وسكەمەن. 25 مامىر. شىعىس قازاقستان وبلىسىنىڭ ۇلان اۋدانىندا سوڭعى 4 ايدا 1714 شارشى مەتر تۇرعىن ءۇي پايدالانۋعا بەرىلدى. بۇل تۋرالى شىعىس قازاقستان وبلىسى اقپاراتتىق ورتالىعىنا سىلتەمە جاساعان egemen.kz ءتىلشىسى حابارلادى.
تۇرعىن ۇيلەرمەن ءبىر مەزەتتە الەۋمەتتىك نىساندار دا ىسكە قوسىلۋدا. بۇل 23,6 پايىزدىق ءوسىمدى كورسەتەدى. اۋدان اكىمى داۋلەت باتىرباەۆتىڭ ايتۋىنشا, اۋداننىڭ دامۋى جاڭا نىسانداردىڭ ىسكە قوسىلۋىمەن باعالاناتىن بولسا, سوڭعى بەس جىلدا ۇلان اۋدانىندا 7 جاڭا مەكتەپ, 3 بالاباقشا, 2 اۋىلدىق كلۋب, 2 وتباسىلىق-دارىگەرلىك امبۋلاتوريا, 3 تۇرعىن ءۇي پايدالانۋعا بەرىلدى.
بۇگىندە «قازاقستان يپوتەكالىق كومپانياسى» اكتسيونەرلىك قوعامىنىڭ جەلىسى بويىنشا ەكى ءۇيدىڭ قۇرىلىسى اياقتالدى. «وڭىرلەردى دامىتۋدىڭ 2020 جىلعا دەيىنگى باعدارلاماسى» شەڭبەرىندە بيىل مامىر ايىندا قاسىم قايسەنوۆ كەنتىندە جالپى سوماسى 564 ميلليون تەڭگەنى قۇرايتىن 40 پاتەرلى ەكى ءۇيدىڭ قۇرىلىسى باستالدى. بۇل ۇيلەردى جىل سوڭىنا دەيىن پايدالانۋعا بەرۋ جوسپارلانىپ وتىر. سونداي-اق, تاۆريا اۋىلىندا 320 ورىندىق مەكتەپتىڭ قۇرىلىسى اياقتالادى.
ايتا كەتەيىك, وسى جىلدىڭ باستاپقى 4 ايىندا اۋدانداعى قۇرىلىس جۇمىستارى 1107,5 ميلليون تەڭگەنى قۇراپ, وتكەن جىلدىڭ بالامالى ۋاقىتىمەن سالىستىرعاندا ەكى ەسەگە ءوستى.
دۋمان اناش.
دەرەك, فوتو: شىعىس قازاقستان وبلىسى اقپاراتتىق ورتالىعى.