بۇرناعى جىلى ۇبت كەزىندە بۇكىل رەسپۋبليكا بويىنشا كۇپتى كوڭىلدەردى ءبىرىنشى بولىپ قۋانتقان الماتى قالاسىنداعى مەملەكەتتىك تىلدە فيزيكا-ماتەماتيكا پاندەرىن تەرەڭدەتە وقىتاتىن №178 ليتسەي بولاتىن. العاشقى بولىپ 125 باللدى اتالمىش ليتسەيدىڭ تۇلەگى ءابدىجاپار ايعانىم جيناعان ەدى. سول 2014 جىلى بۇل مەكتەپتىڭ ءتورت بىردەي تۇلەگى 125 بالل جيناپ, ءبىلىم جاعىنان جۇلدىزدارى جانعان-دى.
ۇدايى جاقسى كورسەتكىشتەرگە قول جەتكىزىپ جۇرگەن الماتىداعى ماڭدايالدى ءبىلىم وردالارىنىڭ ءبىرى بيىل دا تابىسسىز ەمەس. ۇستىمىزدەگى جىلعى ۇبت قورىتىندىسى بويىنشا ەڭ جوعارى 125 باللدى ليتسەيدىڭ 11 «ءا» سىنىپ وقۋشىسى, «التىن بەلگى» يەگەرى ءتۇگەلباي فاريزا ابايقىزى جينادى.
قۇرمەت وردەنىنىڭ يەگەرى, رەسپۋبليكامىزعا تانىمال ماتەماتيك وتەش قوڭىرباي ۇلى ءابدىماجيت باسشىلىق ەتەتىن بۇل مەكتەپتە بيىلعى وقۋ جىلى 131 وقۋشى ۇبت تاپسىردى. ونىڭ ىشىندە 34 وقۋشى التىن بەلگى قورعادى, 21-ءى ۇزدىك اتتەستات يەگەرى اتانىپ, مەكتەپتىڭ ورتا بالى 110,9 بولدى. 5 وقۋشىسى حالىقارالىق عىلىمي كونكۋرستار مەن وليمپيادالاردىڭ ءجۇلدەگەرلەرى, 8 وقۋشى شەتەلدىك وقۋ ورىندارى ءبىلىم گرانتتارىنىڭ يەگەرى. ءوز شاكىرتتەرىن ءبىلىم نارىمەن سۋسىنداتىپ وتىرعان بۇل ليتسەي – بۇگىنگى كۇننىڭ زاماناۋي تالاپتارىنا ساي ءبىلىم وشاعىنىڭ ءبىرى.
ايناش ەسالي,
«ەگەمەن قازاقستان»
الماتى