استانا. 5 ماۋسىم. بۇگىن, جەكسەنبى كۇنى اقتوبە قالاسىندا بولعان اتىستىڭ سالدارىنان التى ادام قازا تاپتى. بۇل تۋرالى ىشكى ىستەر مينيسترلىگىنىڭ رەسمي وكىلى الماس سادۋباەۆتىڭ مالىمەتى نەگىزىندە «قازاقستان جاڭالىقتارى» جەتكىزگەن اقپارعا سۇيەنگەن egemen.kz ءتىلشىسى حابارلادى.
الماس سادۋباەۆتىڭ ايتۋىنشا, وبلىستىق ىشكى ىستەر دەپارتامەنتىنە بەلگىسىز بىرەۋلەردىڭ اقتوبەدەگى قارۋ ساتاتىن «پالادا» دۇكەنىنە, ال ساعات 15:45 (استانا ۋاقىتى بويىنشا) شاماسىندا باسقا قارۋ ساتاتىن ماگازين مەن ۇلتتىق ۇلان اسكەر بولىمىنە شابۋىل جاساعانى تۋرالى دابىل تۇسكەن. شابۋىل بارىسىندا «پاللادا» دۇكەنىنىڭ ساتۋشىسى قازا تاپقان, تاعى ءبىر ادام جاراقاتتانىپ قالعان. سونىڭ ىشىندە شابۋىلعا تويتارىس بەرۋ كەزىندە ءبىر وفيتسەر مەن شارتپەن الىنعان ءبىر اسكەري قىزمەتكەر قازا تاۋىپ, توعىز اسكەري قىزمەتكەر جارالانعان. قابىلدانعان شارالاردىڭ ناتيجەسىندە شابۋىل جاساۋشىلاردىڭ ۇشەۋى جەر جاستاندىرىلعان, ءبىر قاراقشى جاراقات العان. وسى شايقاستا بىرنەشە قىلمىسكەردى اۋىزدىقتاۋدىڭ ورايى كەلگەن. تاعى بىرنەشە شابۋىل جاساۋشى قۇرساۋدان قۇتىلىپ كەتكەن.
قازىر الىنعان اقپارلارعا قاراعاندا, ولاردى قولعا ءتۇسىرۋدىڭ امالدارى جاسالىپ جاتىر. شابۋىل جاساعاندار, بولجام بويىنشا, ءداستۇرلى ەمەس راديكالدى ءدىني اعىمداردىڭ مۇشەلەرى كورىنەدى.
«اقتوبەدە انتيتەررورلىق وپەراتسيا رەجيمى جاريالانىپ, كوڭىل كوتەرەتىن مەكەمەلەر جۇمىسى مەن قوعامدىق كولىكتەر قوزعالىسى توقتاتىلدى», – دەلىنگەن حابارلامادا.
تالعات رايىمبەك.
دەرەك: قازاقستان جاڭالىقتارى.
فوتو, ۆيدەو: دياپازون.