رەسپۋبليكا وڭىرلەرىندە بىلىكتىلىگى مەن كاسىبي دەڭگەيى جوعارى جۋرناليستەردىڭ از ەكەنى سوڭعى كەزدە ءجيى ايتىلىپ ءجۇر. مۇنىڭ سەبەبى نەدە؟ وسى ساۋال توڭىرەگىندە وبلىستاعى بىرقاتار باق باسشىلارىمەن وي-پىكىر الماسقان ەدىك.
ايماقتاعى ەكى وبلىستىق جانە ون ءتورت اۋداندىق گازەتتى ءبىرىكتىرىپ وتىرعان ءىرى مەدياحولدينگ – «جايىق پرەسس» جشس-ءتىڭ باس ديرەكتورى جانتاس سافۋلليننىڭ ايتۋى بويىنشا, جوعارى وقۋ ورىندارىندا بولاشاق جۋرناليستەردىڭ ساپالىق دەڭگەيىنە باسا ءمان بەرىلۋى كەرەك. ونى ىرىكتەۋ ەڭ الدىمەن ءال-فارابي جانە ل.ن.گۋميلەۆ اتىنداعى جوعارى وقۋ ورىندارىنىڭ جۋرناليستيكا فاكۋلتەتتەرىندەگى شىعارماشىلىق كونكۋرسقا قويىلاتىن تالاپتاردى كوتەرۋدەن باستاۋ العانى ءجون.
ايماقتىق ۋنيۆەرسيتەتتەردە اشىلعان جۋرناليستيكا ءبولىمدەرى ءوزىن-ءوزى اقتاي المادى. مۇنىڭ سىرىن ءتيىستى ماتەريالدىق-تەحنيكالىق بازانىڭ جەتكىلىكسىزدىگىنەن جانە ساباق بەرەتىن وقىتۋشى-پروفەسسورلاردىڭ تاپشىلىعىنان ىزدەگەن ورىندى. مىسالى, م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ءبىرىنشى پرورەكتورى اسەت تاسماعامبەتوۆتىڭ ايتۋىنشا, 2005-2008 جىلدارى فيلولوگيا فاكۋلتەتى جانىنان جۋرناليستيكا ماماندىعى بويىنشا جوعارى ءبىلىم بەرىلگەن. كەيىن جابىلىپ قالعان. بۇعان قاجەتتى گرانت بولىنبەگەنى, ءۇمىتكەرلەردىڭ از بولعانى سەبەپشى بولعان.
جۋرناليستيكا سالاسىندا ەلەكتروندىق اقپارات قۇرالدارىنىڭ الاتىن ۇلەسى جىلدان-جىلعا ءوسىپ كەلەدى. ورال وڭىرىندەگى بۇل ءىستىڭ جاي-كۇيى قانداي؟ بۇل ساۋالدى «قازاقستان» رەسپۋبليكالىق تەلەراديوكورپوراتسياسى» اق باتىس قازاقستان وبلىستىق فيليالىنىڭ ديرەكتورى اسىلانبەك عۇباشەۆكە قويعان ەدىك. ونىڭ جاۋابىنان كوڭىلگە تۇيگەنىمىز, الماتى مەن استانادا باق ماماندىعى بويىنشا وقىپ جۇرگەن ستۋدەنتتەر فيليالدا وندىرىستىك تاجىريبەدەن وتەدى ەكەن. ويتكەنى, وڭىرلەر ولاردىڭ كاسىبي داعدىلاردى مەڭگەرۋى جانە قاجەتتى تەحنولوگيالارمەن جۇمىس ىستەۋگە ۇيرەنۋى ءۇشىن ىڭعايلى ءارى قولجەتىمدى. ايتسە دە ءار جىل سايىن تاجىريبەدەن وتەتىن 7-8 ستۋدەنتتىڭ وڭىرگە ورالۋى نەكەن-ساياق. نەگىزىنەن ولار تۇرمىستىق جانە شىعارماشىلىق ءمۇمكىندىكتەردىڭ تومەندىگىن جانە جالاقىنىڭ ازدىعىن العا تارتاتىن كورىنەدى.
تەمىر قۇسايىن,
«ەگەمەن قازاقستان»
باتىس قازاقستان وبلىسى