فوتو: اشىق دەرەككوز
مەملەكەت باسشىسى ترانزيتتىك الەۋەتتى ارتتىرۋ ماقساتىندا قازاقتان مەن موڭعوليا اراسىندا توتە جول سالۋ تۋرالى كەلىسىمگە قول جەتكىزىلگەنىن اتاپ ءوتتى.
«جول ەكى ەل اراسىنداعى ءوزارا بايلانىس كوزى, تىعىز قارىم-قاتىناس كەپىلى ەكەنى بەلگىلى. ءبىز بۇل ماسەلەنىڭ اسا وزەكتى ەكەنىن جاقسى ءتۇسىنىپ وتىرمىز. سوندىقتان حۋرەلسۋح مىرزا ەكەۋىمىز قازاقستان مەن موڭعوليا اراسىندا توتە جول اشۋعا مۇددەلى ەكەنىمىزدى راستادىق. كەزدەسۋ بارىسىندا ەلدەرىمىزدى جالعايتىن اۆتوكولىك جولىن سالۋ جونىندە ورتاق كەلىسىمگە قول جەتكىزدىك. بۇل – ارينە, جان-جاقتى ساراپتاپ, مۇقيات زەردەلەۋدى قاجەت ەتەتىن كۇردەلى ماسەلە. دەسەك تە, ەڭ باستىسى, جول قۇرىلىسى بويىنشا ماقساتىمىز – ءبىر. سول سەبەپتى ءبىز قۇرمەتتى پرەزيدەنت مىرزامەن جاسالعان ۋاعدالاستىققا سايكەس الدىمەن بىرلەسكەن ۇكىمەتارالىق جۇمىس توبىن قۇرۋ تۋرالى شەشىمگە كەلدىك», دەدى قاسىم-جومارت توقاەۆ.
سونىمەن بىرگە جاڭا جول تورابىنىڭ سالىنۋى كورشى مەملەكەتتەر اراسىنداعى ساۋدا اينالىمىن ارتتىرىپ, ورتاق تۋريستىك كلاسستەردى دامىتاتىندىعىن جەتكىزدى.
«الداعى ۋاقىتتا قازاقستان – موڭعوليا اۆتوجولى ەلدەرىمىزدىڭ اراسىنداعى ساۋدا-ساتتىقتى ارتتىرۋعا ەرەكشە سەرپىن بەرەتىنى انىق. بۇل جولدىڭ يگىلىگىن ىرگەلەس ەلدەر دە كورەتىن بولادى. بارشاڭىزعا ءمالىم, مەن بىلتىر قىتايدا وتكەن شانحاي ىنتىماقتاستىعى ۇيىمىنىڭ سامميتىندە «ترانسالتاي سۇحبات الاڭىن» قۇرۋدى ۇسىندىم. التايدىڭ ءتورت جاعىن مەكەن ەتكەن مەملەكەتتەردىڭ ساۋدا, كولىك-لوگيستيكا, تۋريزم, مادەنيەت سالاسىنداعى ماسەلەلەر بويىنشا ورتاق مامىلەگە كەلۋىنە تولىق مۇمكىندىك بار. وسى رەتتە ءتورت ەلدىڭ كولىك-لوگيستيكا الەۋەتىن ءبىر ارناعا توعىستىرىپ, بىرلەسە جۇمىس ىستەي الامىز. بۇل قادام الىس-بەرىستى عانا ەمەس, «التاي» بىرەگەي تۋريستىك كلاستەرىن دامىتۋعا جول اشادى», دەدى پرەزيدەنت.
بايان-ولگەي ايماعىندا قازاقستاننىڭ كونسۋلدىق مەكەمەسى اشىلادى
كەلىسسوز بارىسىندا اۋە قاتىناسىن جانداندىرۋ ماسەلەسىنە ايرىقشا ءمان بەرىلدى. مەملەكەت باسشىسىنىڭ ايتۋىنشا, كەزدەسۋدە «وسكەمەن – ولگەي» باعىتى بويىنشا اۋە قاتىناسىن ورناتۋ جونىندە كەلىسىم جاسالعان.
«قازىر «الماتى – ۇلان-باتىر» باعىتىندا تۇراقتى رەيستەر بار. كوپ ۇزاماي «استانا – ۇلان-باتىر» اۋە قاتىناسى قايتا اشىلادى. بۇدان بولەك, ءبىز وسى ساپار اياسىنداعى كەلىسسوزدەر ناتيجەسىندە «وسكەمەن – ولگەي» باعىتى بويىنشا اۋە قاتىناسىن ورناتۋ جونىندە ناقتى كەلىسىمگە كەلدىك. بۇل ماڭىزدى شەشىمنىڭ ارقاسىندا ىنتىماقتاستىعىمىز ودان ءارى نىعايىپ, ايماقارالىق بايلانىستارىمىز تىڭ سەرپىنمەن دامي تۇسەرى ءسوزسىز. بۇل تۇستا دا موڭعوليا ەلىنىڭ باسشىسى – قۇرمەتتى حۋرەلسۋح مىرزاعا جانە موڭعول تاراپىنان وسى ماسەلەنى شەشۋگە اتسالىسقان بارشا ازاماتقا العىس ايتامىن», دەدى قازاقستان پرەزيدەنتى.
