وبلىستىڭ مەملەكەتتىك قىزمەتشىلەرى لەيكەميامەن اۋىراتىن بالالارعا 200 ليتر قان تاپسىردى. وبلىس اكىمدىگىنىڭ قىزمەتكەرلەرى ءوڭىر باسشىسى بەردىبەك ساپارباەۆتىڭ باستاماسىمەن قولعا الىنعان «دونور بول – ءومىر سۇرۋگە ءۇمىت سىيلا» شاراسىنا قاتىستى.
مەملەكەتتىك قىزمەتكەرلەر جىلىك مايىنىڭ دونورلارى قاتارىنا تىركەلىپ, دونورلىق قان كومپونەنتتەرىنىڭ قاۋىپسىزدىگى ءۇشىن وبلىستىق ورتالىققا قان تاپسىردى. شاراعا ءوڭىر باسشىسى بەردىبەك ساپارباەۆ تا قاتىستى. ونىمەن بىرگە, 400 مەملەكەتتىك قىزمەتكەر دە يگى ىسكە اتسالىستى. ولاردىڭ ارقايسىسى سىرقات بالالارعا كومەكتەسۋ ءۇشىن انكەتا تولتىرۋ, تىركەلۋ, مەديتسينالىق تەكسەرىستەن ءوتۋ جانە قان تاپسىرۋ سەكىلدى قاجەتتى پروتسەدۋرالاردان ءوتتى.
– مۇنداي اكتسيانى ءبىز بالالار كۇنىنە بايلانىستى ءوتكىزدىك. وبلىسىمىزدا لەيكەميامەن اۋىراتىن 52 بالا تىركەۋدە تۇر. ارينە, مەملەكەت قاجەتتى كومەكتەردى كورسەتۋدە, ءدارى-ءدارمەكپەن قامتاماسىز ەتەدى, قاجەت بولسا, الىس-جاقىن شەتەلدەرگە ەم الۋعا قاراجات بولەدى. ءبىز وسىلايشا ولاردىڭ ەم الۋىنا ءوز ۇلەسىمىزدى قوسقىمىز كەلدى, – دەدى ءوڭىر باسشىسى.
وبلىس اكىمىنىڭ باستاماسى اقتوبە قالاسىنىڭ مەملەكەتتىك قىزمەتكەرلەرى مەن 12 اۋداندارىنان دا قولداۋ تاۋىپ, مۇنداي يماندى ىسكە بارلىعى 2000-نان استام ادام ۇلەس قوسۋدا. مۇنداي جاعدايدا بەرىلەتىن سىياقى دا لەيكوزعا شالدىققان بالالاردىڭ ەمىنە اۋدارىلادى.
بۇگىندە وبلىستا وتكىر لەيكوز دياگنوزىمەن 52 بالا ەسەپتە تۇر. بەلگىلى بولعانداي, قان اۋرۋلارىنىڭ سالدارى وتە جوعارى, بالالاردىڭ ودان ءارى دامۋىنا كەرى اسەر ەتەدى, قان ازدىقتىڭ سالدارىنان ىشكى اعزالار فۋنكتسيالارى, ەڭ الدىمەن ميدىڭ قىزمەتى بۇزىلادى. قان اۋرۋلارىن ەمدەۋدىڭ ءبىر جولى – الماستىرۋشى تەراپيا ەسەبىنەن قاندى توقتاتۋ جانە كەز كەلگەن ۋاقىتتا قاجەت بولاتىن قان كولەمىن تولىقتىرىپ وتىرۋ بولىپ تابىلادى. بۇل باعىتتا وبلىستىڭ مەملەكەتتىك قىزمەتشىلەرى تاپسىرعان قاننىڭ كومەگى كوپ بولارى ءسوزسىز.
ساتىبالدى ءساۋىرباي,
«ەگەمەن قازاقستان»
اقتوبە وبلىسى