اقش-تىڭ لاس-ۆەگاس قالاسىندا قازاقستاندىق بوكسشى بەيبىت شۇمەنوۆ امەريكالىق دجۋنيور ەنتوني رايتتى جەڭىپ, WBA ۆەرسياسىنىڭ اۋىر سالماقتاعى الەم چەمپيونى اتاندى.
ول قارسىلاسىن ونىنشى راۋندتا تەحنيكالىق نوكاۋتپەن تىزە بۇكتىردى. ءسويتىپ, ءشۇمەنوۆ كاسىپقوي بوكستاعى 17-ءشى جەڭىسىنە جەتتى. ەندى قازاق بوكسشىسى ماسكەۋدە رەسەيلىك دەنيس لەبەدەۆپەن WBA نۇسقاسىنىڭ اۋىر سالماقتاعى سۋپەرچەمپيونى اتاعىن جەڭىپ الۋ ءۇشىن قولعاپ تۇيىستىرەدى.
بەيبىت شۇمەنوۆ بۇعان دەيىن 18 كەزدەسۋ وتكىزىپ, سونىڭ 16-سىندا جەڭىسكە جەتسە, ەكى قارسىلاسىنان ۇتىلعان. دجۋنيور رايت كاسىپقوي بوكستا 17 رەت رينگكە شىعىپ, 15 جەكپە-جەكتە ۇتسا, بىرەۋىندە جەڭىلىپ, بىرەۋىندە تەڭ تۇسكەن.
قازاق بوكسشىسى جارتىلاي اۋىر سالماقتاعى (79,4 كيلوعا دەيىن) چەمپيوندىق اتاقتاردى بىرىكتىرۋ جەكپە-جەگىندە بەرنارد حوپكينستەن جەڭىلىپ قالعاننان كەيىن ءبىرىنشى اۋىر سالماققا وتكەن بولاتىن. وسىعان دەيىن امەريكالىق بىلعارى قولعاپ شەبەرى IBF تۇجىرىمى بويىنشا الەم چەمپيونى بولسا, بەيبىت WBA ۆەرسياسىندا سۋپەرچەمپيون ەدى. سودان كەيىن شۇمەنوۆ تاعى ءبىر اقش-تىڭ بوكسشىسى دجەي فلورەستى جەڭىپ, WBA نۇسقاسى بويىنشا الەمنىڭ ۋاقىتشا چەمپيونى تيتۋلىن جەڭىپ الدى.
قازىر حالىقارالىق بوكس ۇيىمىنىڭ (IBO) تىزىمىندە وتانداسىمىز وندىققا كىرىپ وتىر. سوڭعى رەت اتالعان ۇيىم ناۋرىز ايىندا بارلىق سالماق دارەجەسىندەگى بوكسشىلاردىڭ رەيتينگىن جاريالاعان بولاتىن. سول كەزدەگى تىزىمدە بەيبىت شۇمەنوۆ 11-ءشى ورىننان 8-ءشى ورىنعا كوتەرىلگەن.
داستان كەنجالين,
«ەگەمەن قازاقستان»