رەسەيدە جاڭا قۋاتتى قارۋدىڭ سىننان ءوتىپ جاتقانى بەلگىلى بولدى

استانا. 15 مامىر. رەسەي ۆيتسە-پرەمەرى دميتري روگوزين جۇما كۇنى پرەزيدەنت ۆلاديمير پۋتينگە قارۋلى كۇشتەردە جاڭا قۋاتتى قارۋدىڭ سىناقتان ءوتىپ جاتقانىن مالىمدەدى. بۇل تۋرالى ريا «نوۆوستي» اقپارىنا سىلتەمە جاساعان egemen.kz ءتىلشىسى حابارلادى. ۇكىمەت باسشىسىنىڭ ورىنباسارى مەملەكەت باسشىسىنا تەحنيكالىق سيپاتتاماسى جاعىنان ىقتيمال قارسىلاستار قارۋلارىنان اسىپ تۇسەتىن جاڭا قارۋدى جاساپ شىعارۋعا مۇمكىندىك بەرەتىن سىناقتاردىڭ ءجۇرىپ جاتقانىن باياندادى. اڭگىمە رەسەي پرەزيدەنتى ۆلاديمير ءپۋتيننىڭ سوچيدەگى «بوچاروۆ بۇلاقتارى» رەزيدەنتسياسىندا اسكەري قىزمەتكەرلەرمەن كەڭەس وتكىزۋى بارىسىندا ايتىلدى. وسى جيىندا ۆلاديمير پۋتين رەسەيدىڭ الەمدەگى ستراتەگيالىق بالانستىڭ ساقتالۋى مەن كەڭ اۋقىمدى اسكەري جانجالداردىڭ ورىن الۋىنا جول بەرمەۋ ءۇشىن بارلىق كۇشىن سالاتىنىن مالىمدەدى. «ارينە, ءبىز زارداپتارى جاعىنان پلانەتانىڭ قايسىبىر وتتى نۇكتەسىندە دە ورىن الىپ جاتقان جانجالدارمەن سالىستىرۋعا دا كەلمەيتىن ءىرى كولەمدى اسكەري جانجالداردىڭ تۋىپ كەتپەۋىنە كەپىلدىك بەرەتىن وسى كۇشتەردىڭ ستراتەگيالىق بالانسىن قامتاماسىز ەتۋ ءۇشىن قاجەتتى نارسەنىڭ ءبارىن قابىلدايمىز. ءبىز, مىنە, وسىعان جول بەرىپ قويا المايمىز جانە جول بەرمەيمىز», - دەدى پۋتين سوچيدە اسكەريلەرمەن وتكىزگەن كەڭەسى بارىسىندا. «ءبىز پرەزيدەنتكە وسى كۇندەرى ءوزىنىڭ تەحنيكالىق سيپاتتاماسى بويىنشا ءتىپتى ءبىزدىڭ ىقتيمال قارسىلاستارىمىزدىڭ قارۋلارىنان دا اسىپ تۇسەتىن قارۋدى جاساۋدى تەزدەتۋگە مۇمكىندىك بەرەتىن مەيلىنشە قازىرگى زامانعى سىناقتاردىڭ ءوتىپ جاتقانى, سول سىناقتار رەگلامەنتىنىڭ وزگەرگەنى تۋرالى بايانداپ بەردىك», - دەدى روگوزين جۋرناليستەرگە. تالعات رايىمبەك. دەرەك, فوتو: ريا «نوۆوستي».