فوتو: ءماجىىلىس (ارحيۆ)
دەپۋتاتتىڭ ايتۋىنشا, مەملەكەتتىك ساتىپ الۋ پورتالىنداعى دەرەكتەردى تالداۋ بارىسىندا بىرقاتار تەندەردى ۇنەمى ەكى كومپانيا – «تۇمار» مەن «اقنازار» ۇتىپ الاتىنى انىقتالعان. ولار ءبىر كونكۋرستارعا قاتار قاتىسىپ, كەزەك-كەزەك جەڭىمپاز اتانادى. ماسەلەن, 2025 جىلى بۇل كومپانيالار قاتىسقان كەلىسىمشارتتاردىڭ جالپى سوماسى 20 ملرد تەڭگەنى, 2024 جىلى 13 ملرد تەڭگەنى قۇراعان.
سونىمەن قاتار دەپۋتات ەكى كومپانيانىڭ بايلانىس نومىرلەرى بىردەي ەكەنىن العا تارتتى. «بۇل قالاي مۇمكىن؟» دەگەن ساۋال «قازاتومونەركاسىپ» وكىلدەرىنە تىكەلەي قويىلدى.
دەپۋتات تەرىس ءدىني اعىمدارعا زاڭمەن تىيىم سالۋدى تالاپ ەتتى
بۇدان بولەك, «سامۇرىق-ەنەرگوعا» قاتىستى دا كۇردەلى ماسەلە كوتەرىلدى. دەپۋتات قولدانىستاعى جەل ەلەكتر ستانتسياسىن كەڭەيتۋ جوباسى بويىنشا تەندەرلىك قۇجاتتامادا قىتايلىق «Goldwind Envision Energy» كومپانياسى جابدىق جەتكىزۋشى رەتىندە كورسەتىلگەنىن, الايدا اتالعان كومپانيا بۇل جوباعا قاتىسپاعانىن مالىمدەدى.
«كومپانيانىڭ رەسمي حاتىندا ولار ەشقانداي تەحنيكالىق نەمەسە كوممەرتسيالىق ۇسىنىس بەرمەگەنىن, ال قۇجاتتارعا قول قويعان ۆان ۆەيدىڭ ولاردىڭ قىزمەتكەرى ەمەستىگىن كورسەتكەن», دەدى دەپۋتات.
وسىعان قاراماستان, جوبا مەملەكەتتىك ساراپتامادان ءوتىپ, تەندەر قورىتىندىلانعان. دەپۋتاتتىڭ سوزىنشە, بۇل جاعداي تەندەرلىك قۇجاتتاردا بۇرمالاۋ بولۋى مۇمكىن دەگەن كۇمان تۋدىرادى. سونداي-اق تاپسىرىس بەرۋشى تاراپ جەر تەلىمى مەن قۇرىلىسقا قاجەتتى رۇقسات قۇجاتتارىن ۇسىنباعانى دا ايتىلدى.
ءوز كەزەگىندە «قازاتومونەركاسىپ» وكىلدەرى بارلىق ساتىپ الۋ راسىمدەرى اشىق ءارى زاڭ تالاپتارىنا ساي جۇرگىزىلەتىنىن مالىمدەدى. ولار ۋران ءوندىرۋ سالاسىنىڭ ەرەكشەلىگىنە بايلانىستى ليتسەنزياسى مەن بىلىكتىلىگى بار كومپانيالار سانى شەكتەۋلى ەكەنىن اتاپ ءوتتى.
«بۇل كومپانيالار تاۋار جەتكىزۋشى ەمەس, ۇڭعىمالاردى تەحنولوگيالىق بايلاۋ جۇمىستارىن ورىندايتىن مەردىگەرلەر. مۇنداي كۇردەلى جۇمىستى بارلىق كومپانيا اتقارا المايدى», دەدى.
تەلەفون نومىرلەرىنىڭ سايكەستىگىنە قاتىستى ماسەلە بويىنشا ىشكى كومپلاەنس قىزمەتى تەكسەرۋ جۇرگىزەتىنى جانە دەپۋتاتقا جازباشا جاۋاپ بەرىلەتىنى حابارلاندى.
ال «سامۇرىق-ەنەرگو» وكىلدەرى بۇل ماسەلەگە قاتىستى ناقتىلاۋ قاجەت ەكەنىن ايتىپ, ۇقساس جوبا بويىنشا بۇرىن سوت داۋى بولعانىن, بارلىق سوتتا كومپانيانىڭ ۇستانىمى قولداۋ تاپقانىن جەتكىزدى. دەگەنمەن, كوتەرىلگەن جايت بويىنشا قوسىمشا تەكسەرىس جۇرگىزىلىپ, رەسمي جاۋاپ بەرىلەتىنى ايتىلدى.
تالقىلاۋ بارىسىندا دەپۋتات بىردەي كومپانيالاردىڭ ءجيى جەڭىسكە جەتۋى باسەكەلەستىككە كۇمان كەلتىرەتىنىن اتاپ ءوتتى. ول مۇنداي جاعدايلاردىڭ الدىن الۋ ءۇشىن اشىقتىقتى كۇشەيتۋ قاجەتتىگىن جەتكىزدى.
كەزدەسۋ قورىتىندىسىندا كومپانيا وكىلدەرى بارلىق ەسكەرتپەلەر نازارعا الىناتىنىن, ال انىقتالعان زاڭبۇزۋشىلىقتار بولسا, ماتەريالدار قۇقىق قورعاۋ ورگاندارىنا جولداناتىنىن مالىمدەدى. ال كىنالى تۇلعالار انىقتالعان جاعدايدا, زاڭ اياسىندا جاۋاپكەرشىلىككە تارتىلاتىنى اتاپ ءوتىلدى.
تسيرفلىق سەرۆيس: دەپۋتات «تاۋەلسىز قىزمەتكەر» مارتەبەسىن بەكىتۋدى ۇسىندى
