كەشە ۇكىمەتتىڭ سەلەكتورلىق وتىرىسىندا اقتوبەدەگى قاندى وقيعاعا قاتىستى اقپاراتتار ايتىلدى.
وتىرىستى اشقان پرەمەر-مينيستر كارىم ءماسىموۆ الدىمەن بارشا مۇسىلمان قاۋىمىن قاسيەتتى رامازان ايىنىڭ باستالۋىمەن قۇتتىقتادى. «وكىنىشكە قاراي وسى قاسيەتتى ايدا اقتوبە قالاسىندا قاندى وقيعا ورىن الدى. بىرنەشە ادام قازا تاپتى. جاراقات العاندار دا بار. بۇل وتە وكىنىشتى جاعداي», دەدى ك.ءماسىموۆ. بۇل وقيعا جايىندا ىشكى ىستەر ءمينيسترى قالمۇحانبەت قاسىموۆ باياندادى.
ق.قاسىموۆتىڭ مالىمدەۋىنشە, 5 ماۋسىم كۇنى جەرگىلىكتى ۋاقىت بويىنشا ساعات 14.28-دە تەرىس اعىمداعى ءدىن ۇستانۋشىلار قارۋ-جاراق يەمدەنۋ ماقساتىمەن «پاللادا» دۇكەنىنە شابۋىل جاساعان. دابىل كنوپكاسىن باسىپ ۇلگەرگەن دۇكەن ساتۋشىسىن قىلمىسكەرلەر پىشاقتاپ ولتىرگەن. وقيعا ورنىنا ەڭ ءبىرىنشى بولىپ «جەدەل كۇزەت» جشس كۇزەت ۇيىمىنىڭ 2 قىزمەتكەرى جەتىپ, ونىڭ ءبىرى بىردەن وققا ۇشىپ مەرت بولسا, ەكىنشىسى جاراقاتتانعان.
وسىدان كەيىن پوليتسيا قىزمەتكەرلەرى دە كەلىپ, قىلمىسكەرلەر ولارعا قارۋلى قارسىلىق تانىتقان. اتىس بارىسىندا 3 پوليتسيا قىزمەتكەرى جارالانعان. قىلمىسكەرلەر پاترۋلدىك ماشينامەن بوي تاسالاعان. ولار دۇكەننەن 17 مىلتىق, 3 گاز تاپانشاسىن, وقتار مەن پىشاقتاردى الىپ كەتكەن. ۇرلانعان قارۋ-جاراق پەن وق-دارىلەردىڭ سانى ناقتىلانۋدا, دۇكەندە تۇگەندەۋ جۇرگىزىلۋدە.
«پاللادا» دۇكەنىنە شابۋىل جاساعاننان كەيىن قارۋلى قىلمىسكەرلەر ەكى توپقا بولىنگەن. 6 قىلمىسكەردەن جاساقتالعان ءبىرىنشى توپ «پانتەرا» قارۋ-جاراق دۇكەنىنە شابۋىلداپ, وندا ءبىر ادامدى پىشاقتاپ ولتىرسە, ەكىنشىسىن جاراقاتتاعان. وقيعا ورنىنا جەتكەن پوليتسيا قىزمەتكەرلەرى 3 قىلمىسكەردى اتىپ ولتىرسە, بىرەۋى جاراقاتتانعان. ال ەكەۋى بوي تاسالاپ ۇلگەرگەن. دەگەنمەن, ولار ءسال كەيىنىرەك قالا سىرتىنان تابىلىپ, كوزدەرى جويىلدى. ەكىنشى توپ اۆتوبۋستى باسىپ الىپ, جولاۋشىلاردى ءتۇسىرىپ جىبەرگەن. وسىدان كەيىن ۇلتتىق گۆارديانىڭ 6655 اسكەري ءبولىمى اۋماعىنا كىرەبەرىس قاقپانى اۆتوبۋسپەن بۇزىپ كىرگەن جانە اسكەري قىزمەتشىلەرمەن, وقيعا ورنىنا جەتكەن پوليتسيامەن اتىسقان. قارۋلى قارسىلىققا تاپ بولعان قىلمىسكەرلەردىڭ ءبىر توبى توسقاۋىلعا ءتۇسىپ قالسا, ەكىنشى توبى قاشىپ كەتكەن. اتىس بارىسىندا 1 قىلمىسكەر ءولىپ, تاعى ءبىرى جاراقاتتانعان. ال ۇلتتىق گۆارديانىڭ 3 اسكەري قىزمەتشىسى قازا تاۋىپ, 6-ۋى جارالانعان. ولاردىڭ بارلىعى دا قارۋسىز بولعان, ىشكى رەجىمگە سايكەس قىزمەتتەرىن اتقارىپ جۇرگەن», دەدى مينيستر.
