باس پروكۋراتۋرادا بالالاردى قورعاۋ كۇنىنە جانە قازاقستان رەسپۋبليكاسىنىڭ مەملەكەتتىك رامىزدەر كۇنىنە ارنالعان «مەنىڭ الەمىم – يا ريسۋيۋ مير» اتتى اسفالتقا سۋرەت سالۋدان بالالار بايقاۋى ءوتتى.
بايقاۋ استانا قالاسىندا ورنالاسقان پروكۋراتۋرا ورگاندارى قىزمەتكەرلەرىنىڭ 12 جاسقا دەيىنگى بالالارى ءۇشىن ۇيىمداستىرىلدى. ەلوردانىڭ جاس تۇرعىندارىن باس پروكۋرور جاقىپ اسانوۆ قۇتتىقتادى. ول اتاپ وتكەندەي, وسى بايقاۋ ەل تاۋەلسىزدىگىنىڭ جانە پروكۋراتۋرا ورگاندارىنىڭ 25 جىلدىعىنا وراي باس پروكۋراتۋرا جاريالاعان «تاۋەلسىز ەلدىڭ ەرتەڭى» – «بۋدۋششەە نەزاۆيسيموي سترانى» دەگەن جالپى تاقىرىپپەن پروكۋراتۋرا ورگاندارى قىزمەتكەرلەرىنىڭ بالالارىن قاتىستىرا وتىرىپ وتكىزۋ جوسپارلانعان 25 ءىس-شارانىڭ العاشقىسى بولىپ وتىر.
ءىس-شارالاردى جازعى دەمالىس كەزىندە اپتا سايىن وتكىزۋ جوسپارلانىپتى. ءارتۇرلى تاقىرىپتىق, سپورتتىق, شىعارماشىلىق, ينتەللەكتۋالدىق, ادەبي, مۋزىكالىق جانە وزگە دە بالالار بايقاۋلارىن ۇيىمداستىرۋ كوزدەلگەن. بالالار مەرەكەلىك كوڭىل-كۇيدە پاتريوتتىق تاقىرىپتارعا اسفالتقا سۋرەت سالدى, فلەش-موب بيلەپ, شار ۇشىردى. بايقاۋ قورىتىندىسى بويىنشا قاتىسۋشىلارعا گراموتالار جانە ەستەلىك سىيلىقتار تابىس ەتىلدى.
«ەگەمەن-اقپارات»