تاعزىمىنىڭ ءتۇرى وسى ما؟

ساياسي قۋعىن-سۇرگىن قۇر­بان­دارىن ەسكە الۋ كۇنىنىڭ قارساڭىندا شەت اۋدانىنىڭ ورتالىعى اقسۋ-ايۋلى كەنتىنە جول ءتۇستى. سول ساپار بارىسىندا ولكە تاريحىنىڭ جوقشىسى, تۇنىپ تۇرعان شەجىرە قارت كامەل قاجى جۇنىستەگىمەن ەمىن-ەركىن وتىرىپ اڭگىمەلەسۋدىڭ ءساتى تۇسكەن ەدى. زادى, جازۋشى كامەل ءجۇنىس­تەگىن عۇمىر بويى مازالاپ كەلە جاتقان تاقىرىپتىڭ ءبىرى – سوناۋ زۇلمات زاماندا ناقاقتان وققا ۇشقان جازىقسىز جانداردىڭ تالايلى تاعدىرى. جاسى سەكسەنگە تاياپ قالعان كامەكەڭ قارعىس اتقىر كەزەڭنىڭ قۇرباندارى توپ-توبىمەن جەرلەنگەن تۇستاردى بەس ساۋساعىنداي بىلەدى. سولاردىڭ باسىنا بەلگىتاس قويىپ, بۇگىنگى مامىراجاي تىرلىكتىڭ تىنىشتىعى مەن توقتىعى تەربەگەن پەندە بالالارىنىڭ ەسىنە سالىپ وتىرۋ – ول كىسىنىڭ ءوز موينىنا سانالى تۇردە العان بورىشى. وسىدان ونشاقتى جىل بۇرىن-اۋ دەيمىن, شەت اۋدانىنىڭ ورتالىعى اقسۋ-ايۋلى كەنتىندە ساياسي قۋعىن-سۇرگىن قۇرباندارىنا ارنالىپ ەسكەرتكىش ورناتىلعان بولاتىن. ول كەزدە بۇل ەسكەرتكىش ەڭسەلى ءھام اسەم-اق تۇعىن. قارا گرانيتپەن قاپتالعان تۇعىردىڭ ۇستىنە شانشىلعان ۋىقتار شاڭىراقتى كوتەرىپ تۇرعان. بۇل كۇندە سول ەسكەرتكىشتەن جوبا جوق, جۇرناق قانا قالعان. دالانىڭ دولى جەلى ەسكەرتكىشتىڭ ۋىقتارىن قيراتىپ, شاڭىراعىن ورتاسىنا ءتۇسىرىپ كەتكەن. تۇعىردىڭ تىسى گرانيتپەن قاپتالعان دەپ جۇرسەك, ونىسى قىتايدىڭ ارزانقول پليتكاسى بولىپ شىقتى. سول شىركىندەر ءار-ءار جەردەن شىتىناي سىنىپ, جەرگە قيراپ ءتۇسىپ جاتىر... «بۇل قالاي ءوزى؟» دەپ اۋداندىق اكىمدىككە بارعانىمىزدا, اۋداننىڭ تاعايىندالعانىنا ءبىر ايدىڭ عانا ءجۇزى بولعان اكىمى مارات جانداۋلەتوۆ جينالىس وتكىزىپ جاتىر ەكەن. تۇسكە دەيىن دە, ودان كەيىن دە اكىم مىرزاعا, ول كىسىنىڭ ازامات ءابىلدين دەگەن ورىنباسارىنا جولىعۋدىڭ مۇمكىندىگى تۇسپەي-اق قويعانى. البەتتە, اكىمنىڭ الگى جينالىس­تا ەسكەرتكىشتى قالپىنا كەلتىرۋ جونىندە ماسەلە قوزعاپ جاتپاعانى بەلگىلى ەدى. ويتكەنى, سول كۇننىڭ ەرتەڭى, ياعني 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى-تۇعىن. اكىم تۇندە اي جارىعىمەن بىردەڭەنى امالداماسا, ۇلگەرمەيتىنى انىق ەدى... ايتپاقشى, توز-توز بولعان تۇعىردىڭ ۇستىندە جاتقان جالعىز ازاگۇلدى كوردىك. ازا تۇتىپ, تاعزىم ەتكەن اكىمنىڭ ءىسى شىعار دەپ توپشىلادىق... قايرات ءابىلدينوۆ, «ەگەمەن قازاقستان» قاراعاندى وبلىسى, شەت اۋدانى