قوستاناي. 5 مامىر. قوستانايدا بيىل «مەرەيلى وتباسى» بايقاۋى ءۇشىنشى رەت وتكىزىلدى. سولودوۆتار وتباسى ەندى رەسپۋبليكالىق بايقاۋدا قوستانايلىقتار نامىسىن قورعايتىن بولادى. بۇل تۋرالى egemen.kz ءتىلشىسى حابارلادى.
بايقاۋ بارلىق جەردەگى سەكىلدى ءۇش اتالىممەن ءوتتى. وسى ءۇش اتالىم بويىنشا اۋداندار مەن قالالاردا 172 وتباسى ءوزىنىڭ باعىن سىناپ كورۋگە ۇسىنىس بەرگەن بولاتىن. سولاردىڭ اراسىنان 20 وتباسى وبلىستىق بايقاۋعا قاتىستى. الدىمەن «ونەگەلى وتباسى» اتالىمى بويىنشا تاران اۋدانىنان ءۇش قىز, ەكى ۇل تاربيەلەپ وتىرعان مارات پەن گۇلسىم شوڭعالوۆتار وتباسى جەڭىمپاز اتاندى.ولارعا ارنايى ديپلوم مەن 150 مىڭ تەڭگە تابىس ەتىلدى. «پاراساتتى وتباسى» اتالىمى بويىنشا جانگەلدين اۋدانىنىڭ تۇرعىنى, بەس بالا تاربيەلەپ وسىرگەن بەيبىت پەن قاپۋزا جۇسىپبەكوۆتەردىڭ وتباسى جەڭىسكە جەتتى.ولارعا دا ديپلوم مەن تۇرمىستىق تەحنيكا الۋى ءۇشىن 150 مىڭ تەڭگە تابىستالدى.
ال «مەرەيلى وتباسى» اتالىمىندا قوستاناي قالاسىندا تۇراتىن گريگوري مەن ءفانيا سولودوۆتاردىڭ مەرەيى ۇستەم بولدى. ورىس گريگوري مەن قازاق قىزى ءفانيا وسىدان 56 جىل بۇرىن تانىسىپ, شاڭىراق كوتەرگەن ەدى. ولار ەكى بالا تاربيەلەدى. قازىر ولاردىڭ شاڭىراعىندا ءتورتىنشى ۇرپاق ءوسىپ جاتىر, سولودوۆتار شوبەرەسىن ءسۇيىپ وتىر. سولودوۆتار اۋلەتىندە 49 ناگرادا, كوپتەگەن العىس حاتتار ساقتاۋلى, وتلاردىڭ جالپى ەڭبەك ءوتىلى 195 جىلعا جەتىپتى. بەس جىل بۇرىن گريگوري اقساقل مەن ءفانيا اپامىز التىن تويىن تويلادى.
سولودوۆتاردىڭ ۇلى ۆالەري سولودوۆ: «اتا-انام - مەنىڭ ۇلگىم, ماقتانىشىم. وتباسىندا بەرەكە بولسا, مەملەكەتىمىزدە دە ءتارتىپ, بايلىق بولادى», – دەدى. سولودوۆتارعا ديپلوم مەن 300 مىڭ تەڭگە سىيلىق تارتۋ ەتىلدى.
ەندى بۇل وتباسى رەسپۋبليكالىق «مەرەيلى وتباسى» بايقاۋىنا قوستاناي وبلىسى اتىنان قاتىساتىن بولادى.
ءنازيرا جارىمبەتوۆا.
دەرەك, فوتو: egemen.kz.