مەملەكەتتىك رامىزدەر كۇنىنە وراي تالدىقورعاندا مەملەكەتتىك تۋ ەرەكشە تۇعىرعا ورناتىلىپ, 92 مەتر بيىكتىكتە جەلبىرەدى. بۇل ولشەمنىڭ ماعىناسى سول, 1992 جىلى 4 ماۋسىمدا مەملەكەتتىك رامىزدەر قابىلدانعاندىقتان, كوك بايراقتىڭ بيىكتىگى 92 مەترگە كوتەرىلىپ تۇر. ال تۋدىڭ ۇزىندىعى – 25 مەتر, ەنى – 12,5 مەتر.
سالتاناتتى جيىندى الماتى وبلىسىنىڭ اكىمى اماندىق باتالوۆ ەلباسىنىڭ «ءبىز تاۋەلسىزدىككە قول جەتكىزدىك, ەندى سول تاۋەلسىزدىكتىڭ قاسيەتتى بەلگىلەرىن دە ەرەكشە قادىرلەۋىمىز كەرەك. ءاربىر ازامات قازاقستاننىڭ تۋىن, ەلتاڭباسىن, ءانۇرانىن تۇمارداي قاسيەت تۇتۋى ءتيىس», – دەگەن سوزىمەن اشىپ, كوك بايراقتى تالدىقورعان تورىندە جەلبىرەتتى.
سونىمەن الماتى, استانا قالالارىنداعىداي الىپ تۇعىرلى تۋ تالدىقورعان تورىندە دە كوتەرىلىپ, جەتىسۋلىقتار مەرەيىن تاسىتتى. كۇن ساناپ ءسانى كىرىپ, سالتاناتى تاسىعان جەتىسۋدىڭ كىندىك قالاسىنىڭ كىرەبەرىسىندە جەلبىرەگەن تۋ جارىسا بوي كوتەرگەن ون - ون ەكى قاباتتى عيماراتتاردان ەڭسەسى الدەنەشە ەسە اسىپ تۇرعانى كورگەن جاندى ءسۇيسىنتىپ, اتىنا زاتى ساي ەكەندىگىن ايقىن اڭعارتادى.
نۇربول الدىباەۆ,
«ەگەمەن قازاقستان»
تالدىقورعان