تەمىرجول باسشىلارى ەۋرازيا جاڭا كولىك ءدالىزىن دامىتۋ بولاشاعىن تالقىلادى
«قازاقستان تەمىر جولى» ۇك» اق پرەزيدەنتى اسقار مامين كۇنى كەشە سوچي قالاسىندا «ستراتەگيالىق سەرىكتەستىك 1520» XI حالىقارالىق تەمىرجول بيزنەس فورۋمىنا قاتىستى. ول «اعىمداعى جاعدايدا جاڭا مۇمكىندىكتەردى قالاي انىقتاۋعا بولادى؟» دەگەن تاقىرىپ بويىنشا فورۋمداعى كەزەكتى سەسسيادا ءسوز سويلەدى.
«قازاقستان تەمىر جولى» ۇك» اق باسشىسى ەۋرازيالىق كولىك ءدالىزىن دامىتۋ بولاشاعىنا بايلانىستى ءوزىنىڭ كوزقاراسىن تانىستىردى. ول ەۋرازيالىق قۇرلىقارالىق كولىك ءدالىزىن قۇرۋداعى قازاقستاننىڭ ترانزيتتىك الەۋەتىن اتاپ ءوتتى. قازىرگى كەزدە قازاقستاندا ەۋرازيالىق لوگيستيكالىق حابىن قۇرۋعا وتە زور نازار اۋدارىلىپ وتىرعاندىعىن ءمالىم ەتتى.
– وسى ماقساتتا «نۇرلى جول» باعدارلاماسى قابىلدانىپ, «100 ناقتى قادام» ۇلت جوسپارى جاسالدى. پرەزيدەنت نۇرسۇلتان نازارباەۆ 2020 جىلعا قاراي ەل اۋماعى ارقىلى ترانزيتتىك تاسىمال كولەمىن ەكى ەسەگە ۇلعايتۋ تۋرالى تاپسىرما بەردى, – دەپ اتاپ ءوتتى ا. مامين.
ول ءوز بايانداماسىندا سوڭعى التى جىل ىشىندە قازاقستاندا جالپى ۇزىندىعى 1700 شاقىرىم بولاتىن جاڭا تەمىرجول جەلىسى سالىنعاندىعىن جينالعاندارعا جان-جاقتى باياندادى.
– ءبىزدىڭ ەلىمىز ارقىلى سالىنعان لوگيستيكالىق ينفراقۇرىلىم 1520 كەڭىستىگى تەمىرجول تابانىمەن قىزمەت كورسەتەتىن قىتاي, ەۋروپا, يران جانە پارسى شىعاناعى ەلدەرىنە ىقپالداسۋدى كۇشەيتتى. بۇل ءوز كەزەگىندە بالامالى تەڭىز جولىنان باس تارتىپ, 1520 كەڭىستىگىندە باسەكەلەستىكتى كۇشەيتتى, – دەدى «قازاقستان تەمىر جولى» اق باسشىسى. – قازاقستاننىڭ وتكىزۋ مۇمكىندىگى ارقىلى اقتاۋ پورتىن كەڭەيتۋ, قۇرىق پاروم كەشەنى قۇرىلىسىن سالۋ, «قورعاس – شىعىس قاقپاسى» اەا-نى دامىتۋ, ىشكى جانە سىرتقى تەرمينالدىق جەلىنى كۇشەيتۋ كوزدەلىپ وتىر.
قازاقستان ارقىلى وڭتايلى ترانزيتتىك دالىزدەر (قحر – ەۋروپا – قحر, سولتۇستىك-وڭتۇستىك, تحكب) جاساقتالۋدا. 2020 جىلدارعا قاراي وسى دالىزدەردىڭ الەۋەتىن ەكى ميلليون دفە-گە جەتكىزۋ جوسپارلانعان. 2016 جىلى قحر – ەو – قحر باعدارىنداعى كونتەينەرلىك تاسىمال كولەمىن 2015 جىلمەن سالىستىرعاندا ەكى ەسەگە ارتتىرىپ, 100 مىڭ دفە كونتەينەرگە جەتكىزۋ ۇيعارىلدى. بيىلعى ءتورت ايداعى كورسەتكىش وتكەن جىلمەن سالىستىرعاندا ەكى جارىم ەسەگە ءوستى.
اسقار ءماميننىڭ ايتۋىنشا, «قازاقستان تەمىر جولى» ۇك» اق بەلسەندى ارەكەتىنىڭ ارقاسىندا قحر – ەۋروپا – قحر باعدارىندا جۇردەك كونتەينەرلىك تاسىمالعا سۇرانىس ارتىپ كەلەدى. وعان قىتايدىڭ شاعىن قالالارى مەن پروۆينتسيالارىنىڭ جۇك ءجونەلتۋگە قىزىعۋشىلىعى جوعارى.
2014 جىلى ەۋرازيالىق نارىققا كونتەينەرلىك سەرۆيستىك قىزمەت كورسەتۋ ساپاسى – ءبىرلەسكەن كولىكتىك-لوگيستيكالىق كومپانيا (بكلك) ىرگەتاسى قالانعاندىعىن دا ەسكە سالدى. «بكلك ءبىرىڭعاي باعا ساياساتى, كولىكتىك-لوگيستيكالىق قىزمەت تەحنولوگياسى جانە ستاندارتتاۋ ىستەرى قىتاي – ەۋروپا – قىتاي باعدارىنداعى كونتەينەرلىك جۇك تاسىمالىن 2020 جىلعا قاراي 800 مىڭ دفە-گە جەتكىزۋگە مۇمكىندىك اپەرەدى.
