اتىراۋداعى تەڭىز كەنىشىندە جەر سىلكىندى

اتىراۋ. 12 مامىر. اتىراۋ وبلىسىنداعى ەڭ ءىرى تەڭىز كەنىشىندە 3,9 باللدىق جەر استى قىرتىسىنىڭ تەربەلگەنى تىركەلگەن. بۇل تۋرالى azh.kz سايتىنا سىلتەمە جاساعان egemen.kz ءتىلشىسى حابارلادى. جەر استى ءدۇمپۋى 8 مامىرعا قاراعان تۇندە بىلىنگەن. «گەوفيزيكالىق زەرتتەۋلەر ينستيتۋتى» رەسپۋبليكالىق مەملەكەتتىك كاسىپورىنىنىڭ جەدەل اقپاراتىنا سايكەس, 2016 جىلعى 8 مامىردا استانا ۋاقىتىمەن 01 ساعات 27 مينۋتتا (7 مامىردا گرينۆيچ بويىنشا 19 ساعات 27 مينۋتتا) ەپيورتالىعى تەڭىز كەنىشىنىڭ اۋماعىندا جەر سىلكىنىسى تىركەلگەن. «ەپيورتالىق كوورديناتتارى: 45.99 گرادۋس سولتۇستىك ەندىكتە, 53.97 گرادۋس شىعىس بويلىقتا. ماگنيتۋداسى mb=3.9. ەنەرگەتيكالىق سىنىبى K=8.5», – دەلىنگەن حابارلامادا. جەرگىلىكتى تابيعات جاناشىرى, اكادەميك مۇفتاح دياروۆتىڭ, سونىمەن بىرگە, قازاقستان ۇلتتىق عىلىم اكادەمياسىنىڭ سەيسمولوگيا ينستيتۋتىنىڭ مالىمەتتەرىنە قاراعاندا, اتىراۋ وبلىسىنىڭ اۋماعى, سونداي-اق, كاسپي تەڭىزىنىڭ اكۆاتورياسى دا ريحتەر شكالاسىمەن 6 باللعا دەيىنگى ماگنيتۋدالى جەر سىلكىنىسى بولۋى مۇمكىن جەر قىرتىسى تەلىمىنە كىرەدى. بۇعان كاسپي تەڭىزىندەگى «قاشاعان», «قايران», «اقتوتى», «كورولەۆسكوە» جانە «تەڭىز» تۇزاستى كەنىشتەرى دە جەر قىرتىسىنىڭ تەكتونيكالىق بەلسەندى تەلىمدەرىنە ورنالاسقانىنا نازار اۋدارىلادى. جولداسبەك شوپەعۇل. دەرەك, فوتو: azh.kz.