جاپونيا دەگەنىنە جەتتى
استانادا كەشە كەشكىسىن «قازاقستان» سپورت سارايىندا قىتاي مەن جاپونيا قۇراما كوماندالارىنىڭ كەزدەسۋى ءوتتى. بۇل كەزدەسۋ 7:1 ەسەبىمەن جاپونيا حوككەيشىلەرىنىڭ پايداسىنا شەشىلدى.
ءا دەگەننەن-اق ويىننىڭ العاشقى كەزەڭىنەن باستاپ جاپوندىقتار شابۋىلدارىن قارقىنمەن باستادى. كەزدەسۋدىڭ سەگىزىنشى مينوتىندە كۋدزي سۋحەي ەسەپ اشتى. وسى شابىتپەن العا ۇمتىلعان ول ءبىرىنشى كەزەڭدى 3:0-گە جەتكىزىپ اياقتادى. ەكىنشى كەزەڭ دە جاپون سپورتشىلارىنىڭ ايقىن باسىمدىعىن اڭعارتىپ, ولاردى جەڭىسكە قاراي تىپتەن جىگەرلەندىرىپ جىبەردى. بۇل جولى سوعىلعان قوس شايبا ەسەپتى ەسەلەي ءتۇستى. ەسەپ – 5:0. شايبا يەلەرى – سايتو تاكەسي مەن گو تاناكا.
سوڭعى اينالىمعا دەيىن جۇلقىنا ونەر كورسەتكەن جاپوندىقتار قارسىلاستارىنىڭ اپشىسىن قۋىرۋمەن بولدى. ءۇشىنشى كەزەڭدە دە شابۋىلدى ۇدەتە ءتۇستى. ناتيجەسىندە گ. تاناكا قارسىلاستار قاقپاسىن ءدال كوزدەپ, كوماندالاستارىن العا وزدىرعان ۇستىنە وزدىرا ءتۇستى. وسىدان كەيىن قىتايلىق حوككەيشىلەر كۇتپەگەن جەردەن جاپونيا قاقپاسىنا ءبىر شايبا سوقتى. شايبانىڭ يەسى – د. ۋانگ بولدى. ايتسە دە باسىمدىق تانىتقان جاپونيا قۇراماسى ماتچتىڭ اياقتالارىنا ساناۋلى سەكونتتەر قالعاندا بۇل كەزدەسۋدىڭ سوڭعى نۇكتەسىن 7:1 ەسەبىمەن قويدى. قاقپاعا شايبانى حاگا ءدال باعىتتادى.
ءابدىراحمان قىدىربەك.
* * *
باحرەين قۇراماسى وسىنشاما شايبا وتكىزىپ الدى
كەشە «قازاقستان» سپورت سارايىنا ەرلەر اراسىندا شايبالىق حوككەيدەن باحرەين مەن تايلاند قۇراما كوماندالارىنىڭ ويىنىن تاماشالاۋعا كەلگەن جانكۇيەرلەر وسى كەزگە دەيىن ازيا ويىندارىندا تىركەلمەگەن ەسەپتىڭ كۋاسى بولدى. حوككەي جارىسىنىڭ العاشقى كۇنى قارسىلاستارىنان 25:0 ەسەبىمەن ۇتىلعان باحرەين تاي ەلىنىڭ قۇراماسىنان 29:0 ەسەبىمەن ەسە جىبەردى. تايلاند كومانداسىنىڭ ساپىندا 6 شايبانى كيم ۋاني اارولا, 5 شايبانى تەەاراساك راتتناچوت سوقتى.
وسى كۇنى قىرعىزستان بىرىككەن اراب ءامىرلىكتەرىمەن ءوزارا كۇش سىناستى. ازيادانىڭ العاشقى كەزدەسۋىن جاقسى باستاعان قىرعىز قۇراماسى وسى جولعى كەزدەسۋدە دە ءباا كومانداسىن 14:0 ەسەبىمەن جەڭدى. ولار ءبىرىنشى كەزەڭدە ەكى شايبانى, ەكىنشى كەزەڭدە 6 جانە ءۇشىنشى 20 مينوتتىكتە 5 شايبا سوقتى.
جۇلدىز ءبايدىلدا.