47 قازاقستاندىق تۋروپەراتور قىتاي تۋريستەرىمەن بەلسەندى جۇمىس جۇرگىزە باستادى
كەڭ بايتاق, اسەم دە كورىكتى قازاقستان جەرى تۋريزمگە سۇرانىپ-اق تۇر عوي. بىراق, ونى شەتەلدەردەگى تۋريستەر, ونىڭ ىشىندە قىتاي دا بار, جەتكىلىكتى بىلە بەرمەيدى. وسىنى ەسكەرگەن قازاقستان جاعى ەكوتۋريزم, الپينيزم, جاعاجاي, وقۋ-ءبىلىم, دەنساۋلىق, تاۋ شاڭعىسى جانە ءدىني تۋريزم تاقىرىپتارى بويىنشا تۇساۋكەسەر-تانىستىرىلىم وتكىزدى. سونىمەن بىرگە, ەكسپو-2017 حالىقارالىق كورمەسى تۋرالى دا قىتاي حالقى وسى جولى كەڭىرەك بىلە الدى. ءساتىن سالسا, 2017 جىلى قازاقستانداعى قىتاي ءتۋريزمى جىلى بولماق. وسى جايلى دا جۇزدەسۋ بارىسىندا كەڭ پىكىرالىسۋ بولدى. بۇل جۇزدەسۋگە دانەكەر بولعان – قازاقستان رەسپۋبليكاسىنىڭ قحر-داعى ەلشىلىگى, سىرتقى ىستەر مينيسترلىگىنىڭ كونسۋلدىق قىزمەت دەپارتامەنتى, شانحاي قالاسىنداعى باس كونسۋلدىق, ءۇرىمشى قالاسىنداعى تولقۇجات-ۆيزا قىزمەتى, قىتايدىڭ حالىقارالىق ساۋدا-ساتتىققا ىقپال جاساۋ كوميتەتى, ەكى ەلدىڭ ءىرى تۋريستىك وپەراتورلارى, «استانا ەكسپو-2017» ۇك» اق وكىلدەرى.
وتكەن جىلدىڭ سوڭىندا قازاقستان رەسپۋبليكاسى ينۆەستيتسيالار جانە دامۋ مينيسترلىگى مەن قحر رەفورما جانە دامۋ ىستەرى جونىندەگى مەملەكەتتىك كوميتەتى اراسىندا توپتىق تۋريستىك ۆيزالاردى بەرۋ تارتىبىنە بايلانىستى مەموراندۋمعا قول قويىلعان ەدى. وسىنىڭ جاي-جاپسارى كەڭىنەن ءتۇسىندىرىلدى. بۇرىنعىداي ەمەس, ەندى قىتايلىق تۋريستەردىڭ توپ بولىپ قازاقستانعا ساپار شەگۋى جەڭىلدەدى. بۇل – ADS-ۆيزا ءتۇرى. مۇنداي ۆيزا بەرۋ وسى جىلدىڭ 1 شىلدەسىنەن باستالادى.
قازاقستان رەسپۋبليكاسىنىڭ قحر ەلشىلىگىنىڭ كەڭەسشىسى راحىمجان راحيموۆتىڭ ايتۋىنا قاراعاندا, قازاقستاندا تۋريستىك سالالاردى دامىتۋدىڭ 2020 جىلعا دەيىنگى تۇجىرىمداماسى بار. وندا ينفراقۇرىلىمدار قۇرىلىسى, جاڭا تۋريستىك ورىنداردى اشۋ, حالىقارالىق باسەكەلەستىككە لايىق تاۋارلار مەن قىزمەت, ۋاقىت تالابىنا ساي تۋريستىك جۇيەنى قالىپتاستىرۋ جانە ءتيىستى كادرلاردى دايارلاۋ ماسەلەلەرى قاراستىرىلعان.
– اتالعان تۇجىرىمدامانىڭ ناتيجەسىندە قازاقستان شەتەلدىك تۋريستەردى تارتۋ جونىندەگى 50 ەلدىڭ قاتارىنا ەنۋدى نيەت ەتىپ وتىر, – دەيدى ر.راحيموۆ.
قازىر ەكى ەلدىڭ اراسىندا اپتاسىنا 34 اۆيارەيس بار. ونىڭ 18-ءى – قازاقستاننىڭ, 14-ءى قىتايدىڭ ەنشىسىندە.
– ءبىزدىڭ كومپانيا 1996 جىلى قۇرىلدى. قىتايداعى «5ا» دەڭگەيىندە جۇزدەگەن جەتەكشى كومپانيالاردىڭ قاتارىندامىز. جىلدىق قاراجات اينالىمى 1 ميلليارد يۋان شاماسىندا. قىتايدىڭ 150 قالاسىندا فيليالىمىز بار. ءبىزدىڭ ەلدىڭ تۋريزم نارىعى وتە ۇلكەن – جىلىنا ورتا ەسەپپەن 120 ميلليون قىتايلىق تۋريست شەت ەلدەرگە ساپارعا شىعادى, – دەيدى بىزبەن اڭگىمەسىندە «CCITS» كوممەرتسيالىق تۋريزم كومپانياسىنىڭ پرەزيدەنتى ۆان پەيسيان.
ونىڭ ايتۋىنشا, قىتايلىقتار ءبىر رەت تۋريست رەتىندە بارعان ورىنعا ەكىنشى رەت قايتارا بارمايدى. جاڭا تۋريستىك ورىن ىزدەيدى.
