سەمەي قالاسىندا رەترو اۆتوكولىكتەردىڭ شەرۋى ءوتتى. شاھار تۇرعىندارى مەن قوناقتارى كوشەلەرگە ەرەكشە كورىك بەرگەن كونە كولىكتەردى تاماشالاۋمەن بىرگە, رۋلگە وتىرىپ تا كوردى. رەترو كولىكتەردىڭ اراسىندا «ۆولگاعا» نازارى اۋعاندار كوپ. اۆتوزاۋىتتان جارتى عاسىر بۇرىن شىققان گاز-21 ماركالى ماشينا ءمىنسىز ساقتالعان ەكەن.
كونە زاتتاردىڭ قاتارىن كولىكتەرمەن بىرگە كونە بۇيىمدار جانە رەترو اندەر شىرقالعان كونتسەرت تولىقتىردى. سەمەيدەگى ف.دوستوەۆسكيدىڭ ادەبي-مەموريالدى مۋزەيى عىلىمي-ەكسپوزيتسيالىق ءبولىمىنىڭ مەڭگەرۋشىسى يرينا سولوۆەۆانىڭ ايتۋىنشا, ىرگەتاسى وتكەن عاسىردىڭ 60-شى جىلدارى قالانعان مۇراجايدا سول كەزەڭدە پايدالانىلعان ىدىس-اياقتار مەن كيىمدەر مول.
– ءبىز جاستاردىڭ كوز الدىنا وتكەن عاسىردىڭ تۇرمىس-تىرشىلىگىن ەلەستەتۋگە تىرىستىق. ال سول زاماننىڭ كۋاگەرلەرى وتكەن شاققا ساياحات جاساپ قايتقانداي اسەر الدى, – دەدى مۇراجايدىڭ ءبولىم مەڭگەرۋشىسى.
دۋمان اناش,
«ەگەمەن قازاقستان»
سەمەي