدى. ول قۇرامانى ەۋروپا چەمپيوناتىنىڭ ىرىكتەۋ توبىنان الىپ شىعىپ, فرانتسيادا وتكەن فينالدىق كەزەڭىنە جەتكىزدى. بىراق فرانتسۋز جەرىندە رەسەي كومانداسى قاتتى ساتسىزدىككە ۇشىرادى. ول توپتاعى ءۇش ويىننىڭ بىرەۋىن تەڭ اياقتاپ (انگليا – 1:1), ەكى ويىنىندا ۇتىلدى (سلوۆاكيا – 1:2, ۋەلس – 0:3). ءسويتىپ, توپتا ەڭ سوڭعى ورىندا قالىپ قويدى. وسىدان كەيىن سلۋتسكي ءوزىنىڭ ۇلتتىق كوماندادان كەتەتىنىن مالىمدەدى.
تالعات رايىمبەك.