ارحەولوگتار اقمولا وڭىرىنەن وسىنداي جادىگەر تاپتى
اقمولا وبلىسىندا قۇندى ءجادىگەر تابىلدى. كەڭوتكەل ەلدى مەكەنىنە تاياۋ جەردە قازبا جۇمىستارىن جۇرگىزگەن ارحەولوگتار ساق كەزەڭىنەن قالعان تاريحي ولجاعا تاپ بولدى.
مالىمەتتەر بويىنشا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن ستۋدەنتتەرى الدىمەن جاسوسپىرىم قىزدىڭ سۇيەگىن تاپقان. ارتىنشا التىن بۇيىمدارى مەن VII عاسىردا قىشتان جاسالعان زاتتارى شىققان.
– ءبىز ءالى زەرتتەۋ جۇمىستارىن جالعاستىرىپ جاتىرمىز. قولىما سيرەك كەزدەسەتىن, التىننان جالاتىلعان تۇيرەۋىش ءتۇسىپ وتىر. وعان مونشاقتارى قوسا تىزبەكتەلگەن. وسىعان بايلانىستى ءبىز قابىردى قىز بالاعا تيەسىلى دەگەن بولجام جاسادىق, – دەدى ەۋرازيا ۇلتتىق ۋنيۆەرسيتەتىنىڭ اعا وقىتۋشىسى سەرعازى ساكەنوۆ.
– بۇل جەردە ەجەلگى تەمىر قورىتۋشىلار قىزمەت ەتكەن. ءبىز كوپ ءنارسەنى سول كەزەڭدەگى تۇرعىنداردىڭ سالعان باسپانالارىنىڭ كولەمىنە قاراپ انىقتاپ وتىرمىز, – دەدى پاۆەل كۋچەروۆ ەسىمدى ستۋدەنت.
باقبەرگەن امالبەك,
«ەگەمەن قازاقستان»
اقمولا وبلىسى