اتىراۋ. 25 مامىر. اتىراۋ وبلىسىنىڭ اكىمى نۇرلان نوعاەۆ تۇركيانىڭ اقتاۋ قالاسىنداعى باس كونسۋلى كورحان كەنگيۋريۋدى قابىلدادى. كەزدەسۋ بارىسىندا اكىم قوناقپەن تۇرىك تىلىندە اڭگىمەلەستى. بۇل تۋرالى egemen.kz ءتىلشىسى حابارلادى.
كەزدەسۋدە اتىراۋ وبلىسى مەن تۇركيا رەسپۋبليكاسى اراسىنداعى قارىم-قاتىناستىڭ دامۋى مەن ودان ءارى ءوربۋى ءسوز بولدى. وبلىس اكىمى نۇرلان نوعاەۆ قازاقستان تاۋەلسىزدىك العان جىلدان بەرى ەكى ەلدىڭ ساۋدا-ەكونوميكالىق سالاسىندا ىسكەرلىك قارىم-قاتىناستىڭ ورناعانىنا, وسى ورايدا, اتىراۋ وبلىسى شەتەلدىك ينۆەستورلار ءۇشىن قولايلى ايماققا اينالعانىنا توقتالدى.
ايماقتىڭ ينۆەستيتسيالىق تارتىمدىلىعىنىڭ بەلگىسى رەتىندە جالپى اۋدانى 3,5 گەكتار بولاتىن «ۇلتتىق يندۋستريالىق مۇناي-حيميالىق تەحنوپاركىن» ايتۋعا بولادى. بۇل نىساننىڭ ماقساتى – ينفراقۇرىلىمدىق نىسانداردى سالۋ, ىسكە قوسۋ, حيميالىق, مۇناي-حيميالىق جانە ارالاس وندىرىستەردى دامىتۋ. قازىرگى تاڭدا ارنايى ەكونوميكالىق ايماقتا 14 قاتىسۋشى تىركەلگەن. بيىلعى جىلدىڭ ءبىرىنشى توقسانىندا ءوڭىردىڭ سىرتقى ساۋدا اينالىمى 68,9 ميلليون دوللاردى قۇراسا, ەكسپورت كولەمى 6,4 ميلليون دوللارعا تەڭ بولعان. ستاتيستيكا دەپارتامەنتىنىڭ مالىمەتىنشە, اتىراۋ وبلىسىندا تۇركيالىق كاپيتالدىڭ ۇلەسى بار 21 كومپانيا تىركەلگەن.
كەزدەسۋ كەزىندە باس كونسۋلدىڭ اۋدارماشىسى اكىمنىڭ قازاقشا ءسوزىن تۇرىك تىلىنە اۋدارسا, قوناقتىڭ ءسوزىن تۇرىك تىلىنەن ورىس تىلىنە اۋدارىپ وتىردى. وسى كەزدە وبلىس اكىمى نۇرلان نوعاەۆ باس كونسۋلمەن تۇرىك تىلىندە سويلەسە باستادى.
«مەن بىلەتىن تۇرىكتەردىڭ ءبارى قازاقتار سويلەگەندە بايىرعى تۇرىك ءتىلىن ەستىگەندەي بولاسىڭ دەيتىن. سەبەبى, قازاق ءتىلى ەجەلگى تۇرىك تىلىنە وتە ۇقساس» – دەدى نۇرلان نوعاەۆ.
اكىمنىڭ وسى سوزىنەن كەيىن شەتەلدىك مەيماننىڭ ءسوزىن ورىسشاعا اۋدارىپ وتىرعان ءتىلماش مەملەكەتتىك تىلدە تۇسىندىرە جونەلدى.
«وتە دۇرىس ايتاسىز. قازاق ءتىلى راسىمەن ەجەلگى تۇرىك تىلىنە ۇقسايدى, – دەدى باس كونسۋل كورحان كەنگيۋريۋ – قازاقستاننىڭ باتىسى ءبىز ءۇشىن قازاقستاننىڭ قاقپاسى بولىپ ەسەپتەلەدى. قازاق جەرى تۇرىك حالقى ءۇشىن قاسيەتتى جەر سانالادى. ءبىز ەكى باۋىرلاس ەل اراسىنداعى قارىم-قاتىناستى نىعايتۋعا مۇددەلىمىز».
جولداسبەك شوپەعۇل.
دەرەك: egemen.kz.
فوتو: راحىم قويلىباەۆ.