استانا. 23 مامىر. تۇركيانىڭ جاڭا پرەمەر-ءمينيسترى بولىپ, بينالي يىلدىرىم تاعايىندالدى. بۇل تۋرالى lenta.ru-عا سىلتەمە جاساعان egemen.kz ءتىلشىسى حابارلادى.
كەشە, ياعني 22 مامىر كۇنى بيلىك باسىنداعى «ادىلدىك پەن دامۋ» پارتياسىنىڭ جيىنى ءوتىپ, پارتيا توراعاسى سايلاندى. بينالي يىلدىرىم بۇل ورىنعا جالعىز ۇمىتكەر بولاتىن. Reuters اگەنتتىگىنىڭ مالىمەتى بويىنشا, ونىڭ كانديداتۋراسىن سەزگە كەلگەن 1470 دەلەگاتتىڭ 1405-ءى قولداعان. وسىدان كەيىن تۇركيا پرەزيدەنتى رەجەپ ەردوعان پرەمەر-مينيستر بولىپ كەلگەن احمەت داۆۋتوگلۋدىڭ وتستاۆكاسىن قابىلدادى.
تۇركيادا اتالعان پارتيانىڭ توراعاسى ۇكىمەت باسشىسى قىزمەتىن اتقارادى. بينالي يىلدىرىم وسىعان دەيىن ەلدىڭ ترانسپورت, تەڭىز كولىگى جانە بايلانىس ءمينيسترى بولىپ كەلگەن.
ايتا كەتەيىك, احمەت داۆۋتوگلۋ 2014 جىلى ەلدىڭ پرەمەر-ءمينيسترى بولىپ تاعايىندالعان.
ايان ءابدۋالي.
دەرەك, فوتو: lenta.ru.