قتج باسشىسى سونداي-اق شىعىس-باتىس جانە سولتۇستىك-وڭتۇستىك باعدارىنداعى ترانسقۇرلىقتىق كولىك دالىزدەرىن يگەرۋدىڭ ماڭىزى زور ەكەندىگىنە توقتالىپ, بۇل ماقساتتا كەدەرگىلەردى بارىنشا ازايتىپ, تەڭىز باعدارىنا باسەكەلەس رەتىندە قۇرعاق پورت ارقىلى تاسىمالداۋداعى تاريف ساياساتىن دا قالىپتاستىرۋدىڭ مانىنە توقتالدى.
بۇگىنگى تاڭدا ترانزيتتىك كونتەينەرلىك تاسىمالداۋدىڭ گەوگرافيالىق اۋماعى كەڭەيىپ كەلەدى. ترانسكاسپي حالىقارالىق كولىك باعدارىمەن Nomad Express كونتەينەرلىك سەرۆيستىك قىزمەتىنىڭ باعدارى جۇرگىزىلدى. ونىڭ العاشقى قاناتقاقتى جوباسى قىتايدان ازەربايجانعا, تۇركياعا جانە ۋكراينادان قىتايعا قاراي كونتەينەرلىك پويىزدار جىبەرىلدى.
بيىلعى جىلى 53 كونتەينەرلىك پويىزدى قىتاي – باكۋ, قىتاي – تبيليسي, قىتاي – ىستانبۇل باعدارىمەن جىبەرۋ جوسپارلاندى. سونىمەن بىرگە, بالتىق جاعالاۋى ەلدەرىمەن قارا تەڭىز ارقىلى Nomad Express كونتەينەرلىك قىزمەتىن قازاقستان, ورتالىق ازيا, قىتايعا باعىتتاۋ جوسپارى دا بار. ترانسكاسپي باعدارىنىڭ الەۋەتى ازيانى ەۋروپامەن جالعاستىرىپ, 2020 جىلدارعا قاراي 300 مىڭ دفە كونتەينەرىنە جەتكىزىلمەك.
ۇستىمىزدەگى جىلى قازاقستان تەمىرجولى تاريحىندا تۇڭعىش رەت يرانعا كونتەينەرلىك پويىز يۋ قالاسىنان (قىتاي) تەگەرانعا (يران) بارلىعى 9 مىڭ شاقىرىمعا جۇكتى 14 تاۋلىكتە جەتكىزدى. «قازاقستان تەمىر جولى» ۇك» اق بارلىق باعدارلارعا تەمىرجول, تەڭىز جانە اۋە جولى, اۆتوتاسىمالداۋ, پورتتىق جانە اۋەجايلىق ينفراقۇرىلىم, قويمالار مەن تەرمينالدار بويىنشا كولىكتىك-لوگيستيكالىق قىزمەت تۇرلەرىن كورسەتەدى.
كومپانيا پرەزيدەنتى سىرتقى ەكونوميكالىق قاتىناسقا قاتىسۋشىلاردى اكىمشىلىك كەدەرگىلەردى بارىنشا ازايتىپ, قۇقىقتىق-نورماتيۆتىك بازالارىن جابدىقتاۋدى جەتىلدىرىپ, كەدەندىك رەسىمدەۋدى وڭتايلاندىرىپ, شەكارالىق وتكەلدەر ارقىلى وتكىزۋدى جەدەلدەتۋ ءۇشىن قاعاز تۇرىندەگى قۇجات اينالىمىن قىسقارتۋدى, جۇكتەردى الىپ ءجۇرۋدىڭ ەلەكتروندى ىلەسپە قۇجاتتارىن ۇسىنۋ قىزمەتىن جاساقتاۋدى ۇسىندى.
«مۇنداي كەشەندى شارالاردىڭ بارلىعى ترانزيتتىك الەۋەتتى تولىققاندى قولدانۋعا, مۋلتيمودالدى تاسىمالداۋدى ۇيىمداستىرۋعا, ونىڭ ىشىندە قازاقستاننىڭ 2020 جىلعا قاراي لوگيستيكالىق قىزمەتى جەتىلگەن 40 ەلدىڭ قاتارىنا كىرۋىنە مۇمكىندىك جاسايدى», – دەپ اتاپ ءوتتى قورىتىندى سوزىندە اسقار مامين.
فورۋم اياسىندا «قتج» ۇك» اق پەن «رتج» ااق اراسىندا حالىقارالىق جۇك تاسىمالى باعدارىنداعى ەلەكتروندى قۇجات الماسۋ سالاسى بويىنشا كەلىسىمگە قول قويىلدى.
***
«ستراتەگيالىق سەرىكتەستىك 1520» حالىقارالىق تەمىرجول بيزنەس فورۋمى ەۋروپا مەن ازيا اراسىنداعى اۋقىمدى ديسكۋسسيا الاڭى بولىپ تابىلادى. جىلما جىل وسى فورۋم اياسىندا ءىرى ستراتەگيالىق تەمىرجول باعدارلارىن دامىتۋ تۋرالى «كەڭىستىك 1520» حالىقارالىق كەلىسىمدەرى جاسالىپ, سونداي-اق, تەمىرجول تەحنيكالارىن جەتكىزۋ مەن وعان تەحنيكالىق قىزمەت كورسەتۋ تۇرلەرى بويىنشا ۋاعدالاستىقتارعا قول قويىلادى.
اتالمىش فورۋمنىڭ اۋديتورياسىندا تمد, ەۋرووداقتىڭ جەتەكشى كومپانيالارى مەن الەمنىڭ وتىزدان استام ەلىنەن كەلگەن وكىلدەر قاتىستى.
مارات اققۇل,
«ەگەمەن قازاقستان»