كوكشەتاۋ. 21 مامىر. اقمولا وبلىسىندا ەگىن ەگۋ ناۋقانى اياقتالماي جاتىپ, ءونىمنىڭ قار استىندا قالۋ قاۋىپى ءتونىپ تۇر. بۇل تۋرالى كتك تەلەارناسىنىڭ اقپارىنا سۇيەنگەن egemen.kz ءتىلشىسى حابارلادى.
بۇلاي بولاتىنى, وبلىستاعى ەگىستىك القاپتاردىڭ تەڭ جارتىسىن ءالى ءدان سەبىلگەن جوق. ونىڭ ۇستىنە, اۋا-رايىنا بايلانىستى وڭىردە تۇقىم سەبۋ جىلداعىدان ءسال كەش قولعا الىندى. ال جاۋىن-شاشىن جالعاسا بەرەتىن بولسا, جاعداي ءتىپتى ناشارلاپ كەتۋى مۇمكىن. وسىنى شامالاعان ديقاندار جانتالاسا قيمىلداۋدا. ۋاقىت تىم تىعىز. ەندى 10 كۇننىڭ ىشىندە جۇمىستى اياقتاپ ۇلگەرمەسە, ءبارى دە كەش بولۋى ىقتيمال.
قازىر وبلىستاعى اۋا رايى دا ەگىن ەگۋگە قولايلى بولىپ تۇر. سوندىقتان ديقاندار ۋاقىتتى قۇر جىبەرمەي كۇش سالۋدا. ونداعان تەحنيكا جىرتىلعان القاپقا ءتۇرلى داقىلدار ەگۋدى جالعاستىرىپ جاتىر.
اسىرەسە, بيداي القاپتىڭ باسىم بولىگىنە ەگىلۋدە. ال شارۋالار ناۋقان اياقتالمايىنشا, كۇن رايى بۇزىلىپ, جاۋىن جاۋماسا دەپ تىلەپ وتىر. ويتكەنى, ناۋقان سوزىلىپ كەتەدى. بۇلاي بولسا, ەڭبەك ەش كەتىپ, ءونىم پىسپەي قار استىندا قالۋى مۇمكىن.
«بىلتىر جاقسى ءونىم الدىق. ءبىر بيدايدى دالادا قالدىرماي جينادىق. بيىل قالاي بولاتىنىن ايتۋ قيىن. ايتەۋىر ەگىپ جاتىرمىز. قالعانى اۋا رايىنا بايلانىستى.
ال, ۇكىمەت شارۋالاردى قارىق قىلامىز دەپ وتىر. جەڭىلدەتىلگەن نەسيەدەن بولەك, شارۋاشىلىققا قاجەتتى تەحنيكانى ءتيىمدى باعاعا ساتىپ الۋعا ۇلكەن مۇمكىندىك بار ەكەن», - دەيدى شارۋا قوجالىعىنىڭ باسشىسى قاسىمبەك مولدابەكوۆ.
«مەملەكەت تاراپىنان كورسەتىلگەن كومەك جۇزەگە اسۋدا.وسى كۇنگە دەيىن اۋىل شارۋاشىلىعى سالاسىندا جۇرگەن ادامداردان 1300-دەن استام ءوتىنىش كەلىپ ءتۇستى. ولاردىڭ بارلىعى ماقۇلداندى. جالپى سومماسى 18 ميللياردتى قۇراپ وتىر», - دەيدى «قازاگروقارجى» اق ليزينگتىك جانە كەپىلدىكپەن قامتاماسىز ەتۋ دەپارتامەنتىنىڭ ديرەكتورى رينات كەمەشوۆ.
باقبەرگەن امالبەك.
دەرەك, فوتو: كتك