شىمكەنت. 21 مامىر. سوڭى قايعىلى جاعدايمەن اياقتالعان جول اپاتىنا بايلانىستى قالا اكىمى شۇعىل جيىن وتكىزدى. بۇل تۋرالى 24.kz اقپارىنا سىلتەمە جاساعان egemen.kz ءتىلشىسى حابارلادى.
قالا اكىمى عابيدوللا ءابدىراحىموۆ وبلىس ورتالىعىنداعى ايالدامالاردىڭ بىرىندە تۇرعان وقۋشى بالالارعا كەزدەيسوق كولىك سوعىپ, اقىرى ءبۇلدىرشىن بالانىڭ ولىمىمەن اياقتالعان قايعىلى وقيعاعا بايلانىستى شۇعىل جيىن وتكىزدى. ونىڭ بارىسىندا اكىم قاشىقتان قاتىناپ وقيتىن وقۋشىلار تاسىمالىن دۇرىس ۇيىمداستىرا الماعان قالالىق ءبىلىم ءبولىمىنىڭ باسشىسىن قىزمەتىنەن بوساتىپ جىبەردى. سونداي-اق جولاۋشىنى تولتىرىپ الىپ, كوشەدە جارىس ۇيىمداستىراتىن قوعامدىق كولىكتەردىڭ بەرەكەسىز تىرلىكتەرى مەن تروتۋارلاردى جونگە كەلتىرمەگەن جاۋاپتى ەكى مەكەمەنىڭ باسشىسى سوگىس الدى. جەرگىلىكتى پوليتسيا باسقارماسىنا قيىلىستارداعى جول قوزعالىسىن رەتتەي المايتىن ينسپەكتورلاردى قىزمەتتەن الۋدى تاپسىردى.
ەسكە سالا كەتەيىك, ايتىلىپ وتىرعان جول-كولىك وقيعاسى سالدارىنان 4 جاسار بالا ءجانتاسىلىم ەتىپ, تاعى 2 ايەل اۋرۋحانانىڭ جانساقتاۋ بولىمىنە جاتقىزىلعان بولاتىن. وبلىستىق بالالار اۋرۋحاناسىنا باس دارىگەردىڭ ورىنباسارىنىڭ ايتۋىنشا, 5 بالا كەلىپ تۇسكەن. ولاردىڭ ۇشەۋى قاجەتتى كومەك كورسەتىلگەننەن كەيىن ۇيلەرىنە قايتارىلىپ, ەكەۋى اۋرۋحاناعا جاتقىزىلدى. تاعى قالالىق بالالار اۋرۋحاناسىنا جاتقىزىلعان تاعى ءبىر بالانىڭ جاعدايى اۋىر.
«مىنا جينالىستا قانىم قايناپ وتىر. ءبىز بالالارىمىزدىڭ قاۋىپسىزدىگىن قامتاماسىز ەتە الماساق, مىنا جەردە ءبارىمىز توپىرلاپ نە ءۇشىن ءجۇرمىز؟! جول قيىلىسىندا نەگە دۇرىس باعدارشام جانبايدى؟ ءتارتىپ بولۋ ءۇشىن ەندى قانشا ادام, قانشا بالا ءولۋى كەرەك؟!» - دەدى قالا اكىمى.
وقيعاعا قاتىستى قىلمىستىق كودەكستىڭ 345-بابى بويىنشا سوتقا دەيىنگى تەرگەۋ امالدارى جۇرگىزىلۋدە. جۇرگىزۋشى ۋاقىتشا ۇستاۋ وقشاۋلاعىشقا قامالدى. ساراپتاما جۇرگىزۋ بارىسىندا 19 جاستاعى جىگىتتىڭ ىشىمدىك ىشپەگەنى بەلگىلى بولدى. ەندى بۇدان دا باسقا ساراپتامالار جاسالىپ جاتىر.
باقتيار تايجان.
دەرەك, فوتو: 24.kz.