مەملەكەت باسشىسى بۇل ۇلتتىق دەڭگەيدەگى نەمەسە تاكتيكالىق ەمەس, الەمدىك ماڭىزى بار ستراتەگيالىق مىندەت بولعاندىقتان ناقتى ىسكە كوشۋ كەرەكتىگىنە توقتالدى.
«قور جۇمىسىنىڭ ۇيىمداستىرۋ مەحانيزمدەرىن جاڭارتۋ دا وزەكتى. سول ارقىلى ۇيىم قىزمەتىنىڭ قولدانبالى سيپاتى كۇشەيە تۇسەدى. ءبىزدىڭ ويىمىزشا, قوردىڭ وڭىرگە ورتاق پلاتفورما رەتىندەگى ءرولىن نىعايتا تۇسكەن ءجون. وسىلايشا, سۋ, ەكولوگيا جانە ورنىقتى دامۋ ماسەلەلەرىن ورتالىق ازيا ەلدەرىنىڭ مۇددەسىنە ساي ءتيىمدى شەشۋگە بولادى. بۇعان دەيىن قالىپتاسقان ءوزارا ىقپالداستىقتى دامىتقان دۇرىس. حالىقارالىق ساراپشىلاردىڭ باقىلاۋىنشا, سوڭعى جىلدارى سۋ ماسەلەسىندە ايماق ەلدەرى ءوز مۇددەلەرىن العا شىعارىپ وتىر. ياعني حالىقارالىق اسپەكتىلەر, ءوزارا ىنتىماقتاستىق, سونىڭ ىشىندە كورشىلەس مەملەكەتتەردىڭ قاجەتتىلىگى ەسكەرىلمەيدى. ولاردىڭ پىكىرىنشە, سۋ-ەنەرگەتيكا سالاسىندا تەپە-تەڭدىكتىڭ بولماۋى, ترانسشەكارالىق وزەندەردى باسقارۋ ءتارتىبىنىڭ بۇزىلۋى, ەكولوگيالىق زارداپتىڭ سالدارىن ەلەمەۋ – نەگىزگى سەبەپ. ءدال وسىنداي قيىن جاعدايدا ءار ەلدىڭ سۋعا قاتىستى ستراتەگياسىن ۇشتاستىرۋعا ۇمتىلىپ كورۋ كەرەك. بۇل سۋ ۇنەمدەۋ ىسىندەگى وزىق تاجىريبەلەردى كەڭىنەن تاراتۋعا مۇمكىندىك بەرەدى. ورتالىق ازيا مەملەكەتتەرى باسشىلارىنىڭ بىلتىرعى كونسۋلتاتيۆتىك كەزدەسۋىندە حالىقارالىق ستاندارتتارعا سۇيەنە وتىرىپ, سۋدى پايدالانۋ جونىندەگى نەگىزدەمەلىك كونۆەنتسيا قابىلداۋدى ۇسىنعان ەدىم. مۇنداي كونۆەنتسيا قابىلداۋ كوپجاقتى ىقپالداستىقتىڭ كەلىسىلگەن قاعيداتتارىن بەكىتۋگە جانە ترانسشەكارالىق سۋدى پايدالانۋدىڭ تيىمدىلىگىن ارتتىرۋعا جول اشادى. وسى ماسەلەگە زەيىن قويۋلارىڭىزدى سۇرايمىز», دەدى مەملەكەت باسشىسى.
قاسىم-جومارت توقاەۆ سۋ سالاسىن تسيفرلاندىرۋدى, سونىڭ ىشىندە سىرداريا مەن ءامۋداريا باسسەيندەرىندە مونيتورينگتەۋدىڭ بىرىڭعاي اۆتوماتتاندىرىلعان جۇيەسىن ەنگىزۋدى باستى مىندەت رەتىندە اتادى. بۇل تەتىك دەرەكتەردىڭ اشىقتىعى مەن ناقتىلىعىن قامتاماسىز ەتەدى.
«قازاقستان مەن وزبەكستان سىرداريا باسسەينىندەگى ون ۋچاسكەنى اۆتوماتتاندىرۋعا كىرىستى. وسى تاجىريبەنى ارال تەڭىزىندەگى بارلىق باسسەينگە ەنگىزۋگە بولار ەدى. قوردى ينستيتۋتسيونالدىق تۇرعىدان ودان ءارى دامىتۋ ماسەلەسى وزەكتى. بۇل ۇدەرىس ءبىرشاما سوزىلىپ كەتتى دەپ ويلايمىن. كەزەك كۇتتىرمەيتىن مىندەتتىڭ ءبىرى – مەملەكەتارالىق ەنەرگەتيكا كوميسسياسىن قۇرۋدى اياقتاۋ. ەلدەرىمىزدى تۇراقتى ءارى سەنىمدى تۇردە سۋمەن قامتۋ بويىنشا ەنەرگەتيكا سالاسىنداعى ءىس-قيمىلدى ۇيلەستىرۋدىڭ ماڭىزى زور ەكەنىن ءومىردىڭ ءوزى كورسەتىپ وتىر. سوندىقتان, ءبىزدىڭ ويىمىزشا, قوردىڭ سۋ شارۋاشىلىعى جانە ەنەرگەتيكا كوميسسيالارىنىڭ وتىرىستارىن ۇشتاستىرعان ءجون. ەڭ اۋەلى, مەملەكەتارالىق ەنەرگەتيكا كوميسسياسىنىڭ سىرداريا وزەنى باسسەينىندەگى جۇمىسىن جولعا قويۋ ورىندى دەپ سانايمىز. ودان كەيىن ىقپالداستىق تەتىكتەرىن جەتىلدىرە وتىرىپ, ارال تەڭىزىنىڭ تۇتاس باسسەينىن قامتۋ ارقىلى بۇل فورماتتىڭ اياسىن كەڭەيتۋگە بولادى. بىرنەشە كەزەڭنەن تۇراتىن مۇنداي ءتاسىل ايماقتاعى بارلىق ەلدىڭ مۇددەسىن ساقتاۋعا مۇمكىندىك بەرەدى», دەدى پرەزيدەنت.
پرەزيدەنت ارالدى قۇتقارۋ قورىنىڭ ءوڭىر ءۇشىن ماڭىزىن اتاپ ءوتتى