– قازاقستاندا تۋريستەردى قىزىقتىراتىن ورىندار جەتكىلىكتى ەكەن. سوندىقتان دا ءبىز قازاقستاندىق تۋروپەراتورلارمەن تىعىز ىنتىماقتاسا جۇمىس جاساۋعا ىنتالى بولىپ وتىرمىز, – دەدى ۆان پەيسيان.
ال, «مەنچجيليۋي» تۋريستىك كومپانياسى باس ديرەكتورىنىڭ ورىنباسارى سيۋي سياومين مىناداي وي ايتتى: «ءبىزدىڭ كومپانيا نەگىزىندە ىشكى تۋريزم بويىنشا جۇمىس ىستەيدى. بىراق, جاقىن ۋاقىتتا سىرتقى نارىققا شىعۋدى دا جوسپارلاپ وتىرمىز. قازاقستان قىتايلىق تۋريستەر ءۇشىن وتە تارتىمدى باعىت بولادى دەپ ويلايمىز. ويتكەنى, سىزدەردە وتە تاماشا تابيعات بار, قىسقى سپورت تۇرلەرى مەن ەكولوگيالىق تۋريزم ءۇشىن جاعدايلار جاسالعان. سوندىقتان قازاقستانعا قىزىعۋشىلىق تانىتىپ وتىرمىز».
«Turan – Asia» – قازاقستاندىق تۋروپەراتور. وسى كومپانيانىڭ ديرەكتورى گۇلعايشا قاسەنحانوۆانىڭ ايتۋىنشا, قازاقستان قىتايلىق تۋريستەردى قابىلداۋعا دايىن.
– 2017 جىل قازاقستانداعى قىتاي ءتۋريزمى جىلى بولىپ جاريالاندى. كەلەسى جىلى استانادا ەكسپو وتەدى. ءبىزدىڭ ەلدە كورىكتى تابيعات پەن تاريحي ورىندار وتە كوپ. ول تۋرالى قىتايلىق تۋريستەرگە جان-جاقتى اقپارات بەرىلدى. ولاردى قابىلداۋعا ءبىزدىڭ كومپانيا دايىن. مارشرۋتتار ءازىر. قىتاي ءتىلىن جاقسى مەڭگەرگەن ماماندارىمىز بار. ەڭ باستى باعىت – «جىبەك جولى» بويىنداعى قالالار – الماتى, تاراز, شىمكەنت, تۇركىستان بولىپ وتىر. ءبىز بۇعان دەيىن گەرمانيا, جاپونيا, سينگاپۋر, گونكونگ, مالايزيا جانە باسقا دا ەلدەردىڭ تۋريستەرىمەن تىعىز بايلانىس جۇرگىزىپ كەلدىك, قىتايلىق تۋريستەردى دە قۇشاق جايا قارسى الامىز, – دەدى گ.قاسەنحانوۆا.
وسى باسقوسۋ بارىسىندا اDS كەلىسىمى جونىندە تولىق اقپارات بەرىلدى. بۇل – قىتايلىق تۋريستەردىڭ توپ بولىپ قازاقستانعا ساپارلاۋى ءۇشىن ۆيزا بەرۋ كەلىسىمى. وسى تىزىمگە قازاقستان جاعىنان 47 كومپانيا, قىتاي جاعىنان 380-گە جۋىق كومپانيا ەندى.
قازاقستاندىق «Asia Discovery» تۋريستىك كومپانياسى ديرەكتورىنىڭ ورىنباسارى راۋشان سارتاەۆا وسى اDS كەلىسىمى جونىندە بىلاي دەگەن ەدى: «بۇل وتە دۇرىس قادام. ەندى قازاقستاندى كورسەم-بىلسەم دەگەن تۋريستەردىڭ قاتارى ارتاتىنى ءسوزسىز. ءبىزدىڭ كومپانيا شەتەلدىك تۋريستەردى تارتۋ جۇمىسىمەن 2001 جىلدان بەرى اينالىسىپ كەلەدى. ەندى مىنە, قىتايلىق تۋريستەرمەن دە جۇمىستى باستايمىز. ولاردىڭ ىشىندە اۆتوتۋريزمگە ق ۇلىق ءبىلدىرىپ وتىرعاندار كوپ. جىبەك جولى بويىمەن جۇرۋگە ىنتالارى زور. جالپى, قىتايلىقتاردىڭ قازاقستانعا قىزىعۋشىلىعى كەرەمەت».
سادىق اكىجانوۆ,
«ەگەمەن قازاقستان» – بەيجىڭنەن
قىتاي حالىق رەسپۋبليكاسى
سادىق اكىجانوۆ
«ەگەمەن قازاقستان» گازەتىنىڭ
قىتاي حالىق رەسپۋبليكاسىنداعى مەنشىكتى ءتىلشىسى بولىپ
جۇمىسقا كىرىستى.
ول پاۆلودار قالاسىندا تۋعان. 2006 جىلى ءال-فارابي اتىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.
قازاقستان رەسپۋبليكاسى پرەزيدەنتتىك مادەنيەت ورتالىعىندا عىلىمي قىزمەتكەر, قر قورشاعان ورتانى قورعاۋ مينيسترلىگىندە باس ساراپشى, ەكولوگيا اۋديتورلارىنىڭ ۇلتتىق پالاتاسىندا باق-پەن بايلانىس جانە ەكونوميكا ماسەلەلەرى جونىندەگى مەنەدجەر بولىپ قىزمەت اتقارعان.