ق.قاسىموۆ قازىرگى ۋاقىتتا اقتوبە وبلىسىندا لاڭكەستىككە قارسى وپەراتسيا رەجىمى ەنگىزىلگەنىن, ەلىمىزدىڭ ىشكى ىستەر ورگاندارىنىڭ بارلىق جەكە قۇرامى كۇشەيتىلگەن قىزمەتكە كوشىرىلگەنىن اتاپ ءوتتى.
«ىشكى ىستەر مينيسترلىگى جەرگىلىكتى اتقارۋشى ورگاندارمەن بىرلەسىپ, قازا تاپقان جانە جاراقاتتانعان ۇلتتىق گۆارديانىڭ اسكەري قىزمەتشىلەرى مەن پوليتسيا قىزمەتكەرلەرىنىڭ وتباسىنا ماتەريالدىق كومەك كورسەتۋ شارالارىن قابىلداۋدا», دەدى مينيستر.
بۇدان كەيىن اقتوبە قالاسىنداعى قوعامدىق-ساياسي جاعداي جونىندە وبلىس اكىمى بەردىبەك ساپارباەۆ حابارلادى.
«قازىرگى كەزدە وبلىستا قوعامدىق-ساياسي جاعداي تۇراقتى جانە جەرگىلىكتى اتقارۋشى جانە قۇقىق قورعاۋ ورگاندارىنىڭ تولىقتاي باقىلاۋىندا تۇر. قاراقشىلىق شابۋىل تۋرالى مالىمەت كەلىپ تۇسكەننەن كەيىن جەرگىلىكتى ءباسپاسوز, الەۋمەتتىك جەلىلەر ارقىلى حالىققا سابىرلىق تانىتىپ, عيماراتتان شىقپاۋ, ءجۇرىستى شەكتەۋ تۋرالى حابار بەرىلدى», دەدى ب.ساپارباەۆ.
وبلىس اكىمىنىڭ ايتۋىنشا, وڭىرلىك جەدەل شتاب قۇرىلىپ, ىشكى ىستەر دەپارتامەنتى باستىعىنىڭ جەتەكشىلىگىمەن لاڭكەستىككە قارسى ورتالىق جۇمىس ىستەپ تۇر. بارلىق قۇقىق جانە ارناۋلى ورگاندار اراسىنداعى ءىس-قيمىل ۇيلەستىرىلگەن. بارلىق كوممۋنالدىق قىزمەتتەر, قوعامدىق كولىكتەر, مەديتسينالىق مەكەمەلەر شتاتتىق رەجىمدە جۇمىس ىستەۋدە.
«ۇلتتىق بىرىڭعاي تەستىلەۋ 7 ماۋسىمعا اۋىستىرىلدى. تولىقتاي العاندا وبلىس حالقى لاڭكەستىككە قارسى وپەراتسيانىڭ جۇرگىزىلۋىنە ءتۇسىنىستىكپەن قاراۋدا. قازا تاپقان اسكەري قىزمەتشىلەردىڭ وتباسىلارىنا ماتەريالدىق كومەك كورسەتىلەتىن بولادى», دەدى ب.ساپارباەۆ.
