قوستاناي. 30 مامىر. قوستاناي قالاسىندا جول شەتىندە كەتىپ بارا جاتقان ەكى ادامدى باسىپ كەتكەن كولىك جۇرگىزۋشىسى وقيعا ورنىندا ۇستالدى. ونىڭ ەسىرتكى پايدالانعانى بەلگىلى بولدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
قوستاناي اۋداندىق ىشكى ىستەر ءبولىمى جول تەحنيكالىق ينسپەكتسياسىنىڭ قىزمەتكەرى تاڭات الماعامبەتوۆ جۇمىستان تىس كەتىپ بارا جاتىپ, كەنەت جول-كولىك وقيعاسىن بايقاپ قالادى. تۇنگى ساعات 02.00-دە «زاز-شانس» ماشيناسىنىڭ 32 جاسار جۇرگىزۋشى جول شەتىندە كەتىپ بارا جاتقان 23 جانە 26 جاسار قىز بەن جىگىتتى باسىپ كەتەدى. تاڭات جول-كولىك اپاتىنا سەبەپكەر ماشينانىڭ الدىنان توسقاۋىلداپ, قاشۋىنا مۇرشا بەرمەي ۇستايدى دا, دەرەۋ «جەدەل جاردەم» جانە پوليتسيا قۇرامىن شاقىردى. جىگىت وقيعا ورنىندا قازا تاپتى دا, قىزدى قالالىق اۋرۋحانانىڭ جان ساقتاۋ بولىمىنە اپارعاندا قايتىس بولدى.
اعا سەرجانت تاڭات الماعامبەتوۆ: «جۇرگىزۋشى جۇرگىنشىلەردى مەنىڭ كوز الدىمدا باسىپ كەتتى. مەن دەرەۋ قاشقىسى كەلگەن جۇرگىزۋشىنىڭ الدىنا كولدەنەڭ تۇردىم», – دەدى. جەرگىلىكتى پوليتسيانىڭ اعا ينسپەكتورى يۋري پاناسەنكو 1984 جىلى تۋعان جۇرگىزۋشىنىڭ قانىنان كوپ مولشەردە ەسىرتكى زاتى تابىلعانىن ايتتى.
قازىر ول ۋاقىتشا وقشاۋلاۋ ورنىندا وتىر. سوتقا دەيىنگى تەرگەۋ امالدارى باستالدى. جۇرگىزۋشى قىلمىستىق كودەكستىڭ 3 ءبولىمى, 345-بابى بويىنشا «جول ەرەجەسىن بۇزعان, ەكى جانە ودان دا كوپ ادامنىڭ ولىمىنە سەبەپكەر بولعان» دەگەن ايىپ تاعىلدى. كۇدىكتى قوستاناي قالاسىنىڭ ورتالىق كوشەسىندە باسقا جۇرگىزۋشىمەن جارىسقان.
ءنازيرا جارىمبەتوۆا.
دەرەك, فوتو: قوستاناي وبلىستىق ىشكى ىستەر دەپارتامەنتى ءباسپاسوز قىزمەتى.