فوتو: Depositphotos
ءمينيستردىڭ ايتۋىنشا, رەگرەسس تولەمدەرى ماسەلەسى ءجيى كاسىپوداقتار تاراپىنان كوتەرىلەدى, وسى ماقساتتا ارنايى جۇمىس توبى قۇرىلىپ, ءومىر بويى تولەمدەردى قامتاماسىز ەتۋ جولدارى تالقىلانىپ جاتىر.
«بارلىعىن تەك بيۋدجەتتەن تولەۋ مۇمكىن ەمەس. مۇندا ساقتاندىرۋ كومپانيالارى, جۇمىس بەرۋشىلەر جانە زەينەتاقى قورى قاتىسۋى ءتيىس. ارينە, بيۋدجەت تە ارالاسۋى كەرەك. ءبىز ءدال وسى ارالاس مودەلدى ۇسىنىپ وتىرمىز», دەدى اسكاربەك ەرتاەۆ.
مينيستر سونداي-اق جۇمىس بەرۋشىلەر مەن ساقتاندىرۋ كومپانيالارى بالاما ۇسىنىستارىن دايىنداۋ ءۇشىن قوسىمشا ۋاقىت سۇراعانىن ايتتى. ءبىرىنشى كەزدەسۋ كاسىپوداقتار, جۇمىس بەرۋشىلەر جانە ساقتاندىرۋ كومپانيالارى اراسىندا ءوتتى, ەكىنشى كەزدەسۋ وسى اپتادا جوسپارلانعان.
ساقتاندىرۋ كومپانيالارى مەن جۇمىس بەرۋشىلەردىڭ ەسەپتەرى اي سوڭىنا دەيىن ۇسىنىلۋى ءتيىس. ەڭبەك مينيسترلىگىنىڭ دەرەگىنشە, «اتامەكەن» ۇلتتىق كاسىپكەرلەر پالاتاسى سوڭعى ەسەپ نۇسقاسىن دايىنداعان, الايدا ۆەدومستۆوعا ءالى تۇسپەگەن.
جۇمىس توبى كەيىن بۇل ماسەلەنى ۇكىمەت دەڭگەيىنە شىعارىپ, ءبىرتۇتاس شەشىم قابىلداۋدى قاراستىرادى, ازىرگە ناقتى كەلىسىم جوق.
رەگرەسس تولەمدەرى – قىزمەتكەرگە ەڭبەك مىندەتتەرىن ورىنداۋ بارىسىندا (وندىرىستىك جاراقات نەمەسە كاسىپتىك اۋرۋ) كەلگەن دەنساۋلىققا زيان ءۇشىن تولەنەتىن قارجىلىق وتەماقى.
ەسكە سالايىق, بۇعان دەيىن قازاقستاندا ەڭبەك وتىلىنە بايلانىستى ەرتە زەينەتكە شىعۋدى ەنگىزۋ ۇسىنىلعان.
