استانا. 5 ماۋسىم. قىزىلوردا وبلىسى اكىمى قىرىمبەك كوشەرباەۆ جاس قۇرىلىسشىلار جاساعىمەن كەزدەستى. وندا وڭىردەگى جاستاردى ەڭبەككە تارتۋ ماسەلەسى ءسوز بولىپ, 516 قۇرىلىسشى جۇمىسقا ورنالاسۋ جولداماسىن الدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
جاس قۇرىلىسشىلار جاساعانىڭ جەتەكشىسى سادىربەك جۇمابەكوۆ ايماق باسشىسىنا جۇمىسسىز جاستاردىڭ ماسەلەسىن ايتىپ, قولداۋ كورسەتۋىن سۇرادى. وبلىس اكىمى قىرىمبەك كوشەرباەۆ جاس قۇرىلىسشىلار جاساعىنىڭ ۇسىنىسىن قولداپ, وبلىستا ءجۇرىپ جاتقان قۇرىلىس نىساندارىندا بۇگىننىڭ وزىندە 516 جاستىڭ جۇمىسقا تۇرۋىنا مۇمكىندىك بار ەكەنىن ايتتى.
«مەن ءوزىم دە قۇرىلىسشىمىن. ەڭبەك جولىمدى سىزدەر سياقتى جاس قۇرىلىسشىلار وتريادىنان باستاعانمىن. قازىر وبلىسىمىزدا قۇرىلىس كولەمى ارتىپ, اۋقىمدى جۇمىستار اتقارىلىپ جاتىر. سوندىقتان جاس قۇرىلىسشىلارعا قولداۋ كورسەتۋگە ءبىز دايىنبىز. وڭىردەگى كومپانيالارعا 500-دەن استام جۇمىسسىز جۇرگەن قۇرىلىسشىلاردى جۇمىسقا ورنالاستىرۋ تۋرالى كەلىسىم بار», – دەدى وبلىس اكىمى قىرىمبەك كوشەرباەۆ.
ايتا كەتۋ كەرەك, جاس قۇرىلىسشىلاردىڭ جاساعى ارقىلى 2013 جىلدان بەرى 900-گە جۋىق جاس وبلىس كولەمىندەگى جۇرگىزىلىپ جاتقان قۇرىلىس نىساندارىنا جۇمىسقا ورنالاسقان.
قازىر قىزىلوردا وبلىسى قۇرىلىس سالۋ كولەمى بويىنشا رەسپۋبليكادا كوشباسشى ايماقتاردىڭ قاتارىندا. تەك 2015 جىلدىڭ وزىندە قىزىلوردا قالاسىندا 54 كوپقاباتتى تۇرعىن ءۇي سالىنىپ, 2684 سىربويىلىق باسپانالى بولدى. ال بيىل 75 كوپقاباتتى تۇرعىن ءۇي بوي كوتەرەدى دەپ جوسپارلانىپ وتىر.
تالعات رايىمبەك.
دەرەك, فوتو: قىزىلوردا وبلىسى اكىمدىگىنىڭ ءباسپاسوز قىزمەتى.