قازاقستاننىڭ جاپونياداعى توتەنشە جانە وكىلەتتى ەلشىسى ەرلان باۋداربەك-قوجاتاەۆ حيروسيما پرەفەكتۋراسىنىڭ گۋبەرناتورى حيدەحيكو يۋزاكيمەن جانە اتالعان قالانىڭ مەرى كازۋمي ماتسۋيمەن كەزدەستى.
تاراپتار جاپونيا دەلەگاتسياسىنىڭ سەمەي يادرولىق سىناق پوليگونىنىڭ جابىلعانىنا 25 جىل تولۋىنا جانە يادرولىق سىناقتارعا قارسى حالىقارالىق ءىس-قيمىل كۇنىنە ارنالعان شارالارعا قاتىسۋى ماسەلەلەرىن تالقىلادى.
گۋبەرناتور ح.يۋزاكي قازاقستان تاراپىنىڭ حيروسيمادا وتكىزىلىپ جۇرگەن ءىرى حالىقارالىق شارالار جۇمىسىنا بەلسەندى قاتىسىپ كەلە جاتقانى ءۇشىن ريزاشىلىعىن ءبىلدىرىپ, قازاقستانمەن قارۋسىزدانۋ سالاسىندا تىعىز قارىم-قاتىناستاردى ءارى قاراي دا دامىتۋعا دەگەن وڭ نيەتى بار ەكەنىن مالىمدەدى.
«مەرلەر بەيبىتشىلىك ءۇشىن» حالىقارالىق قوزعالىسىنا باسشىلىق جاسايتىن مەر ك.ماتسۋي قازاقستاننىڭ جانە پرەزيدەنت نۇرسۇلتان نازارباەۆتىڭ جەكە باسىنىڭ يادرولىق قارۋسىزدانۋ مەن تاراتپاۋ جولىنداعى جەتەكشى رولىنە جوعارى باعا بەردى.
ك.ماتسۋي اتاپ كورسەتكەندەي, حيروسيما قازاقستاننىڭ يادروسىز الەم قۇرۋ جونىندەگى جاھاندىق باستاماسىن جاقسى بىلەدى جانە وعان ۇلكەن قۇرمەتپەن قارايدى.
«ەگەمەن-اقپارات»