جەر رەفورماسى جونىندەگى كوميسسيانىڭ العاشقى وتىرىسى اياقتالدى

استانا. 14 مامىر. ۇلتتىق مۋزەيدە وتكەن جەر رەفورماسى جونىندەگى كوميسسيا وتىرىسىنىڭ العاشقى جۇمىسى اياقتالدى. بۇل تۋرالى egemen.kz ءتىلشىسى حابارلادى. كوميسسيا وتىرىسىندا توراعا, پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ بۇگىنگى جەر رەفورماسى جونىندەگى جيىننىڭ العاشقى جۇمىسى اياقتالعانىن مالىمدەدى. «كوميسسيانىڭ كەزەكتى وتىرىسى الداعى اپتانىڭ سەنبىسىندە بولادى. كەلەسى جيىندا جەردى ساتۋ ماسەلەسىن قاراستىرامىز. سونداي-اق, ءبىز كوميسسيا مۇشەلەرىن ءتورت توپقا ءبولىپ, جۇيەلى جۇمىس جاساۋدى باستايمىز. ەڭ الدىمەن اتقاراتىن جۇمىسىمىزدى باعدارلاپ, ناقتى شەشىمدەر قابىلداپ الايىق. سوسىن وڭىرلەردى ارالاپ, حالىقپەن كەزدەسۋدى باستايمىز. بۇگىنگى جيىننىڭ باسىندا ءتۇرلى پىكىرلەر, قاراما-قايشى ويلار, تالاس-تارتىس, تۇسىنىسپەۋشىلىكتەر ورىن الدى. دەگەنمەن, ءبارىمىزدىڭ تىلەگىمىز دە, جۇرەگىمىز دە اينالىپ كەلگەندە قازاقتىڭ قاسيەتتى جەرىن قورعاۋعا نيەتتى ەكەنىمىزدى اڭعارتتى. ءبىر ءبىرىمىزدى جۇرەكپەن تۇسىندىك. ءوزىمنىڭ اتىمنان سىزدەرگە العىس ايتامىن. وسىنداي وتىرىسقا ارنايى ۋاقىتتارىڭىزدى ءبولىپ كەلگەندەرىڭىزگە», – دەدى كوميسسيا توراعاسى باقىتجان ساعىنتاەۆ. سونىمەن قاتار, توراعا العاشقى وتىرىستىڭ سوڭىندا قاتىسۋشىلاردىڭ ءتۇيىندى پىكىرىن سۇراپ, ۇسىنىستار بەرۋدى ايتتى. جيىن سوڭىندا ءسوز العان اقپارات جانە كوممۋنيكاتسيالار ءمينيسترى داۋرەن اباەۆ كوميسسيا وتىرىسىنا 150-گە جۋىق بۇقارالىق اقپارات قۇرالدارىنىڭ وكىلدەرى قاتىسقانىن جەتكىزدى. «وزدەرىڭىز كورىپ وتىرعانداي وسى جيىندى 150-گە جۋىق اقپارات قۇرالدارىنىڭ وكىلدەرى باقىلاپ, حالىققا اشىق ءارى شىنايى جەتكىزۋدە. قازاقستاندىقتار وسىدان-اق وتىرىستىڭ بىرجاقتى ەمەس ەكەنىن, اۋقىمى كەڭ ەكەنىن اڭعاراتىن بولادى», – دەدى مينيستر. ايتا كەتەيىك, بۇگىنگى شارادان ەلىمىزدەگى بارلىق رەسپۋبليكالىق تەلەارنالار مەن گازەتتەردىڭ جانە ءتۇرلى سايتتاردىڭ جۋرناليستەرى جەدەل اقپارات تاراتتى. تالعات رايىمبەك. دەرەك, فوتو: egemen.kz.