● ۇلتتىق قور نەسيەلىك تۇرعىن ءۇي قۇرىلىسىنا قوسىمشا 67 ملرد. تەڭگە ءبولدى. «جىل سوڭىنا دەيىن 60 ميلليارد تەڭگەنىڭ 41,7 ميللياردى يگەرىلەدى دەپ كۇتىلۋدە. قالعان قاراجات كەلەسى جىلدىڭ ەكىنشى-ءۇشىنشى توقساندارىندا يگەرىلەدى», – دەدى وسىعان وراي «بايتەرەك» ۇلتتىق حولدينگى باسقارماسىنىڭ باسشىسى ەربولات دوساەۆ.
● قاشاعانداعى مۇناي ءوندىرۋ جىل سوڭىنا دەيىن 35 مىڭ تونناعا جەتەدى. قازىرگى تاڭدا ەندى گاز ايداۋ كولەمىن ارتتىرۋ ماقساتىندا قاراشىعاناق كەن ورنىن ودان ءارى دامىتۋ تۇجىرىمداماسى قارالىپ جاتىر. وسىلار جايىندا مالىمدەگەن ەنەرگەتيكا ءمينيسترى قانات بوزىمباەۆتىڭ ايتۋىنشا, قاراشىعاناقتى كەڭەيتۋ جوباسى كەلەشەكتە 6 مىڭنان استام جاڭا جۇمىس ورنىن اشۋعا مۇمكىندىك بەرەدى.
● جامبىل وبلىسىندا مەملەكەتتىك رامىزدەر كۇنىنە وراي 170-كە جۋىق شارا ءوتتى. وعان وڭىردە 50 مىڭ ادام قامتىلدى. ال قالا جاستارى «رامىزدەرىم – ماقتانىشىم» اتتى اكتسياعا بەلسەنە قاتىستى.
● سولتۇستىك قازاقستاندا پاتريوتتار فورۋمى كەڭ قانات جايدى. شارا نازارباەۆ زياتكەرلىك مەكتەبىنىڭ وقۋشىلارى دايىنداعان فلەشموبتان باستالدى. وبلىس اكىمى ەرىك سۇلتانوۆ بۇل كۇننىڭ قازاقستاندىقتار ءۇشىن ەرەكشە ەكەنىن اتاپ ءوتتى. سەبەبى, شىنايى پاتريوتتىق مەملەكەتتىك رامىزدەرگە دەگەن قۇرمەتتەن باستالادى.
● اقمولا وبلىسىندا كوكتەمگى ەگىس ناۋقانى اياقتالدى. بۇل كەشە ايماق باسشىسى سەرگەي كۋلاگيننىڭ قاتىسۋىمەن وتكەن اپپارات ءماجىلىسىندە ايتىلدى. ناۋقاندا 4,217 ميلليون گەكتار اۋماققا ءداندى جانە بۇرشاق داقىلدارى سەبىلگەن.
● اقتوعايدا سىيىمدىلىعى 5 000 توننالىق قويما سالىنىپ جاتىر. مۇنداي دەرەك پاۆلودار وبلىسىنىڭ اكىمى بولات باقاۋوۆتىڭ وسى اۋدانعا جاساعان جۇمىس ساپارى كەزىندە ءمالىم بولدى. «اقتوعاي اگرو» جشس باسشىسى يگور گولوۆاشوۆ قويمانىڭ ارقايسىسى 1 000 توننا كوكونىس سىيدىراتىن بەس سەكتسيادان تۇراتىنىن باياندادى.
● قىزىلوردالىق كاسىپكەر تاجىريبەسى مول ساراپشىنىڭ جاردەمىنە جۇگىندى. سىر وڭىرىندە جەكە كاسىپكەر ايدوس سايلىعاراەۆتىڭ كونديتەرلىك ونىمدەر شىعاراتىن كاسىپورنى الەمدىك دەڭگەيدەگى تاجىريبەلى گەرمانيالىق ساراپشىنىڭ كومەگىمەن 21 كۇن بويى ءونىم تۇرلەرىن كوبەيتۋ جانە ساپاسىن جاقسارتۋ باعىتىندا جۇمىس جاسادى.
● وڭتۇستىك قازاقستاننىڭ سوزاق اۋدانىنداعى شيپالى كول سۋعا تولدى. بۇل گيدرولوگ-عالىمداردىڭ وتكەن عاسىردىڭ 90-شى جىلدارىنان بەرى ۇزدىكسىز تارتىلىپ كەلگەن قىزىلكولدى قالپىنا كەلتىرۋ باعىتىندا جاساعان جاندى جۇمىستارىنىڭ ناتيجەسىندە ءمۇمكىن بولدى. ونىڭ ۇستىنە بيىلعى جاۋىن-شاشىننىڭ كوپتىگى كولدىڭ 70-80 پايىزعا دەيىن كوتەرىلۋىنە ىقپال جاسادى.
حابارلار ۇكىمەت, وبلىستىق اكىمدىكتەر سايتتارى مەن «قازاقپارات» اگەنتتىگى مالىمەتتەرى بويىنشا
دايىندالدى