«قاعاز, قالام, ۋاقىت بەر ازداعان, مەن ومىرگە جىرلاۋ ءۇشىن كەلگەنمىن», دەپ ءوزى ايتقانداي, از عۇمىرىندا ارتىنا مول مۇرا قالدىرعان مۇقاعالي ماقاتاەۆتىڭ تاياپ كەلە جاتقان تۋعان كۇنىنە وراي №172 جالپى ءبىلىم بەرەتىن مەكتەپتە ادەبي كەش ءوتتى. وقۋشىلار بالا مۇقاعالي مەن دانا مۇقاعاليدىڭ بەينەسىن ساحناعا شىعاردى. «اكە, سەنىڭ جاسىڭنان اسىپ بارامىن, كەزى-كەزى كەلگەندە تاسىپ تا الام. كەزى-كەزى كەلگەندە جاسىپ قالام, مىنا ومىرگە, ءبارىبىر, عاشىق بالاڭ. وكىنبە, اكە, وتىڭ بار سونبەيتۇعىن, ول ماڭگىلىك جانادى كورمەي تىنىم. ۇرپاعىڭ بار, ەل مەنەن ەر نامىسىن, ءتىرى تۇرسا, قولىنان بەرمەيتۇعىن», دەسە بالا مۇقاعالي, «اپىرماي, تۋعان جەر-اي, تەڭدەسەر كىم, بۇل جەرگە سەن بولماساڭ كەلمەس ەدىم. كىندىگىمدى بايلاعان قازىعىم-اي, سەن بولماساڭ بۇل ماڭدى كورمەس ەدىم», دەپ تولعانادى دانا مۇقاعالي.
كەشتە اقىن ولەڭدەرى وقىلىپ, ونىڭ سوزىنە جازىلعان اندەر ورىندالدى. جازۋشى بەكسۇلتان نۇرجەكە ۇلى وقۋشىلارعا كوزىن كورىپ, ءسوزىن ەستىگەن جىر جامپوزى تۋرالى اعىنان جارىلىپ اڭگىمەلەسە, اقىندار ا.ابدىقالىق, ب.ءماجيت ۇلى ارناۋ ولەڭدەرىن وقىدى. اقىننىڭ بالاسى جۇلدىز مۇقاعالي ۇلى اكەنىڭ اسىل قاسيەتتەرىن, دارىن-قارىمىن تىلگە تيەك ەتسە, حالىقارالىق مۇقاعالي قوعامدىق قورىنىڭ پرەزيدەنتى, جىر ءدۇلد ۇلىنىڭ كەلىنى باقىتكۇل ايداروۆا اتاسىنىڭ تاياۋدا عانا باسپادان جارىق كورگەن تومدارىن, وزگە دە قۇندى زاتتاردى مەكتەپ مۇراجايىنا سىيعا تارتتى. ءبىلىم ورداسىنىڭ ديرەكتورى نۇرايىم قانابەكقىزى ارداقتى اقىندى وسىلايشا ارداقتاۋ, كەيىنگى ۇرپاققا ونىڭ ولمەس جىرى مەن وشپەس ءومىرىن ناسيحاتتاپ وتىرۋ, مۇنى داستۇرگە اينالدىرۋ ءبىزدىڭ قارىزىمىز بەن پارىزىمىز, –دەدى.
بوتا مۇقاتوۆا, باستاۋىش سىنىپ مۇعالىمى.
الماتى.