وقيعا • 21 ءساۋىر, 2026

استانادا كوپقاباتتى ءۇيدىڭ تەرەزەسىنەن قۇلاعان بالا قازا تاپتى

1 مين

وقۋ ءۇشىن

استانادا كوپقاباتتى ءۇيدىڭ تەرەزەسىنەن قۇلاعان بالا كوز جۇمدى. قايعىلى جاعداي ن.تلەنديەۆ كوشەسى, 44ا مەكەنجايىنداعى تۇرعىن ءۇي كەشەندەرىنىڭ بىرىندە بولعان, دەپ حابارلايدى Egemen.kz.

بايان سۇلەيمەنقىزى

استانادا كوپقاباتتى ءۇيدىڭ تەرەزەسىنەن قۇلاعان بالا قازا تاپتى

فوتو: ۆيدەودان سكرينشوت

وقيعا ورنىنا جەدەل جاردەم بريگاداسى كەلگەنىمەن, بالانى امان الىپ قالۋ مۇمكىن بولمادى. دارىگەرلەر ونىڭ العان جاراقاتتارى اۋىر ەكەنىن حابارلادى. قازىرگى ۋاقىتتا وقيعانىڭ ناقتى سەبەپتەرى انىقتالىپ جاتىر.

قالالىق پوليتسيا دەپارتامەنتىنىڭ مالىمەتىنشە, 2026 جىلدىڭ باسىنان بەرى مۇنداي ەكى جاعداي تىركەلگەن, ونىڭ بىرەۋى ولىممەن اياقتالعان. مامانداردىڭ ايتۋىنشا, مۇنداي وقيعالار كوبىنە 1 مەن 6 جاس ارالىعىنداعى بالالار اراسىندا بولادى. نەگىزگى سەبەپتەر – اتا-انالاردىڭ قاراۋىنسىز قالدىرۋ, تەرەزەلەردە قورعانىس قۇرالدارىنىڭ بولماۋى جانە موسكيت تورلارىنا شامادان تىس سەنۋ.

ەسكە سالايىق, 20 ءساۋىر كۇنى استانادا 18 جاستاعى جىگىت تۇرعىن ءۇي كەشەنىنىڭ شاتىرىنا شىعىپ, سەكىرمەك بولعان. وقيعا ورنىنا ارنايى قىزمەتتەر مەن پسيحولوگتار كەلىپ, ونى امان الىپ قالدى.