مەملەكەت باسشىسى قىرعىزستان, تاجىكستان, تۇرىكمەنستان جانە وزبەكستان كوشباسشىلارىنا سامميتكە قاتىسقانى ءۇشىن ريزاشىلىعىن ءبىلدىردى.
«بۇگىنگى كەزدەسۋ ءوڭىردى ورنىقتى دامىتۋ قاعيداتتارىنا, پراگماتيكالىق جانە ءوزارا كەلىسىلگەن ەكولوگيالىق كۇن ءتارتىبىن ىلگەرىلەتۋگە بەيىل ەكەنىمىزدى راستايدى. وسى جيىندا قوردىڭ دامۋ پەرسپەكتيۆاسىن تالقىلاپ, ارال تەڭىزى باسسەينىنىڭ ەكوجۇيەسىن ساقتاۋدى كوزدەيتىن ورتاق شەشىمدەردى ايقىندايمىز. بۇل كەڭ اۋقىمداعى حالىقارالىق ماسەلە بولعاندىقتان, ءبىزدىڭ جۇمىسىمىزعا كوپتەگەن مەملەكەتتەر, حالىقارالىق ۇيىمدار نازار اۋدارىپ وتىر. ارالدى قۇتقارۋ ماسەلەسى كوپ جىلدار بويى ايماقتا دا, الەمدە دە ايتىلىپ كەلەدى. ءوڭىردىڭ تۇراقتىلىعىن قامتاماسىز ەتۋ جانە وركەندەتۋ – ورتاق ءارى قول جەتكىزۋگە بولاتىن مىندەت. اتالعان باسقوسۋ ىنتىماقتاستىقتى نىعايتۋعا تىڭ سەرپىن بەرىپ, ايماق مەملەكەتتەرىنە پايداسىن تيگىزەدى دەپ ۇمىتتەنەمىن», دەدى قاسىم-جومارت توقاەۆ.
قاسىم-جومارت توقاەۆ: ءبىز ءۇشىن ەكولوگيالىق قاۋىپسىزدىك ۇزاقمەرزىمدى دامۋ ستراتەگياسىنىڭ ارقاۋى
پرەزيدەنت حالىقارالىق ارالدى قۇتقارۋ قورى ورتالىق ازياداعى سۋ شارۋاشىلىعى مەن ەكولوگيالىق ماسەلەلەردىڭ شەشىمىن تابۋ ءۇشىن وڭىردەگى مەملەكەتتەردىڭ كۇش-جىگەرىن ورتاق ارناعا ۇيىستىراتىن بىردەن-ءبىر ينستيتۋتسيونالدىق پلاتفورما ەكەنىنە توقتالدى
«قور ارال تەڭىزىن قۇتقارۋعا باعىتتالعان حالىقارالىق قولداۋ شارالارىن شوعىرلاندىرىپ, بىرلەسكەن باستامالاردى ىسكە اسىرۋدا ايتارلىقتاي ءرول اتقارادى. قازاقستان قورعا توراعالىق ەتۋ بارىسىندا بارلىق قۇرىلتايشى مەملەكەتتەردىڭ قاتىسۋىمەن كوپتەگەن وزەكتى مىندەتتەردىڭ شەشىمىن تابۋعا دايەكتى تۇردە ىقپال ەتتى. مىسالى, سۋ-ەنەرگەتيكا سالاسىنداعى ىنتىماقتاستىق نىعايىپ, جوبالاردى قارجىلاندىرۋ تەتىكتەرى كەڭەيىپ كەلەدى. قوردىڭ اتقارۋشى كوميتەتىنىڭ ۇيلەستىرۋ قىزمەتىن ارتتىرۋ جونىندە شارالار قابىلداندى. حالىقارالىق ارىپتەستەرمەن, سونىڭ ىشىندە بۇۇ قۇرىلىمدارىمەن, قارجى ينستيتۋتتارىمەن جانە دونورلارمەن ىقپالداستىق كۇشەيۋدە. حالىقارالىق تابيعاتتى قورعاۋ باستامالارى اياسىنداعى جۇمىس جانداندى. قوردىڭ اتقارۋشى كوميتەتى بىرقاتار ماڭىزدى جيىنعا, اتاپ ايتقاندا, رياد قالاسىندا وتكەن One Water سامميتىنە, نايروبيدە ۇيىمداستىرىلعان بۇۇ-نىڭ قورشاعان ورتا جونىندەگى 7-ءشى اسسامبلەياسىنا, سونداي-اق باكۋدەگى سور-29 جانە بەلەندەگى سور-30 كونفەرەنتسيالارىنا قاتىستى. ارال تەڭىزى باسسەينىندەگى ەلدەرگە كومەك كورسەتۋ جونىندەگى ءىس-قيمىل باعدارلاماسىنا جانە ورتالىق ازيانىڭ تۇراقتى دامۋى ءۇشىن قورشاعان ورتانى قورعاۋ جونىندەگى وڭىرلىك باعدارلاماسىنا ءجىتى نازار اۋدارىلىپ وتىر. سونىمەن قاتار حالىقارالىق ۇيىمداردىڭ قاتىسۋىمەن 30-دان اسا وڭىرلىك جوبا جۇزەگە اسىرىلۋدا. اتالعان باعدارلامالار مەن باستامالاردى قارجىلاندىرۋدىڭ جالپى كولەمى ەكى ميلليارد دوللاردان اسادى. قازاقستاننىڭ دۇنيەجۇزىلىك دەنساۋلىق ساقتاۋ ۇيىمىمەن سەرىكتەسە وتىرىپ ازىرلەگەن 2026-2029 جىلدارعا ارنالعان وڭىرلىك جول كارتاسى ارال ماڭى تۇرعىندارىنىڭ دەنساۋلىعىن جاقسارتۋعا جانە ءال-اۋقاتىن ارتتىرۋعا ۇلەس قوسادى», دەدى مەملەكەت باسشىسى.