ۇلتتىق بىرىڭعاي تەستىلەۋ 7 ماۋسىمعا اۋىستىرىلعانىنا بايلانىستى اقپاراتتى ءبىلىم جانە عىلىم ءمينيسترى ەرلان ساعاديەۆ تولىقتىرىپ ءوتتى.
«كەشە كەشكىسىن بالالاردىڭ قاۋىپسىزدىگى ءۇشىن ەكى پۋنكتتەگى ۇلتتىق بىرىڭعاي تەستىلەۋدى وتكىزۋ مەرزىمىن 7 ماۋسىمعا اۋىستىرۋ تۋرالى شەشىم قابىلداندى. اتا-انالار مەن ۇستازدارعا قاجەتتى مالىمەتتەر بەرىلدى. بارلىق پۋنكتتەردە ۇبت شتاتتىق رەجىمدە جۇرگىزىلۋ ۇستىندە. ەگەر ءسىزدىڭ تارابىڭىزدان تاپسىرما بولاتىن بولسا, وندا مەن اقتوبەگە ءوزىم بارىپ, جاعدايدى باقىلاۋعا الامىن», دەدى مينيستر پرەمەر-مينيسترگە قاراتا ايتقان سوزىندە. كارىم ءماسىموۆ ەرلان ساعاديەۆكە اقتوبەدە ۇلتتىق بىرىڭعاي تەستىلەۋدىڭ دۇرىس ءوتۋىن باقىلاۋعا الۋدى تاپسىردى.
«بارىڭىز, جينالىستان كەيىن ۇشىپ كەتىڭىز. وبلىس اكىمىمەن بىرلەسىپ, بۇل ماسەلەنى باقىلاۋعا الىڭىز», دەدى ۇكىمەت باسشىسى. ال دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا وقيعادان جاراقات العاندار سانىن مالىمدەدى.
«ءدال قازىرگە دەيىن 38 ادام مەديتسينالىق كومەك الىپ, 2-ەۋى قازا تاپتى. جەڭىل-جەلپى جارالانعان 15 ادام قابىلداۋ بولمەلەرىندە قارالىپ, امبۋلاتوريالىق ەمدەلۋگە جىبەرىلدى. 20 ادام اۋرۋحاناعا جاتقىزىلدى. ونىڭ ىشىندە 14-ىنە وتا جاسالدى, تاعى 3-ەۋىنە قازىر وتا جاسالۋدا. 9 ادامنىڭ جاعدايى وتە اۋىر. كەشە 6 جەتەكشى حيرۋرگ مىنگەن سانيتارلىق اۆياتسيا ۇشىپ كەتتى. وتا جاساۋعا تولىق قاتىستى. ولار بۇگىن تاڭەرتەڭ ورالدى», دەدى ت.دۇيسەنوۆا.
بۇل ماسەلەگە وراي قورىتىندى سوزىندە ۇكىمەت باسشىسى وقيعاعا قاتىستى قولعا الىنعان ءىس-شارالاردى ءجىتى قاداعالايتىنىن اتاپ ءوتتى.
«مەملەكەت باسشىسى بۇل ماسەلەنى ءوز باقىلاۋىندا ۇستاپ وتىر. كۇش-قۋات ورگاندارى بۇل وپەراتسيانى سوڭىنا دەيىن جۇرگىزۋى ءتيىس. اكىمدىكتەر, بارلىق مەملەكەتتىك ورگاندار سايكەسىنشە شارالار قابىلداۋى قاجەت. ال ودان ءارى قاراي قورىتىندى شىعاراتىن بولامىز. ءبىز بۇل رەتتە بىرقاتار كەشەندى شارالار قابىلداۋىمىز كەرەك. مەملەكەت باسشىسىنىڭ تاپسىرماسىنا سايكەس بۇل ماسەلەنى مەن ءوز باقىلاۋىما الامىن», دەدى ك.ءماسىموۆ.
دينارا بىتىكوۆا,
«ەگەمەن قازاقستان»